بسم الله الرحمن الرحيم
والصلاة والسلام على أشرف الأنبياء والمرسلين
سيدنا محمد عليه أفضل الصلاة وأتم التسليم
أحبتي ,,
سؤال للبعض .. بدون مُقدمات
ألين متى كل ماجاكم إيميل
عن الصور اللي فيها إساءة للرسول
" صلى الله عليه وسلم"
أو إساءة لـ كتاب الله
تقوموا على طول تحولوه
لكل اللي عندكم في القائمة ؟؟؟
يعني ..
إنتوا بهذي الطريقة تنصروا دينكم ونبيكم ؟؟
ولا تبغوا تعطوا فكرة للناس اللي مايدروا ..
إنو والله في ناس بيعملوا صور فيها إساءة ..
ولا عشان كل واحد يوصله الإيميل ..
يدعي على أصحاب الاساءة؟
ولا أيش الحكاية بالضبط ؟؟
اليهود وكل أعداء ديننا ونبينا
صاروا يسخروا مننا في مواقعهم
وأصبحت عندهم قناعة تامة ..
إنو لو يبغى أي شخص منهم الشهرة ..
أو نشر أي شيء ضد الإسلام والمسلمين
وان الناس في ظرف كم يوم تتكلم عنه
ويصير اسمه في كل موقع عربي ع النت..
في كل ايميل يخص العرب والمسلمين ..
كل اللي عليه يعمل صورة فيها إساءة
أو يسخر من سيد الخلق
" عليه الصلاة والسلام "
أو يسخر من الدين
والمسلمين ماراح يقصّروا
في سرعة البرق راح ينشروها ويتداولوها
ليش ما يكون في تمّعن في المسألة ..
وايش ممكن نسويه غير تحويل الايميلات هذي ؟؟
طيب .. ليش مانحوّلها بدون الصور
ونكتفي بالكلام عن الإساءة اللي حصلت؟؟
دحين حتى المستجدين في النت
يعرفوا يحرروا الايميل
ويعدلوا فيه حسب رغبتهم
ممكن أحد يتسأل .. طيب كيف نقنع الناس
إذا ما شافوا الصور ..
انو في اساءة على ديننا وعلى نبينا ؟؟
" عليه الصلاة والسلام"
يا أخي حوّل الايميل بدون صور
إذا انت عندك حماس وماتصبر وووو
وتفتكر إنك بتصرفك هذا بتنصردينك ونبيك
" عليه الصلاة والسلام "
إذا دعيت على من أساء لنبيك ودينك
إن شاء الله يكون الدعاء مقبول
مو لازم يكون في شيء معين تشوفه
وغيرك يشوفه ,,
وبعد كدا يكون للجميع ردة فعل معينة
تخيل ايش ينتج عن تحويل الايميل ..
لو فرضنا انو عندك ما يقارب 20 شخص مُضافين
معناته الصور اتوزّعت على الجميع
وأتخيل لو كل شخص وصله الايميل ..
وحوله لنفس العدد .. ايش حيصير ؟؟
يمكن في خلال ربع ساعة أو أقل راح يكون
حجم الإنتشار كبير جداً .
يعني بالطريقة هذي .. خلاص نصرت دينك ونبيّك ؟؟
ياحبيبي إنت ساهمت في نشر الصور
وزيادة عددها بشكل ماتتخيله
بدون مايكون في بالك وبدون تعمد
إنما الأعمال بالنيات
وإنما لكل أمرىء مانوى
ومؤكد إن الإنسان بيتفاعل مع الموضوع ..
نظراً لمحبته وغيرته
ما بيتصرف .. بالشكل هذا
إلاّ من واقع يقول انه غيورعلى دينه
لكن ,, انتشار الإيميل
بيخدم رغبة اللي عمل الصور .. اللي فيه
أنا متأكد إنو في ناس حتى الدعاء ما صاروا يدعوا
على اللي عملوا الصور الحقيرة ..
مش تضامناً معاهم..
بس من كتر ما تمر عليهم
هذي النوعية من الايميلات
صار الواحد يحذف الايميل على طول
وحتى يمكن قبل مايقول :
" حسبنا الله ونعم الوكيل "
في ناس .. لهم عذرهم
لأن الواحد بيتصرف حسب فكره وعقليته
وبيكون على سجيته
بدون ما يفكر في المسألة ..
هذولا ممكن نعذرهم
لكن المثقفين ..
واللي بيكتبوا مقالات وووو
واللي لهم فكر يحترموه الناس ,,
ليش ما يفكروا في المسألة بتعقل
ويحاولوا يفهموا ..
انه مافي أي فائدة من مسألة
تحويل الايميلات هذي.. وانتشارها بيننا
ليش نزيد عدد الصور
ونحقق رغبة اللي سواها
وكان ينتظر انها توصل
لأكبر عدد مننا .. عن طريقنا
اليهود وكل من على شاكلتهم
حيستمروا في عداوتهم لنا ولديننا ولنبينا
الين تقوم الساعة
يعني .. الدعاء عليهم ..
مايحتاح ايميل يجينا عشان يذكّرنا
الرجاء ,,الرجاء
لا تساهموا في نشرالإساءة
اللي يبغى يُنصر دينه ونبيه ,, ما يحتاج يجيله إيميل
وبعد كدا يقوم يحوّله على شخص تاني
لو عملوا فرز على هذي النوعية من الايميلات
راح يلاقوها عند العرب والمسلمين
أكثر من اللي هما عملوها
عشان كدا صاروا يسخروا مننا ,, لأننا بنساعدهم
وننفذ اللي يتمنوه بكل جدارة
ولا حول ولاقوة إلاّ بالله
***
مبدأ الوصول لـ فهم أكبر عدد ممكن
كان يتطلب الكتابة بالعامية
دُمتم جميعاً بخيرٍ وسعادة
خالص تقديري وعرفاني للاخي الغالي
البرنس رامي
للخيال طعم آخر