| ~{فعاليات منتديات وهج الذكرى}~ | |
|
|
|
|
|
|||||||
| ❦ وهـج القصص والخيال ❦ ❧ لكل ما يروق لنا من قصص او خاطرة |
 |
|
|
|
أدوات الموضوع | انواع عرض الموضوع |
|
#1
03-10-2023
|
||||||||||||||||
|
||||||||||||||||
قصة انتقام الأرواح
باسل: خلص تاكدتي انو اخدتي كل شي بدك ياه؟
سيلين: ايه... اخدت كل شي... باسل: يلا لكن اطلعي و رح خلي الشباب يمشو بالشاحنة ورانا.. سيلين: ماشي... مشي باسل و شغل السيارة، تطلعت وراي و حطيت ايدي على باب البيت.. هاد البيت انا صممتو...انا اخترت كل قطعة اثاث فيه..تلات مهندسين اشتغلو فيه...حطيت احلامي و آمالي بكل زاوية... و علقت فرحتي على كل حيط.. تحفة معمارية... الكل حكيو فيه انو ما صار متلو بالبلد... وهيك بلمح البصر خسرناه لان جوزي باسل افلس... و البنك حجز على كل املاكو... باسل: سيلين خلصينا.. مسكت مقبض الباب... سكرتو. .. رفعت طاقية الجاكيت على راسي لان بلشت تمطر...و ايدي بجيبتي و مشيت للسيارة و ركبت جنب باسل وما حكيت و لا كلمه... مشينا و بلش المطر يشتد... تطلع باسل وراه و هو متوتر باسل: هلأ اغراضنا الي بالشاحنة ورانا رح ينبلو سيلين: لا دخيلك الا هدول الاغراض جبت التحف الي كنت تهديني ياهن و تيابي الغالية...نبه عليهن يغطوهن باسل: طيب طيب... اشرلهن بضو السيارة مشان يوقفو و صف على جنب الطريق و هن صفو.. و نزل لعندهن... تطلعت لورا و شفتهن عم يطلعو غطا بلاستيك كبير و يثبتوه فوق الأغراض .. اتطمنت و لفيت وشي لقدام و رجعت راسي عالكرسي و انا عم حاول استرخي... هي اصعب مرحلة بمر فيها بحياتي يا ريتو مجرد كابوس واصحى منو ... رجع باسل وهو مبلول كتير و عم يشر مي... باسل: مشي الحال... سيلين: هلأ بتمرض باسل: لا عادي... شغل السيارة و مشي و صار يعطس باسل: هتشووووو سيلين: هههههه التلك... باسل: ايه مو مشكلة المهم ضحكتي، من وقت ما سمعتي الخبر و انتي ما عم تضحكي بنوب... سيلين: المصيبه كانت كبيرة... باسل: حاولي تنامي طريقنا طويل... ريحي حالك... سكتنا تنيناتنا... و صرت راقب قطرات المطر و هن عم ينزلو على بلور السيارة... ((اسمي سيلين...عمري 26 سنة....خريجة علوم إدارية (فاتنة) بشهادة الكل... من تلات سنين اول ما تخرجت جهزة ملف السيرة الذاتيه تبعي و بلشت لف فيه على الشركات لحاول احصل على وظيفه...و لسبب ما القدر اخدني على شركة باسل، كانت شركة جديدة و بعد شهر لما يئست انو حدا يدئلي... اتصلو فيني و طلبوني للمقابلة... وتوظفت سكرتيرة بشركتو... باسل رجال بعمر 37 بس مو باين عليه... مجذب كتير... طويل و كتافو عريضه... دقنو مهذبه و منظمه و عيونو سود... هداك السواد الساحر كان عايش بألمانيا ست سنين و اجا يستثمر بالبلد... كأنو جاي مخصوص ليصير زوجي و يوقع بشباكي!! من اول ما شفتو حطيتو براسي... و صرت فكر و خطط كيف رح جيبو لعندي... كيف رح خليه ينتيه لوجودي وهو شخص تقيل كتيرررر و رسمي مع الكل...كان صعب كتير و عزبني كتير بس بالاخير.... و صلتلو.... و اجا على بيتنا كرفته)) باسل: سيلين... سيلين... سيلين: اي اي شووو في باسل: شبك؟ مافي شي بس وصلنا سيلين: عنجد؟ ما انتبهت باسل: يلا انزلي.. فتحت باب السيارة ونزلت رجلي و فورا غاصت بالطين.. كانت الساعه 2 الظهر... بس كتر ما عم تشتي و السما مغيمة... الواحد بفكر الساعه بحدود ال 6 المسا !! سيلين بصوت عالي: بااااسل وين البيت؟ رفع اصبعو و اشرلي عالبيت الي ورا ضهري... التفتت محل ما اشرلي و حطيت الشنته فوق راسي لاقدر شوف منيح...و بس شفت البيت بلعت ريقي... مبين بيت قديم كتير نظام بنائو بين ما بيشبه القصر و البيت الريفي... قرب لعندي و حط ايدو على خصري باسل: امشي ضليت واقفه مكاني... التفت علي وهو معصب: امشي الشباب بدهن ينزلو الاغراض ما بدي يشوفوكي بس يحكيني باسل هيك لازم اتحرك وانا ساكته .. وما في داعي ناقش لأن ممكن الموقف يتصاعد ويتحول لمشكلة كبيرة مشيت وهو مشي بسرعه قدامي طلع المفتاح من جيبتو وفتح باب البيت .. كان باب كبير من الحديد .. وماكلو الصدا فتح الباب وفتنا كان عتمه كتير .. شغل باسل الضو .. وياريتو ما شغلو .. باسل : فوتي على الغرفة بسرعه وسكري على حالك الباب بس يفوتو الأغراض ويطلعو بقلك تطلعي سيلين : بس باسل باسل : ولك فوووتي .. فتح باب غرفة كانت عاليسار و دفشني عليها وسكر الباب .. كانت الغرفة عتمه .. حطيت ايدي عالحيط وبلشت اتلمس الحيطان للاقي كبسة الضو.. كبستهن وضوت الغرفة .. تطلعت حوالي و فهمت من الأثاث و التنظيم انو هاد الصالون .. كان في تلفزيون قديم وكبير على طاولة من الخشب .. وحواليه تلات قطع كنب مغطايين بقماش أبيض يمكن مشان الغبرة .. وعاليسار في طاولة و حواليها اربع كراسي .. البيت كان مأنشح كتير و وسخ .. ما عرفت حالي شو بدي اعمل .. لك انا بعد كل هالشقا والتعب مشان صير خانوم .. ارجع عيش بهيك بييييييت ربيت بعيلة فقيرة .. كنت كل يوم شوف الذل و الحاجه و اشتهي التياب والسيارات