|| مهندس الكلمة بدر بن عبد المحسن ||~.,

تخيل

تاقف على اطراف الهدب .. وماشافتك عيني ..
صافحتني ومدري يدك هي لمست ايديني ..
سلم .. ابارد السلام ..
وهذا ترى كل الكلام ..
اللي بقى بينك وبيني ..
تخيـّــل ..

من وين .. ومنين ومتى ..
بالله ذكرني ..
بالله ذكرني .. متى ..
جيتك انا فـ ليلة شتا ..
تهزني ريح الشمال ..
محتاج انا لبسمه وشال ..
تركتني لبرد الطريق وانا على بابك ..
اتذكر انك قلت لي بالله وش جابك ..
ودعتني قبل السلام .. وهذا ترى كل الكلام
اللي حصل بينك وبيني ...
تخيّــــل ..

اليوم لعيوني السما والارض البعيد ...
اليوم ولغيرك انا يطري على بالي القصيد ...
اشتقت للقلب الخلي ..
وش هم .. لو تعتب علىّ ..
جيتك انا فـ ليلة ألم .. قلبي على كفي ..
همست لي روح ياغريب الشوق مايكفي ..
سلم ابارد السلام ..
وهذا ترى كل الكلام ..
اللي بقى بينك وبيني ..
تخيّــــل

يذكرني القمر ظلك
يذكرني القمر ظلك عجب ياللي ظلالك نور
وانا اللي ماعرفت الليل لولا عتمة أهدابك

حبستك في السما شمس وعلى وجه السحاب طيور
ونخيل باسق يشرب رضاك ويعطش عتابك

وجلست اناظرك ما رف لي جفن تقل مسحور
أقول ان الجمال انتي وكل العشق باسبابك

هقيت اني ملكتك مادريت ان الأماني غرور
وانك في يدي لين انتحابي الوقت واقفا بك

سقا الله يوم كان اكبر همومك خاطري المكسور
وكنت الضي في عينك وكنت السقم في ثيابك

سقا الله يوم كنتي الارض أنهار وشجر وقصور
ديار نورها من طاقتك .. وأحلامها بابك

عيوني ياشقى عيوني من الجدب الموات البور
أراضي مابها الا ماذوى وانهد في غيابك

أحبك كان لي قلب يجض من الجفا مقهور
وصار اليوم يفرح لو لقى به عذر يشقى بك

الشمس طاحت

الشمس طاحت .. وبردت..
ورمد الشفق .. في حجر الارض
من يشتهي يدوس باقدامه على هالرماد كله ..
يا عابرٍ .. على المدى .. من السراب .. الى الندى ..
قلبي سقط فوق التراب شله ..
او لا تدوس القلب خله .. كل يوم له شمس
وانا مالي سوى قلبي
انا .. من بكى لين الثرى بله بالدمع ..
ويوم اكتفى .. صد وعصر ظله .. ومسح بردنه .. وجنته ..
ثم ابتسم لين حسدوه الناس
يازارعٍ شوك الهراس .. فوق الرمل كله .. لاقدام من يكره الشوك
ياحظ من ياطى بقدم .. انا مالي سوى قلبي
الشمس طاحت ونثر الظلام ظله ..
على الجروح .. ياكاتم الزين الفضوح عن عيني
لا تظهر انيابك .. وتقطع احبابك شمات
انا من عطى ضي الشموس خله .. لين حسدوه الناس
ولا تنتظر غير السموس .. لله ..
انا مالي سوى قلبي .

سيدي الوطن

أنا يا سيدي لا مـا تجرعـت العطـش ينبـوع ..
ولا قد مرني قيظ وصميلـي يابـس وعطشـان

ولا اكلت الجراد اللي تساقط والزهر في طلـوع ..
سنة ابطـى المديـد ولا بقـى زادٍ ولا سلـوان

ولا لي في الخلا ذودٍ ولا لي في البـلاد زروع ..
ولا كان الوبر والطين سقفٍ لـي ولا جـدران

ولا اعرف الهجاد ولا صحيت من الكرى مفجوع ..
على صوت الرمي عند البيوت وصيحة المقطان

نجيت من الوبا ربي خلقنـي والوبـا مقطـوع ..
وفاتتني المغازي ما قضب كفي رسـن وعنـان

ولدت وفي السما فجر وأذان وفي القلوب خشوع ..
على كفوف الرخا يا سيدي والعـدل والإحسـان

ولكن شفت من هاك الظلام اللي سبقني شمـوع ..
وسمعت من السوالف ما فتني يا أكرم الأوطـان

عرفتك سيدٍ شهـمٍ كريـمٍ فـي زمـان الجـوع ..
عنيدٍ مـا سلبـك الفقـر لا عـزه ولا إيمـان

وشفتك عاريٍ حافي عجبت لراسـك المرفـوع ..
متى كان المرض تيه ومتى كان العوز سلطـان

عشقتك والعرب تابع وأنـت لحالـك المتبـوع ..
عزيزٍ مـا تطيـق الـذل لا ارضٍ ولا إنسـان

