منتديات وهج الذكرى - فك التكشيرة

ما تسَلِم عليا يا عم الحج http://www.goodwayinlife.com/forum/i...20%2844%29.gif

تعَالوُا كِدَة نشوف الحَدِيث دَه ..

قَالَ رَسُول الله صَلَى اللهِ عَلَيهِ وَ سَلَّم : ( يَا أيُهَا النَاس >> أفشُوا السَلام ، وَ أطعِمُوا الطَعَام ، و صِلوُا الأرحَام ، و صَلُوا بالَلَيلِ وَ الناسِ نِيَام ، تَدخُلُوا الجَنَة بِسلام ) صَحِيح .

الحَدِيث دَه فيه 4 وصايا من النبي صلى الله عليه و سلم لِأمُته :)

(( الوصية الأولى ))

إفشاء السلام :-

* عارفين إيه هي تحية الإسلام ؟؟

- تحية الإسلام هي " السلام عليكم و رحمة الله و بركاته " ^_^

طَب أقولك حَاجة ؟

* بتحس بإيه أول ما تنزل من البيت و تشوف عم عبده البواب و تسلم عليه قبل ما تروح شغلك ؟
بتحس إنه بيرد عليك و هو مبسوط صح ؟
و يمكن كمان يدعيلك دعوة بنية صافية عشان إنت حسسته إنه بني آدم يستحق سلام ربنا !

* مشيت شوية جمب البيت لحد ما وصلت لعم صبحي بتاع الفول : )

إنتَ : السلام عليكم و رحمة الله و بركاته ، صباح الخير يا عم صبحي ^_^
عم صبحي : عليكم السلاااااااام و رحمة الله و بركاته ، صَباح الفل يا باشا !

شوفت السلام خلى عم صبحي متفائل بيك إزاي ؟

و كل يوم هيبقى مستنيك تعدي عليه عشان تسلم عليه سلام ربنا و تبتسم في وشه على بداية اليوم : )
انا لما كنت بروح المدرسة بتاعتي و انا بثانوي كان فيه واحدة كنت كل لما اشوفها ابتسم ليها و تشاورلي و حنا مش نعرف بعض لكن و الله كتير دلوقت بتوحشني و بتمنى اشوفها
* ركبت المواصلات عشان تروح مشوارك و قلت : السلام عليكم لكل الموجودين في المواصلة ..

و سمعت الرد : و عليكم السلام و رحمة الله و بركاته ^_^

عارف ؟

هما هيطمنولك بنسبة 90 % :)

أصل صعب أوووي تكون مثلاً حرامي ، أو ناوي تقتل حد ، أو عايز تخطف طفل O.o
و تدخل مبتسم ، و مطئمن ، و تلقي عليهم السلام !

أما عن إحسَاسك فإنت هتحس براحة نفسية حتى لو عندك مشاكل الدنيا كلها ..
أصلك شايف الأُمَّة دي بترد عليك السلام كأنها بتقولك : إحنا بنتمنى لك السلام و الرحمة و البركة من الله عز و جل زي ما إنت إتمنيتها لينا و إنت بتسلم على ناس أول و أخر مرة تشوفها في حياتك !

* طيب عارفة يا بنوتة ؟

لما تيجي تردي على رقم غريب في التليفون و تقولي : السلام عليكم : )

و يكون المتصل " راجل " ناوي يعاكسك و يضايقك ، أو حتى يسلي وقته !
سلام ربنا الجميل هيخليه يفكر مرة تانية في إنه يأذيكي ، أصله حس من أول كلمة ليكِ إنك بتحبي ربنا و الرسول صلى الله عليه و سلم بكلمة بسيطة أوي إنتِ قُلتِيهَا ..

هيسيبك في حالك و هيشوف واحدة غيرك ، أو يمكن حتى يفكر يبطل خصلته السيئة لما يتأكد إن البنات لسة فيها خير : )
و انا حصل معايا الموقف دا ورد عليا واحد و قال طب ازاي كده ازاي لسة فيه حد مش عاوز يتعاكس او حد يضايقه دي البنات بتفرح بدا
أقولكم على حاجة كمان ^_^

* السلام اسم من أسماء الله الحُسنى <3
اسم حلو أوووي ، لو فكرت فيه للحظة بس و إنت بتنطقه هتحس قد إيه هو جميل و بيزرع جواك أمن و سكينة ..

فــ ليه تبخل على نفسك و على غيرك في إنك تقولها و يسمعوها ؟

و اللي مكنتش تعرفه بقى ../

* السلام ده حق أخوانك المُسلمين عليك ! : )
حقهم إنك تتمنى لهم " السلام " بقلبك ، و تنطقه لهم بلسانك لعّل سلامك يِدخل على قلبهم سكينة و فرحة ..
طَيب بُصوا على جمال السلآم اللي مِش عارفين قيمته دَه السيدة عائشة " رضي الله عنها " قالت فيه إيه ؟ ^_^

عن عائشة رضى الله عنها أن رسول الله صلى الله عليه و سلم قال : " ما حسدكم اليهود على شيء ما حسدوكم على السلام والتأمين " رواه البُخاري

تعالوا بقى نتكلم في ثوابه : )

جاء رجل إلى النبي صلى الله عليه وسلم فقال: السلام عليكم .. فرد عليه السلام ثم جلس ، فقال النبي صلى الله عليه وسلم : " عشر " , ثم جاء آخر فقال : السلام عليكم ورحمة الله .. فرد عليه فجلس ، فقال " عشرون" , ثم جاء آخر فقال: السلام عليكم ورحمة الله وبركاته ..فرد عليه فجلس ، فقال: " ثلاثون " رواه الطبراني

شوفت 5 كلمات بتنطقهم بقلبك و لسانك في أقل من نص دقيقة بتاخد عليهم كام حسنة ؟

- 30 حسنة كاملة : )

و أقل حاجة لو قلت : السلام عليكم بس و إكتفيت ربنا هيجازيك على الكلمتين دول 10 حسنات كاملين ^_^

بلاش بقى تستخسر في نفسك حسنات كتير بكلمات قليلة !

ده إحنا بنتشعلق في رحمة ربنا و رضاه ، و نفسنا نحس إننا بنعمل عشانه حاجة و لو بأقل قدراتنا :)