والعطور والدهب والألماس .. كان عندي طموحات واحلام كبيرة كتير عكس كل البنات .. سهرات وسفر و قصور .. و لما شفت باسل .. مسكت فيه بايدي وباسناني .. مع انو اهلي ما كانو حابين هالجوازة بس وقفت بوش الكل .. وتجوزتو .. حسيت ببرد نخر عظامي .. وما استرجيت افتح الباب يقوم باسل يعصب علي لانو مجنون غيرة وبخاف منو بهيك مواقف مشيت لعند التلفزيون ومسحتو باصبعي .. كان عليه اكوام غبره سيلين : يا حبيبي .. وهاد مين بدو ينظفو بالله !! سحبت شرشف من على الكنبايه .. و قعدت على طرفها وانا قرفانه سمعت صوت شي وقع... التفتت لقيت لوحة كانت معلقة على الحيط وقعت... قمت شلتها من الارض علقتها... فتلت ضهري و عم انكت ايدي من الغبره... رجعت وقعت من مكانها... التفتت و انا مستغربة... و ضليت اتطلع باللوحة و هي عالارض و صوت الرعد برا قوي كتير... حسيت شعر جسمي وقف وكان عندي شعور غريب انو في حدا تاني معي بالغرفه تركتا بالارض وضليت اتأمل الصالة وانا مكاني سيلين : يعني هاد الي ناقص .. والله ليشمتو فيني رفقاتي خيرات الله .. سكتت شوي وضحكت على حالي لما اتزكرت انو رفقاتي من لما سمعو انو جوزي افلس والبنك حجز على كل املاكنا ما عاد ردو علي ولا حكيوني يمكن خافو استلف منهن او اطلب مساعدتهن .. واخيراً انفتح الباب وطل علي باسل باسل : تعي اطلعي خلص راحو سيلين : حبيبي تأكد ليكون ضل حدا ويشوفني بتصير مصيبه بعدين .. قمت و بعدتو عن الباب ومرقت من جنبو باسل : شبك لشو هالحكي .. يعني ما حلك تتعودي اني بغار ؟ سيلين : في فرق بين الغيرة والشك .. انت مريض شك باسل : سيلين مو وقتك ها .. هالموضوع سكرنا عليه اتطلعت حوالي .. وكنت عم اتفحص المكان .. كان على اليمين في غرفة كبيرة كتيييييييير كأنها قاعة اجتماعات .. هي المضافة .. وجنبها في مطبخ متوسط المساحه وتصميمو حديث والدرج جنب المطبخ سيلين : شو في بالطابق التاني ؟ باسل : غرف نوم سيلين : بتمنى يكونو نظاف لان بدي نام هلكانه باسل : في غرفة نظفتها وجهزتها مشان نرتاح فيها اليوم وبكرا منبلش تنظيف تطلعت عليه وانا مستغربة : عم تمزح مو ؟ انا بدي نظف ؟ ما فهمت منيح قرب ومسكني من كتافي : سيلين .. حبيبتي .. هلأ كل قرش لازم نحسبو منيح وين رايح و وين جاي هاد ارخص بيت قدرت لاقيه .. صاحبو باعني ياه بتراب المصاري .. بكرا بس ننظفو و ننكت الفرش بصير احلى من بيتنا القديم استلسمت للأمر الواقع ونزلت دمعتي : بس والله ما ارتحت لهل بيت .. بتحسو غريب في شي مو مريح ابداً .. طيب عالأقل جيبلنا اثاثنا الي ضل ببيتنا كل قطعه بتعنيلي كتير .. لك عالأقل غرفة نومي الله يوفئك باسل : يا روحي ازا باخد شي معي بتحاسب قانونياً .. البيت والي فيه ما عادو النا افهمي علي بئى سيلين : يا الله ما عم سدئ الي صار .. ما عم استوعب .. لك كان معك مصاري ما بتاكلها النيران .. فهمني كيف كيييييييف بتغلط هيك غلط وبتخلي ناس ينصبو عليك .. وبتغرق حالك بالديون .. لك وين كان عقلك طلع باسل سيجارة من جيبو وشغلها : خلص بكفي الي صار صار طلعت عالدرج لان هلكانه من التعب : تعال دلني عالغرفة بدي نام طلعت لفوق وكمان كان عتمه .. التفتت وراي وكان باسل بعدو تحت سيلين : باسل وينك ؟ باسل : جاي جاي .. حسيت شي لمس رجلي و كش بدني... تحركت من مكاني و فكرت حالي عم هلوس.. سيلين : يا الله برررررررد .. ما في تدفئة هون .. ما حسيت الا باسل وراي : في حضني .. ما بيدفي ؟ تجاهلت حكيو لان الوضع ما كان خرج رومنسيه ابداً .. : وين الغرفة ؟ باسل : تعي .. مشي ولحقتو .. كان ممر طويل فيه تلات غرف على الجنب وغرفة بآخر الممر .. فتح الباب وقلي فوتي .. وشغل الضو سيلين : هلأ هي غرفة نومي انا !!!!!!!!!!!! انت بتقبل انا نام بهيك غرفة ؟ باسل : لا .. ما بقبل .. بس طولي بالك علي .. شلحت الجاكيت ورميتو على الكرسي .. ورميت حالي على التخت متل ما انا ... وغمضت عيوني .. اجا باسل وتمدد جنبي : البيت رح يصير كتير منيح .. بكرا منبلش فيه .. رح جيب وحده تساعدنا خلص ما تزعلي سيلين : ايه باسل : اكتر شي حبيتو انو الحارة هون هاديه ما فيها شباب زعران وشكلو ما في جيران اصلاً .. والبيت شبابيكو مظللة منيح وانتي ما تفتحي الباب بطلعتي وفوتي . يعني القواعد الي كانت بالبيت القديم بدها تمشي هون كمان سيلين : ايه باسل : وبس رجعو اهلي بعتولي مصاري من ألمانيا برجع بشتغل وبوقف على رجلي و بعوضك عن كل شي سيلين : ايه باسل : نمتي ؟ سيلين : نعسااانه .. رفعت حالي وحطيت راسي على كتفو .. وهو كمل حكي وعم يلعب بشعراتي .. واخر شي سمعتو عم يحكيه :انتي بس اسمعي الكلمة ____________________________ صحيت الصبح وما عرفت اديه الساعه لان الشمس ما عم تفوت على البيت .. ما كان باسل جنبي .. كنت بدي افتح الشباك بس خفت منو يعصب علي سمعت صوت مي .. قمت ومشيت بالغرفة شوي .. وانتبهت انو في حمام و باسل عم يتحمم جوا .. دقيت الباب عليه سيلين : المي سخنه ؟ باسل : صح النوم حبيبتي .. لا بس انا سخنت مي .. انزلي سخني الك في مي وغاز وكهربا كل شي تمام سيلين : ( بقلبي : مي وغاز وكهربا وكل شي تمام .. اوووووووووووووف )شلحت من رجلي ولبست حفاية البيت ونزلت لتحت كان البيت صار اوضح .. صالة مستطيلة بتوزع على الصالون الي فتت عليه امبارح والمضافة و المطبخ .. فتت عالمطبخ وصرت دور على شي عبي فيه المي .. وركبتو عالغاز .. طلعت عالصالة وسحبت الشراشف من على الكنب .. وصرت اسعل من الغبرة .. وبعدين عالمضافة ونفس الشي سحبت الشراشف كلها .. الفرش كان فخم ومبين راقي بس لان مغطى كل هالوقت راحت بهجتو وصار مبين قديم .. كنت واقفه عم اتأمل المكان لما حسيت حدا عم يلعبلي بشعري.... متل موجة دفا نزلت على جسمي... ابتسمت بدون شعور لوقت ما اجاني صوت باسل من بعيد باسل : سيلين وييينك ؟ انتفضت و تطلعت حوالي بخوف بعدين تمالكت حالي سيلين : هووون تعال ... وقف على باب الغرفة .. : شو صاحية نشيطه سيلين : الغرف الي فوق شو فيهن ؟ باسل : شو رأيك هلأ نتركهن وننظف هون وبس ؟ سيلين : ايه بكون أفضل .. تعال ساعدني باسل : امرك كانت اول مره بشوف باسل متعاون لهل درجة .. بعمرو ما مد ايدو على شي بالبيت .. او حتى انا ما كنت اشتغل شي اصلاً كان عندي لفايتين يشتغلو كل شي .. بس هلأ !! اخ بس .. من وش الصبح للساعه 5 العصر و نحنا نشتغل .. تكنيس ومسح وشطف و نكتنا الكنب والفرش ... ومسحنا الغبرة من الأغراض وطلعت التحف الي جبتهن من بيتي وحطيتهن بأماكن مناسبه هلكنا.. بس المهم خلصنا ... باستثناء المطبخ والغرف الي فوق .. راح باسل جاب اكل .. واجا اكلنا وتحممت ورجعت نمت ولما صحيت ما لقيتو بالبيت .. نزلت على الدرج وانا عم اندهلو سيلين : باســـل .. يا باسل .. باسل : نعم .. حسيت الصوت جاي من المضافة .. والباب كان مفتوح بس الغرفة ضوها مطفي .. فتت وحطيت ايدي على كبسة الكهربا لشغل الضو : شو عم تعمل هون ؟ واول ما لمست ايدي الكبسة تكهربت .. ضربتني كهربا قوية .. سحبت ايدي وصرررخت سيلين : آآآآآآآآآآآآآآآآآآيييييييييييييي مسكت بالكنباية و انا عم حط اصبعي بتمي وعض عليها لان انوجعت سيلين : لك في ماس كهربا رفعت راسي وكانت الغرفة معتمة .. سيلين : باسل .. وينك ؟ انطرق الباب بشكل قوي كتير كأنو حدا عملاق ضربو بقوة .. صوت الضربة كأنو بخش طبلة ادني ... انتفضت نفض حسيت الصوت طلع من راسي وقعت بالأرض وحطيت ايدي على اداني سيلين : لك شو هااااااااااااااااااااااااااااااادددددددددددددددد تسارعت دئات البي. .. الصوت كان متل قنبلة انفجرت جنبي .. قوي كتير وطلع صوت الصدى بكل البيت ... كنت عم ارجف بشكل رهيب ... والغرفة عتمة وصرت ابكي متل الصغار وانده على باسل سيلين : باسل .. باسسسل رجعت وانا عم ازحف لوقت لزقت بالحيط ... حطيت ضهري عليه و حاسة حالي عم اختنئ سيلين بصوت واطي : وينك .. انت هون ؟ حسيت بشي بارد كتير متل التلج على ضهري .. وبلش البرد بمتد لخاصرتي وبعدين لصدري .. زاد خوفي ... وما فهمت شو هاد الشي الي عم يسيطر على جسمي بالتدريج تطلعت وراي على الحيط ... شمت ريحة حسيت حالي رح استفرغ .. ريحة مقرفة .. ريحة كأنها ريحة دم ... حطيت ايدي على الحيط .. وكان عليه شي سائل و بارد كتير تطلعت على اصبعي .. سيلين : دم !! ... هاد دم !! بعدت عن الحيط وما عاد فهمت شو الي عم يصير ... زحفت لعند الباب .. مديت ايدي على المقبض وحاولت افتحو بس ما كان يفتح معي فجأة سمعت صوت انفاس .. في حدا غيري بالغرفة .. كتمت صوت انفاسي لأتاكد سيلين : باسل ؟ هاد انت ؟ مرق حدا جنبي .. حسيت فيه ... حسيت بحركة حدا مرق جنبي ومشي لليسار .. التفتت بسرعه وصرخت : مييييييييين في هوووووون ؟ انفتح باب الغرفة من وراي ... رجعت لورا ... كنت عم ببكي والكحلة كلها سالت تحت عيوني .. وحاسة البي رح يوقف .. شغل الضو وتطلع علي وهو مستغرب باسل : سيلين ؟؟؟ بس شفتو حطيت ايدي على تمي وصرت ابكي وارجف : باسل .. باااسل ركض لعندي و تطلع فيني وهو مصدوم : ولك شبك ؟ شو عامله بحالك ؟ تطلعت حوالي وانا خايفه .. الغرفة كانت طبيعيه .. ما فيها شي غريب .. فوراً التفتت على الحيط الي كان عليه دم واشرت عليه : هون .. هون في دم باسل: جرحتي حالك يعني ؟ رجعت اشرتلو : لااااااا هون هووووووووون لما اتطلعت منيح .. ما كان في دم .. سيلين : طلعني من هون .. طلعني من هووون ساعدني لاوقف على رجلي .. وطلعنا على الدرج .. نيمني بالتخت سيلين : غطيني غطيني برااااااادنه .. بردانه كتيررررررررر حط علي تلاتا اغطيه وضليت حاسه بالبرد .. قعد جنبي وصرت احكيلو الي صار .. باسل : بس انا ما كنت بالبيت .. انا اول ما وصلت فتحت باب الغرفة لان شفتو عم يتحرك .. كنتي عم تحاولي تفتحيه من جوا وفتحتو وفتت لعندك فوراً سيلين : بس انا سمعتك قلتلي نعم .. وصوتك كان جاي من الغرفة باسل : انتي تعبانه من الي صار معنا .. لا تعملي بحالك هيك .. المصاري بتروح وبتجي اهم شي نحنا سوا صح ؟ سيلين : اي .. اي ضليت يومين ما عم اقدر نام .. كوابيس وصوت الباب لما انطرق لسه عم يرن بادني ويصحيني بالليل مرعوبة وبتالت ليلة كمان نفس الشي .. نمت انا وباسل .. وبعد شوية وقت .. شفت كابوس انو انحبست بالغرفة والباب تسكر علي بنفس الطريقة .. وقمت مرعوبة وعرقانه .. تناولت كاسة المي من جنبي وشربتا .. تطلعت على باسل لقيتو نايم .. شفت الساعه كانت بحدود التلاته بالليل حسيت حالي رح اختنئ وبدي اتنفس .. ولما تأكدت انو باسل نايم قررت اتشجع وافتح الشباك .. شبابيك البيت كانو معتمين تماماً .. متل المرايا .. طلعت من الغرفة على روس اصابيعي .. و مشيت بالممر لوصلت لاول غرفة قريبه من الدرج وفتحتها .. وشغلت الضو وتركت الباب مردود وراي لان صار عندي فوبيا من الغرف المسكرة قربت من الشباك وبلشت حاول افتحو .. كان معلق و تقيل كتير وخفت يطلع صوت ويحس علي باسل بس ضليت حاول .. واخيراً .. انفتح معي .. ضحكت وانبسطت .. واخدت نفس .. كان برد بس نسمة الهوا بترد الروح .. سرحت بحالتي .. وبباسل الي تجوزتو لان كان كل همي مصرياتو .. وهلأ راحو مصرياتو .. وضلت عقدة الغيرة الي بسببها عازلني عن العالم .. بالبداية كنت اعملو الي بدو ياه لان يغرقني بالهدايا .. وهلأ .. لازم ارضى بالوضع الي اخترتو لحالي .. وانا عم فكر .. سمعت صوت متل عزف البيانو .. عزف حلو وعذب كتير .. تطلعت حوالي ..وتفاجئت بالشي الي شفتو كان في بيت جنبنا تماماً .. فيه غرفة مضوية و الصوت تقريباً جاي منها .. بهل وقت هاد!! اجاني فضول .. سكرت الشباك ونزلت على شباك المطبخ وفتحتو شوي لشوف .. وانبهرت بالي شفتو .. كانت صبيه .. بيضا كتيييييييييييييير وشعرها اشقر متل الدهب .. كانت لابسه تياب راقصين الباليه .. لباس زهري بقياس جسمها تماماً وشعرها قصير لحد كتفها .. والأغرب انها حامل ! .. كان بطنها كبير مبينه بالشهر السابع يمكن .. حطيت ايدي على بطني .. وتزكرت غصتي انو صرلي سنه ونص متزوجه وما حبلت سحرتني البنت بطريقة حركتها و مرونتها .. وكانت تضحك .. كانت متل لعبة الباربي حلوة كتير وعم تتحرك متل الفراشة .. قربت اكتر لاتفرج و بالغلط وقعت الكاسة الي جنبي على الارض، انكسرت و طلعلها صوت .. سيلين : ولي يبعتلي حمى تطلعت عالكاسة .. و سمعت انو الموسيقى وقفت .. رفعت راسي بخوف،، معقول سمعت الصوت!! .. ولقييت البنت واقفه على الشباك وعم تطلع علي .. ومبتسمة بطريقة غريبه .. التقو عيوني بعيونا و حسيت الزمن وقف حسيت تيار كهربا مشي بجسمي .. خفت منها ما بعرف ليش .. بس كيف شافتني وضو المطبخ مطفي ! وكأنو باسل بيقرأ افكاري .. اشتغل ضو المطبخ والتفتت وراي وانا خايفه كتيييير باسل : شو عم تعملي ؟ سيلين : بببب..بببب..ببب انا .. انا ركض لعندي وبعدني عن الشباك و فتحو كلو باسل : على مين عم تطلعي .. فاتحه الشباك يا حيوانه سيلين : مو .. مو .. انا .. انا بس باسل : ولك شو كنتي تعملي .. عم تستغفليني ؟ بتتركيني لنام و بتعملي الي بدك ياااااااه ؟ سيلين :لااا..لأا انا بس .. بس كنت اتطلعت على غرفة البنت لشوف ازا عم تتفرج علينا .. ولقيت غرفتها مطفيه ومعتمه و نئزني البي مسكني باسل من ايدي وسحبني برا المطبخ وبدو يجرني على الدرج سيلين : لا مو طالعه معك مو طالعه معك باسل : انا كم مره نبهتك من هالتصرفات ؟ كم مره التلك انا وقت تخالفي حكي بصير حيوااااااااان ؟ بصير حمااااااااااار ؟ سيلين : يا باسل كنت خايفه رجعت شفت كابوس عن هي الغرفة بس كنت بدي اتنفسسسسسسسس ابتسم ابتسامة شيطانية كأن خطرتلو فكرة : ايوه .. هيك لكن .. نزل من عالدرج وفوتني على الغرفة .. سيلين : لك بتعرفني بموت رعبه من هالغرفة بعدلي هيك خلص بطلع معك لفوق باسل : لا حبيبتي اليوم بدك تنامي هون رجعت لورا وتطلعت فيه كأني مو مستوعبه باسل : تصبحي على خير سيلين : باسل .. ما تعملها لا لا ما تعملها دفشني لورا وطلع وسكر باب الغرفه قفلو من برا .. صرت صرخ متل المجنونة سيلين : ببوس ايدك .. اخر مره ما تتركني هون ببوس اييييييييييييييدك باااسل .. بااااااااااسل اختفى صوتو وما عاد رد علي ابداً .. وطيت صوتي .. وكان بدي شغل الضو بس خفت الكهربا تضربني .. مسكت بلوزتي ولفيت ايدي فيها وكبست كبسة الكهربا ما تكهربت بس ما اشتغلت .. حاولت مره و تنتين و تلاته وما اشتغل الضو صارت ايدي ترجف و اتطلع حوالي و حاسه حدا رح يقتلني هلأ رجعت لورا .. وقعدت على الكنباية و ضميت رجلي لصدري وانا خايفه ارفع راسي .. ورجعت سمعت صوت الموسيقى الي خلاني انزل وانحبس هون حاولت غمض عيوني ... بس كنت خايفه كأني حاسة في حدا رح يغدر فيني .. حسيت حالي رح جن .. مرقو ثواني .. و رجعت سمعت صوت باب الغرفة عم ينفتح .. نطيت من مكاني وانا فرحانه سيلين : باسل ؟ كنت رح جن منيح رجعت .. انفتح الباب .. وما حدا رد علي سيلين : انا .. انا اخر مره بعمل هيك خلص بوعدك بس انت لا عاد تعمل فيني هيك .. انت ما بتعرف انا شو شفت هون انت مفكرني كنت اتوهم بس انا متأكده .. انا لما فتت لهون المره الماضيه وانا عم احكي ... بلش يظهرلي الشخص الي فتح الباب .. وانا بهي اللحظة .. حسيت السما انقلبت على الأرض ورجعت خطوتين لورا سيلين : مين انتي ؟ كانت البنت الي شفتها عم ترقص .. بنفس تيابها .. بنفس هيئتها ... بنفس ابتسامتها .. بين وشها من قلب العتمه وكانت حافيه وفي برجلها خلخال وعم تمشي باتجاهي .. رجعت لورا و حسيت جسمي عم يتقطع من جوا ... كانت حامله بايدها خصل شعر طويل و عم تحركهن يمين و شمال.. كانت تبتسم بالتدريج بعدين صارت تضحك و عيونها قلبو عيون شيطانين.... بدون سواد او حدقة عين... صرخت بكل قوتي .. كأنها اخر صرخه الي على وجه الأرض .. وبعدها رح فارق الحياة .. غبت عن الوعي .. ما عاد حسيت على شي الا وباسل عم يصحيني ويرش على وشي مي .. صحيت مفزوعه وعم صرخ سيلين : مين انتي شووووووووو بدكككككككك باسل : اهدي اهدييييييييييي حاج تضربيني تطلعت بعيون باسل وانا عم حاول جمع شو صار معي .. غرقو عيوني بالدموع : باسل باسل : ولك شو عم يصيرلك .. مسكت بكنزتو .. وحملني بين ايديه وطلعني على الغرفة .. سيلين : في حدا عايش معنا بهاد البيت .. انا متأكده باسل : بالله ؟ .. طيب معناها رح صير غار عليكي حتى جوا البيت وضحك كأنو عم يتمسخر علي نزلني عالتخت .. تجلست وقعدت وانا عم اكول اظافيري ورح جن كمان شوي باسل :سيلين .. وضعك مو عاجبني .. شوفي كيف السواد تحت عيونك وشك صاير اصفر شو قصتك ؟ سيلين بصوت واطي : انت ما عم تسدئني مو ؟ مفكرني مجنونه ؟ هز براسو ورجع تطلع فيني : قومي تحممي .. وصلت المي السخنه مشان ما تعزبي حالك بتسخين المي وقفتي على رجلي .. ورجعت وقعت قعدت على التخت .. باسل : قومي تعالي .. وقفني باسل وفوتني على الحمام .. شغل الدش وحطني تحتو .. شهقت بقوة كأني هلأ صحيت باسل : شو صرلك طفي المي ؟ سيلين : لا لا .. بس اطلاع لبرا .. باسل : متأكده بتقدري تتحممي لحالك ؟ سيلين : ايه متأكده باسل : طيب .. ازا احتجتي شي اندهيلي طلع باسل .. و وقفت انا .. وبلشت اشلح تيابي .. شغلت المي اكتر وبلش البخار يعبي التواليت .. غمضت عيوني وحاولت استرخي .. حطيت الشامبو على شعري .. وبلشت ارغيه .. سمعت صوت دعسات بالحمام سيلين : باسل اطلاع لبرا لو سمحت .. ما رد علي .. سيلين بعصبية : يعني شو هالتصرفات هي ... وفجأة بلشت حس حدا حط ايديه على راسي و صار يرغيلي الشامبو .. انا شعري اسود طويييييييل طويل كتير لآخر ظهري وناعم .. هو اغلى شي علي بحبو كتير وبهتم فيه بعناية خاصة .. الشامبو والبلسم والزيوت وحمام كريمات الو عنايه خاصه عندي .. حسيت حالي عم استرخي على المساج .. سيلين : ليش طفيت المي ؟ شغلها بدي غسل وشي .. _ _ _ كمان ما حدا رد علي .. حطيت ايدي على الحنفية لشغلها .. وضربت ايدي بايد حدا سيلين : بذمتك حاج مزح متت من البرد .. بعد ما خلصت حكيي .. ما بعرف ليش خطرلي انو ازا باسل عم يدلك شعري وانا حاسه انو عم يستخدم ايديه التنتين كيف في ايد تالته على الحنفيه ! حطيت ايدي على الحيط .. وايد تانيه حاولت المس فيها باسل سيلين : باسل ؟ فجأة كتت المي فوقي فرد مره وكانت باردة كتيييييييييير متل التلج .. وما عاد حسيت بحدا عم يغسلي شعري .. فتحت عيوني وحرقوني من الشامبو وشفت المي الي عم تنزل من جسمي كلها دم ..دم احمر كتير صرخت بس صوتي ما كان يطلع .. فكرت حالي انخرست .. حسيت حدا مسكرلي تمي .. بس ضليت حاول اصرخ .. وبآخر مره .. طلع صوتي بقوة باسل : سيليين ؟ غسلت وشي بالمي و وقعت بالأرض ركض لعندي و رمى علي منشفة كبيرة وكنت عم ارجف .. طفى المي و غطاني منيح وطلعني باسل : خلصت المي السخنه ؟ كانو سناني عم يضربو بعض . و جسمي عم يرجف مو من البرد .. من الـــخــــــــــوف تطلعت بباسل بنظرات خوف وشك .. جاب بشكير ونشفلي شعري وبلش يلفلي ياه .. وبعدين غمرني بالأغطيه .. وضليت مفتحه عيوني وعم اتطلع فيه .. وما حكيتلو شو صار معي .. لان حسيتو صار يعاملني كأني مجنونه !! تاني نهار باسل قلي انو لقي شغل ولازم يبلش يشتغل مشان نرجع نوقف على رجلينا .. انا كنت حاسة حالي مخدرة وغايبه عن الحياة ما كنت ناقشو بشي ابداً .. مرق اسبوع وانا ضل بغرفتي اتصل بأهلي احياناً .. واحياناً اقرأ كتب .. غير هيك ما كان في شي تاني اعملو لان باسل مانعني عن الحياة وعازلني عن العالم .. تاني اسبوع .. حفظت ايمت باسل بيطلع على شغلو وايمت بيرجع .. وقررت اطلع من البيت .. كنت حاسة حالي عم جن عالبطيئ والخوف عم ياكلني بين هالحيطان .. وبالفعل .. لبست وطلعت بعد ما طلع بساعه وانا عارفه شو ممكن تكون عواقب هالتصرف هاد .. بس الخوف هو الشعور الوحيد الي ممكن يخلي الإنسان يتصرف بجنون نزلت بالحارة ومشيت فيها شوي .. كانت مبينه حارة طبيعيه ... بآخر الشارع في دكانة صغيره و في حركة بسيطة .. وفي حديقه عم يلعبو فيها ولاد صغار عالطرف .. وانا عم امشي وقفت عند بيت البنت الي جنب بيتي والي شفتها بترقص بالليلة الأخيرة وقفت شوي وانا عم اتطلع على البيت وانا عم فكر .. بعدين ما بعرف كيف مشيت بأتجاه البيت .. ودقيت الباب .. وبعدين استوعبت حالي شو عملت .. ولفيت ضهري وركضت بسرعه لاهرب بس انفتح الباب .. واجا منو صوت انثوي رقيق مجهولة : اهلين .. تفضلي .. عضيت على شفافي وشديت اصابعي ببعض .. والتفتت عليها وانا خايفه كانت هي نفسها !! نفس البنت .. وكمان حامل .. ولابسه فستان اسود قصير وناعم سيلين : م..