منتديات وهج الذكرى - اسباب بكاء الأطفال الرضع

للامهات الجدد ركزوا معايا
اسباب بكاء الأطفال الرضع
==============
اسباب كتير منها:
*الشّعر : شعره ملفوفه على صباع مثلاً ومش باينه.
*العين :حساسية أو التهابات، دموع و عماص.
*الفم١ : فطريات ودى بتكون معاها "ريالة" وتطليع اللسان (أبيض جدا) وساعات رفض رضاعة وزنّ.
*الفمّ٢: تسنين ومعاها التهابات وورم لثة وبكاء ورفض أكل وريالة برضه!
*الأذن : التهابات الأذن الوسطى ، ثلاثية الزن المستمر بالليل بالذات ، وقلة الرضاعة ، و الأم اللى بترضّع وهيا نايمة - أو البيبي اللى عنده رشح من يومين! بص كده بمنظار الأذن ، تمام ، إنتا معلم!!! * بصوت سعد لمجرد*
*الصدر: النزلات الشعبية الحادة !!!!!
وخلو بالكم كتير أوى أطفال كل اللي عندهم يكون رفض رضاعة وعياط بس ! وتسأل قبل يومين يطلع في عطس ورشح خفيف وخنفرة ،،
عدّ النفس يا دوك ،، عالى ؟؟ دي نزلة شعبية يا معلم! الحالات دي Dramatic response على جلسة الأدرينالين،، اه والله 😊
*البطن : الغازات والانتفاخات ،، ودى بالذات هيا أول احتمال بيفكر فيه الشعب كله- بلا مبالغة ،، وبيجيلك الواد شارب ينسون وكراويةً وتيليو وبيبي درينك وماء غريب السعودى- مش عارف لقيوه فين- وواخد سايميثيكون ودنتينوكس وبيبي ريست -مع ان التلاته واحد اه والله😂 بييجى بطنه منفوخه لغاية ما يبان له صاحب !
كفاية أوى سايميثيكون ، وهزى البيبي برفق، وكرعيه كويس وحمّيه كده ،، هينام ، لو منامش ،، انسي الانتفاخات وشوفي سبب تاني!!!!!!
*البطن : "الفتق المنخنق"
تقيلة دي ، مش كده؟؟ ساعات اطفال بيكون عندهم جزء من الأمعاء بيطلع من مكان السرّه (فتق سرى) أو تحت البطن( فتق إربي) وده مفهوش أى مشكلة طالما بيدخل ويخرج عادى ،، إنما لو "اتخنق" بيلتهب وبيعمل ألم رهيب !! فخلّوا بالكو ! عشان بيحتاج جراحة عاجلة 😧
الإمسااااك 😥
واتكلمنا عنه ف مقال مفصل قبل كده فكرته بس ان احنا نفضي القولون بلبوس جلسرين ، ونكمل بملينات زى زيت اللوز والخروع او اللاكتيلوز ،، البيبي هيهدا جداً وينام!
*التسلخات : ييجي الطفل يعيط بلا توقف ! والأم تقولك على صرخة واحدة ،، ! مرة أم قالتلي الواد أحطَع ع السرير يصرخ ! أشيله على كتفى يسكت ،، ببصّ على مكان البامبرز وعينك ما تشوف الا النور😓 المهم كمادات مياه ساقعه وننشف كويس و سودو كريم او زنك لغاية ما نكشف والمكان لازم يبقى جاف دايماً !
*قرص الناموس أو الحشرات :
وده من أسباب الفزع المفاجئ بالليل يصرخ جامد ، عشان كده لازم نقلّع البيبي تماماً ،، هنستخدم كريم ملطف ٣ مرات و كورتيزون آمن زي Elocon مرة واحدةً يوميا هيبقى زي الفل بإذن الله 😃
💥الارتجااااااااااااااااااع !!!💥
مين فينا ابنها او بنتها م"قشطتش" قبل كده ،، اللبن أصله بيرجع من المعده للمرئ وبعدين على الفمّ عشان العضله السفلية للمرئ ضعيفة لغاية ٦-١٢ شهر !! ،، اللبن لو قعد فترة واتهضم يطلع "مجبن" أو اللي بنقول عليه "قشط" ولو رجع علطول يطلع صافى ،، وعلى فكرة الاتنين ارتجاع مش ترجيع !
يعنى مخافش ؟؟
أبداً طالما الوزن بيزيد كويس ، مفيش التهابات رئوية، مفيش زنّ ٢٤ في ال ٢٤ ساعه !
طب ولو في زنّ !
ده معناه ان الارتجاع عنيف لدرجة ان حمض المعدة "كحت" بطانة المرئ وبدأ "يلمس" في الأعصاب كل ما اللبن يرجع عشان كده البيبيهات دي محتاجه علاج محترم !
ايوا اللي هوا إيه ؟
٣ نصايح لكل أم جديدة ابنها بيقشط كتيير!
** قبل الرضاعة ،، موتيليوم وسايميثيكون ،،
** أثناء الرضاعة، نكرع مرتين، ف الوسط و الآخر.
** بعد الرضاعةً ، ننيم البيبي ٤٥درجه الصدر والوجع عالى ،وممكن نستخدم مضاد حموضه زي چيفسكون .
مفيش نتيجهً؟،، نستخدم دوا يوقف حمض المعده تماما زى Nexium مثلاً ،،
مفيش برضه ندور على أسباب تانية زى حساسية اللبن ، أو أسباب جراحية !!
المهم ان من كتر حالات الارتجاع جاتلي حالة نادرة جداً وهيا طفل عنده ١٠ شهور وبيرجع كووووووول الأكل ماعدا اللبن والسوايل ،، لو شم ريحة أكل صلب مش سايل يقلب كل اللى ف بطنه !!

💢💢💢💢💢💢💢

د\احمد الخطيب