رسالة من حفيدكم المحبوب

للجد
والجدة

رسالة من حفيدكم المحبوب

السلام عليكم ورحمة الله وبركاتة

جدو حبيبي لاتنطيني ببسي كلساع ! بعدين سنوني تخرب وتكوم توجعني كلش والليل ما اكدر انامه

جدو تقبل هيج تاذي حفيدك؟ اكيد لا

بيبي حبيبتي لاتنطيني جاي واني عمري 8 شهور! بعدين يصير بيه فقر دم ويصير وجهي اصفر مثل الليمونه وافقد الشهيه ويتاثر نمو عقلي !

ترضين بيبي هيج تاذين حفيدج؟؟ اكيد لا

جدو وبيبي ميصير تنطوني موبايل! حتى لو بجيت اريده لان الموبايل غيييييييير مخصص لعمري

من اكبر ويصير عمري يسمح عود اشترولي احسن موبايل وانطوه لماما او بابا يخلي عليه برامج تناسبني من ناحيه الامان ويكونون مشرفين عليه

جدو وبيبي اعرف انتوا اكثر ناس تحنون عليه وتحبوني ، بس لازم اتعلم الصح والخطأ
اني صغير وما اعرف
اذا موضحتولي الحدود من هسه ،،، حتمرد من اراهق وبعد صعب يتسيطر عليه واصير واحد مرعبل ومستهتر

ترضون حفيدكم يصير مستهتر ويكولون عليه ممتربي؟؟؟ اكيد لا

جدو وبيبي
اكو هواي طرق صحيه وسليمه تعبرون بيها عن حبكم الي
مثلا
اشترولي فواكه
بيبي سويلي سموذي حليب وموز كلش طيب من ايدج

جدو طلعني العصر نفتر ونروح للمخضر ونشتري لبيبي طماطه وخيار

جدو اشتريلي كشمش وكرزات

بيبي اقريلي قصص واحجيلي شلون جنتوا تلعبون وانتوا صغار
وحفظيني قران وقصائد حلوه

بيبي خليني اساعدج من تسوين غده وخليني اودي الخواشيك واوزع الخبز

وبالختام ، اني احبكم ، بس ارجوكم لاتدمرون صحتي وعقلي وطفولتي
وبابا وماما هم يحبوكم بس مرات تزيدون التربيه صعوبه من تلغون القوانين وتخلوني مثل الريشه بمهب الريح
ساعدوا ماما وبابا يثبتوني ويخلولي ثقل حتى اركز واعرف وين وشلون وشوكت وشنو الانسب
واذا شفتوهم ديغلطون بحقي , من انام احجوا وياهم
ولاترزلوهم كبالي
لان هيج بعد ما احترمهم واي شي يحجوه اعتبره غلط

والله يحفظكم الي ومايحرمني منكم

د.اسماء البدري

المواضيع المتشابهه:

• على الرحب والسعه اخونا المحبوب
• رسالة لك (28)
• 100 رسالة حب
• رسالة شوق
• رسالة

ريماس ,اميرة الحب ,روح الأمل و 2 آخرون معجبون بهذا

نجـ سهيل ـم ,نجمه ليل