تصارعك الدول ما شيف مثلك صارع ومصروع ..
كريمٍ لا ظفـرت ولا انكسـرت تجـدد البنيـان

ثلاث قرون ما هي ثورةٍ هبت شهـر وأسبـوع ..
ولا هي دولةٍ قامت علـى الأوهـام والطغيـان

ثلاث قرون من نزف وعسر وقت وصبر ودموع ..
وضرب بالهنادي من ربى الشام لرمال عمـان

حشا يا سيدي ما انته ثرى نفط وذهب مشـروع ..
ولا انته مشلحٍ عودي لمع زريه علـى الأمتـان

ولا أنته للفتن أرضٍ سكنها الجاهـل المخـدوع ..
يشق بخنجره صدره ويرجـي جنـة الرحمـن

ولا أنت اللي بلا ديـنٍ ولا مبـدأ ولا موضـوع ..
صديقٍ في الرخا وإلا متى مال الزمـن خـوان

سلامٍ يا هل العوجـا سـلامٍ بالفخـر مشفـوع ..
عليكم يا هل الدين الحنيـف وشيمـة الفرسـان

سلامٍ يا رمالٍ من حدق عين ومهـج وضلـوع ..
ويا شم الجبال اللي عليها مـن الرضـا هتـان

سلامٍ يا وطن كله بنـي عـم وأهـل وربـوع ..
أبوه الشهم عبدالله وأخـوه الصيرمـي سلطـان

حشا ما نرخصك مادام باقـي للنخيـل جـذوع ..
ومادام الوسم يرخي القلايـد فـ ( أول ) الميـزان

طالت علي المسافة
يا صاحبي طالت علي المسافه
كل ما نشدتك قلت لي الدرب قدام

وعدك مثل باكر أحبه وأخافه
ولا ينقضي باكر على طول الأيام

ما اقول ضاع العمر عندك حسافه
انت الدقايق عشتها وانت الاعوام

ودي ربيع العمر يسبق جفافه
يا مسقي العطشان من كاس الأوهام

كانك تعاف الجرح حنا نعافه
وما سهرت عيوني تبي عينك تنام

ومن لا ذكر منك جميل خلافه
ما يملكه وعد ترى السعد قدام

غلال حنطه

لعيونك أملا صوتي غلال حنطه ..
وأظهر لكل الناس مكسور الاغلال

أطعم طيور الحزن نورٍ وغبطه ..
وأقول كل الصبح لأهدابك ظلال

ياللي بقلبي صعب حله وربطه ..
وياللي بعيني نهر جمرٍ وشلال

قال الهوى يا فرحة العمر شرطة ..
بنتٍ تصير عيونها قلب رجال

يا هيه احبك كل الاشعار سمطه ..
والله مدري كيف هالحسن ينقال

خذيت من رمل المجرات غمطه ..
لاقدامك أمشي فوق نجمات وهلال

ما نيب اعرفك كان الاحلام غلطة
وبالحيل اعرفك لو تحبين الاطفال

المحبة أرض

المحبه أرض والفرقا أراضي ...
والزمن ترى لاغبت ماضي
والله أني ماأشوف الا عيونك ..
ان رحلت اليوم او طول مراضي
والله اني مابكيت الا عيونك ..
فوق خدي كحلها والدمع فاضي
قالوا العذال والعذال مرضى ..
وش بلى حالك من الأشواق قاضي
قلت يهجرني حبيبي لين يرضى ..
علموا الظالم ترى المظلوم راضي
جرحوني في هواك وقلت ابشكي ..
ماهو لجرحي ولكن لاعتراضي
وش علي لو قطعوا لأجلك عروقي ..
من رضى بالحب يرضيه التغاضي

جفن الليل

يطيح جفن الليل واهز كتفه
نجمٍ يشع وباقي الليل مطفي
واحاكي الجدران عن وصف غرفه
ماتشبه الجدران ويطول وصفي
وتملني الجدران واظهر لشرفه
تحت السما واسكر الباب خلفي
ريحٍ تهب وتسكن العظم رجفه
وتموت ريح وتسكن اوراق نزفي
على الروابي تهطل دموع وطفه
وتصب لمع بروقها وسط طرفي
ياطاري الغدران والعمر رشفه
مع قلها ياليتها يوم تصفي
الحب واجد مير الاقدار صلفه
والأرض واجد لكن الحلم منفى
واللي اعرفه راح ماعاد اعرفه
ولاظن يذكرني الى أقبلت مقفي
ماهو حبيبي مورد القلب حتفه
ولا هو حبيبي يفرح بوقت ضعفي
مر ثمر هالليل وأمر قطفه
يالحنظل اللي قمت اذوقه بكفي
متى الشوارع تجمع اثنين صدفه
لا صار شباك المواعيد مجفي
يابنت تو الليل ماراح نصفه
وياليل بعض اللي مضى منك يكفي