م..مرحبا مجهولة : اهلين .. بساعدك بشي؟ سيلين : انا سيلين .. جارتك الجديده مجهولة : ايووووووه .. انتي الي كنت تتفرجي علي هديك الليلة ؟ سيلين بخجل : بعتزر بس لفتي انتباهي مجهولة : حصل خير .. انا اسمي رانيا سيلين : اهلا وسهلا انا بس حبيت اعتزر على تصرفي رانيا : لا ابداً انا ما زعلت منك بس استغربت لان بعرف البيت مو مسكون ..الو فاضي تقريباً سبع سنين سيلين : معناها انتي من زمان ساكنه هون .. نحنا انتقلنا من فترة قصيرة بس رح جن هههه رانيا : ههههه شكلك متدايئة كتير .. تفضلي خلينا نحكي ونتعرف على بعض سيلين : اه ؟ لا ما فيني رانيا : ليش ؟ ترددت واتطلعت بالساعه .. كان لسه بكير على رجعت باسل .. مشيت باتجاها وكأنو في مغناطيش عم يسحبني سيلين : ماشي .. فتت لعندا .. كان بيتها منظم كتير ومرتب .. وفي دفاية حطب بالحيط حلوة كتير قعدنا جنبها وضلينا نحكي نسيت حالي واخدنا الوقت .. بعدين تزكرت الوقت وطلعت مستعجلة من عندا و طلبت منها تزورني بس قالتلي انو ما بتقدر لانها حامل رجعت على بيتي بسرعه و فهمت اني كنت اتوهم بهديك الليلة وبلشت اطبخ مشان ما يحس باسل على شي .. ولما رجع كنت ميته من الرعبه انو يعرف بس مرقت على خير .. فتت وشلت الأكل على المطبخ مشان اجلي و باسل طلع ينام .. جليت وضبيت كل شي .. وطلعت على الصالة شغلت التلفزيون وقلبت القنوات شوي .. قمت و بلشت اتمشى هون وهنيك واتفحص البيت اكتر .. حسيت ترتيب الكنب مو زابط وحبيت حركهن وغيرهن شوي .. حاولت ادفش الكنبايه وما كانت تتحرك ... حسيت انو الهن صندوق من جوا .. وصار عندي فضول افتحهن وشوف شو في بقلبهن بلشت ارفع الفرش من عليهن و رفعت اول باب خشب .. وكان فاضي .. والتاني .. وكان فاضي .. والتالت .. لقيت فيه شي غريب .. ما فهمت شو هو !! مديت ايدي .. وطلعتها ... كانو خصل شعر .. شعر دهبي وطويل كتير ... مربوطين بشريطة ساتان لونها زهر متل خصل الشعر الي شفتهن بايدين رانيا!! سيلين : هي شو جايبها لهون!! خفت ورجيها لباسل ورجعتا لمكانها ورجعت الفرش كلو وطلعت نمت جنبو .. وهيك كل يومين صرت روح زور رانيا و اتاكد انو ما حدا يشوفني من الجيران مشان ما يوصل الحكي لباسل ونحكي سوا وننبسط كتير .. رانيا : انتي كتير مهضومة يا ريتك جارتي من زمان سيلين : شكراً هاد من زوئك .. قامت رانيا من مكانها واعطتني ضهرها .. كانت لابسه فستان مفتوح الظهر لفتني انو ظهرها من النص فيه سواد بشكل بشع كتير .. متل سواد الليل .. و فيه شعر كثيف سيلين :رانيا .. ضهرك !! التفتت علي وحطت ايدها على تمها : ييي ما تهتمي .. سحبت الفستان لفوق لتغطي ضهرها ورجعت قعدت معي وانا كنت مستغربة كتير الأسبوع التالت .. جيت لعند رانيا كتير ودقيت الباب ... بس ما عاد فتحتلي الباب بنوب .. انقهرت كتير لان ما بعرف ليش هيك قاطعتني .. معقول محرجه مني لان شفت ضهرها !!! اكتئبت شوي .. وحتى باسل لاحظ علي .. اخر يوم قررت روح لعندا وضل دئ الباب لتفتحلي شو ما صار .. وبالفعل .. بعد ما طلع باسل بنص ساعه طلعت .. و وقفت على الباب وضليت دئ وما حدا يفتحلي .. سحبت حالي ورحت على الدكانة الي بآخر الحارة .. وكان فيها رجال كبير سيلين : مرحبا يا عم - اهلين بنتي سيلين : بدي اسالك ..انا الي سكنت من شهر بالبيت القديم .. - ايه عرفتك سيلين : جارتي رانيا .. الي جنب بيتي .. بينت عليك شي ؟ مشغول بالي عليها - مين رانيا ما عرفتا ؟ سيلين : هديك الي بيتها جنب بيتنا بالضبط قام وتطلع فيني وهو مستغرب - ما فهمت عليكي .. وين قصدك سيلين : تعال معي مشي معي وحط ولد يقعد مكانو .. وبس وصلنا كان نفسي مقطوع من المشي ... سيلين : هاد البيت يا عم - ههههه شو جايه تجدبيا علي ؟ .. هاد البيت ما حدا ساكن فيه .. الو عشر سنين مهجور .. سيلين : لا فيه صبيه وحامل كمان هي رفيقتي اصلاً انا بعرفها منيح - عمي انا الي عمر بهي الحارة .. هاد البيت كان ساكن فيه واحد ومرتو .. وكانت كل ما تحبل مرتو بعد فترة يموت الولد ببطنها .. وما حدا يعرف ليش .. 10 مرااااااااات !! بعدين زوجها اخدها وراحو من هون وما حدا بيعرف عنهن شي سيلين : هههه كيف يعني ؟ مستحيل .. تركتو عم يضحك علي .. ومشيت باتجاه بيتي ورجلي عم يضربو ببعض .. مشيت بسرعه فتحت الباب وفتت قفلتو منيح كتير وكنت عم حرك عيوني بحركة دائرية بانحاء البيت كلو .. كأني حاسة رانيا هلأ رح تطلع .. اكيد متخبيه هون .. انشدت اعصابي وكنت عرقانه كتير مع انو الجو برد .. مشيت بخطوات خايفه ومتردده .. حطيت رجلي على الدرج .. وانا كاتمه انفاسي مشان اقدر اسمع صوت اي حركة حوالي . .. وصلت تالت درجة .. وسمعت صوت شي وقع بالصالون .. نقزت وحطيت ايدي على البي .. واتطلعت على باب الصالة الي كان مفتوح .. تطلعت لفوق عالطابق التاني وكنت محتارة ! اهرب لفوق ؟ وبلكي كانت ناطرتني هنيك !! نزلت .. و وقفت على باب الصالة .. تطلعت يمين وشمال بحذر .. وشفت اللوحة على الأرض ... اللوحة الي اول ما وصلت وقعت مرتين ورفعتها .. تسارعت انفاسي كنت عم اخود النفس بصعوبة كبيره ومشيت و حملتها من الأرض .. كانت لوحة مرسوم عليها منظر طبيعي .. شجر و نهر ما فيها اي شي غريب .. قلبتها على ظهرها ... تفحصتها منيح .. تلمستها شوي شوي .. و لاحظت شي غريب على زاويتها مكتوب تاريخ قديم ... قبل 8 سنين بالضبط .. وفي حرفين مشبوكين ببعض حرف r كان واضح والحرف التاني ما فهمتو .. علقتها مكانها .. ورجعت خطوتين لورا وانا عم اطلع عليها لاتاكد انها ثبتت مكانها .. اخدت نفس عميق ومسحت عرقي .. لفيت وشي .. وفوراً سمعت صوت شي وقع على الأرض .. سيلين : مستحيل .. لا مستحيل .. رجعت التفتت .. بس اللوحة ما كانت واقعه .. كانت مختفيه تماماً .. مو موجوده اصلاً .. ركضت على الحيط حطيت ايدي عليه .. تطلعت عالأرض بكل مكان بكل زوايه .. ركضت باتجاه الباب بسرعه مشان اطلع واول ما وصلت على عتبة الباب .. ( تسكر الباب بشي بقوة ) كان ممكن يكسرلي انفي لو كان في اي غلط بالتوقيت .. على بعد ثانيه وحده كان ممكن يضرب بوشي .. غمضت عيوني ... وقعدت بالأرض .. كنت خايفه قرب من الحيطان .. قعدت بنص الغرفة .. وضليت اتطلع حوالي وما طلعت اي صوت .. كنت ناطره باسل يجي وينقذني من هالرعب الي عم عيشو .. ما بعرف كم الوقت .. الثانيه كانت تمر سنه .. كنت عم اتزكر كل شي عم ييصير معي .. ملامح رانيا وكيف كانت تتصرف وكيف كانت تحكي .. معقول ما كانت موجوده ! مين كان يفتحلي الباب .. مع مين كنت احكي انا !! معقول انا عم جن ؟ معقول صار لعقلي شي ؟ وانا عم اتزكر ملامح رانيا تزكرت شعرها الدهبي القصير .. سيلين : معقووووووووووول !!!!! قمت بسرعه على الكنبه الي لقيت فيها خصلة شعر دهبي و فتحتا .. هاد اكيد شعر رانيا ... هاد الها ما لقيتو .. يمكن انا مخربطة مو هي بالتانيه .. ما لقيتو .. معناها بالتالته .. ما لقيتو !! اختفى !! اختفى !!! ركضت على الشباك وصرت اضربو بايدي التنتين واصرخ : حدا ساااااااامعنيييييييييييييي طالعونييييييييييييي انا خاييييييييييييييفه لك طالعوني من هوووووووون بكفي بكفييي عكست صورتي على بلور الشباك .. كان شكلي متل المريضين نفسياً .. شعري مخربط .. وشي بخوف من التعب والأرهاق وهالات سودا حوالين عيوني .. رجعت لورا وانا عم ابكي : هي مو انا .. هي مو انا .. انفتح باب الغرفة .. تطلعت فوراً : باسل ؟ رجعتتتتتت باسل ؟ ركضت للباب وفتحتو وطلعت .. وقفت بالنص وصرت اتطلع حوالي واحكي بصوت عالي : مين في هون ؟ مجرد اني سألت .. سمعت صوت باب انطرق بقوة .. الصوت كان جاي من فوق صرخت بصوت اعلى : انتو فوق ؟ ... مين انتوو ؟شو بدكن مني ؟ رجعت سمعت صوت باب عم ينضرب بقوة مره تانيه .. طلعت عالدرج وانا عم حاول شوف شو عم يصير فوق .. ومجرد ما وصلت .. كان الممر الطويل قدام عيوني .. والتلات ابواب عم ينفتحو على الترتيب .. كل باب ينفتح ويتسكر والي بعدو يتسكر والي بعدو يتسكر .. يرجع الأول ينفتح والتاني ينفتح والتالت ينفتح باب غرفتي كان مسكر متل ما هو .. حسيت شي مر كتير بحلقي ... كاني عم اشرب علقم .. حطيت ايدي على دربزين الدرج وبدي انزل لتحت لبسرعه .. وبس التفتت ... شفت عيون لونهن احمر كبار كتير .. كانو عم يتطلعو بعيوني مباشرة .. مخلوق اشبه بالمسخ .. ما شافت البشريه شي ببشاعتو غمضت عيوني بهدوء .. ورجعت فتحتهن ... ووقعت من اول الدرج .. لآخرو ... _________________________________ باسل : سيلين .. سيلين .. حاولي تصحي .. فتحت عيوني وكنت عم شوف خيال باسل بس مو قادرة اسمعو شو عم يحكي باسل : اسمعي .. بكفي لهون ... انتي عم تعملي كل هاد الشي مشان نترك البيت ونلاقي غيرو انا مليت .. مليت انو اعمل حالي مو فهمان عليكي .. هي الحركات صار لازم تحطيلها حد بتعرفي ليش؟ .. لأنو انا طلاق ما رح طلقك .. لو بتموتي وبيت تاني ما عندي هلأ .. بدك تعيشي معي بهاد البيت وتعفني هون سواء قبلتي او رفضتي حاولت احكي بصعوبة وكان تمي ناشف كتير : انا شفتو باسل : شفتي ؟ شفتي مين وليه ؟ مين الي شفتيه احكييييييي سيلين : الشبح .. الشبح الي هون .. شفتو .. ابتسمت كأني استسلمت تماماً .. وتقبلت واقع الأمر انو في أرواح عايشه معي بهاد البيت .. وبدهن يقتلوني .. كان جسمي كلو رضوض .. وجبيني عليه ضربة قوية وزرقا كتير .. قمت و جاب باسل كمادات تلج .. قعدنا بالصالة و حطيتهن على جبيني وما كنت قادرة اتحرك او احكي شي .. باسل : وبعدين ؟ لوين بدك توصلي؟ تجاهلت حكيو لان ما كان عندي طاقة لاحكي .. تطلعت حوالي .. واجت عين على مكان اللوحة .. كانت بمكانها !! سيلين : باسل .. هي اللوحه .. شيلها من هون .. ارميها باسل : بالله ؟ فاضيه لحالك انتي ... سيلين : انا مو قادرة امشي لا تخليني قوم وارميها بكفيني الي فيني باسل : طيب .. طيب .. قام واخدها وطلع فيها على المطبخ .. وقبل ما يرجع انقطعت الكهربا .. وقعت التلجه من ايدي وصرخت بخوف بااسل ؟؟ .. باااااااسل باسل : اي اي جاي بس سمعت صوتو ارتحت كتير ورجعت راسي لورا وانا عم اتنفس باضطراب .. باسل : يا عيني هاد الي كان ناقص .. انقطعت الكهربا سيلين : ما عندنا شي لتضوي فيه؟ما في شموع ؟ باسل : طالع على الدكان الي براس الحارة جيب شموع وارجع سيلين:لا لا ما في طلعه الله يخليك باسل : لك يمكن تطول بروح عالسريع وبرجع سيلين : بس انا باسل : خلص تتصررفي متل الصغار .. ثواني وبرجع سيلين : يا باسل ... بااااسل ... لك وين رحت طلع وسمعت صوت الباب عم يتسكر وراه .. سيلين : ليش رحت .. لا تروح .. لا ترووح لحسن حظي انو باسل ما تأخر .. كانت دقايق طويله بس رجع قبل ما يصرلي شي .. سمعت صوت الباب انفتح سيلين : انت رجعت ؟ منيح ما تأخرت باسل : اي جيت .. سيلين : جبت شموع ؟ باسل: استني جايكي... سيلين: طيب كنت قاعدة و انا متوترة لما بلشت شوف ضو الشمعة جايه من المطبخ سيلين: منيح لقيت عندو شموع لان دكانتو فاضيه... باسل من بعيد: اي بعد ما شاف وشك الحلو قرر يوسع المحل لعيونك... وقفت من مكاني و عضيت على شفافي بخوف و فهمت انو البياع حكي لباسل عني انو شافني الصبح بالحارة سيلين: حبيبي انا... انا... وصل للغرفة و كانت الشمعه بين ايديه و لهبها عاكس على وشو سيلين: كنت بدي ئلك... قرب مني و حط الشمعه عالطاولة و ابتسم: تعي لحضني سيلين: لا تضربني سامحني باسل: له!! ليش انا ايمت ضربتك!!! انتي بس تعي... حط ايدو على خصري و سحبني بقوة... اختلطت انفاسي بانفاسو و الخوف سيطر علي سيلين: انا كنت باسل: هسسسسس حط ايدو على شفافي و شدني اكتر... غمضت عيوني..... و رح اختنئ بين ايديه.... مرقو ثواني مافي و لا صوت... باسل: جاهزة؟ فتحت عيوني سيلين: لشو باسل: غمضي عيونك لتعرفي صرخت بس شفت شي وقع عالارض… حسيت باسل شو عمل بس حاولت كزب حالي… كان عتمة… نزلت عالارض… مسكت خصل شعري بين ايدي وانا عم ابكي سيلين: ليش هيك عملت رمى المقص من ايدو: مشان ما ترجعي تكسري كلمتي… قعد قدامي و حط رجل على رجل… و انا عم حط ايدي على شعري و بتخيل كيف صار منظري هلأ!! قص باسل شعري كلو… صار طولو لعند ادني و بس!! اجت الكهربا و بس شفت شعري كيف بالارض زادو دموعي سيلين: ريتها ايدك تنكسر يا كلبببب يا كلب يا كلب نزل باسل عالارض و تطلع فيني بطريقه غريبه: شو صار! شو صار… كيف هيك صار سيلين: كيف عملت هيييك باسل: انا!!!... انا عملت هيك!! حط ايديه على وشي… تطلعت بعيونو و لقيتو عم يبكي سيلين: بعددددد عني بعد عنيييي قمت من الارض و ركضت طلعت عالدرج فتت على غرفتي و سكرت الباب… رميت حالي عالتخت و صرت ابكي… صار الوقت بحدود 10 بالليل و صوت المطر واصل لعندي كنت غامرة وشي بالمخدة و عم ابكي… وقت بلشت حس في شي غريب كنت عم ابكي بصوت عالي بس في صوت حدا تاني عم يبكي معي رفعت راسي مسحت دموعي… و تطلعت وراي… شفت بنت قاعده بالزاوية مخبيه وشها بين ايديها بالزاويه و عم تبكي حسيت لساني انبلع… صار جسمي يرجف…. هي رانيا… رانيا!! … سحبت الغطا على حالي و عضيت عليه و انا عم ابكي وهي كمان تبكي… خبيت وشي بالغطا و كنت انتفض… بلش شي يتحرك على جسمي… تحت… من عند رجلي… فتحت عيوني و انا تحت الشرشف… و شفت ايد سودا و اظافيرا طوال كتير عم تنمد على جسمي شوي شوي… سيلين: لاااااااااا لااااااااااا سحبت رجلي و رميت الغطا… نزلت من على تختي و لزقت بالحيط… كانت منزله وشها باتجاه الارض و عم تقطر دم عالتخت… سيلين: اتركيني… اتركيني اتركيييييينيييييييييي ما قدرت شوف المنظر… سكرت عيوني… و سمعت صوت الباب انفتح باسل: شبك!!! فتحت عيوني و ما لقيت حدا بالغرفه… قعدت عالتخت و انا منهارة… مافي دم… مافي حدا… ما في شي… ما في شي… قرب باسل و قعد عند رجلي: اسف… انا ما كنت بوعيي… انا كتير بحبو لشعرك… اصلا انا بحب الشعر الطويل كتير… لا تبكي لا تبكي سيلين: خلينا نطلع من البيت هاد… انا رح موت باسل: طيب… خلص… نروح على المانيا؟ لعند اهلي؟ سيلين: خدني على جهنم الحمرا بس طلعنييييي من هوووون طلعني من هوووون… ضليت ابكي بحضنو و هو يراضيني لوقت ما تعبت و نمت… الساعه 2 بالليل صحيت عطشانه… مسكت كاسة المي جنبي لقيتها فاضيه قمت طلعت من الغرفه و نزلت عالمطبخ… كان لسه المطر عم ينزل… تناولت كاسه فاضيه من الرف الي فوق و فتحت الحنفيه مشان عبي مي… حطيتها بتمي و عم اشرب… كان فوق الحنفيه في شباك و كمان مظلل و عاكس متل المرايه… تطلعت فيه و عم اتفرج على حالي… لمحت شي مرق بسرعه من وراي… كان اسود كتير و سريع شهقت بقوة و التفتت وراي بسرعه ما شفت شي… حطيت الكاسة من ايدي و رجعت التفتت وراي… و اول ما تطلعت بالبلور…. شفت وحدة واقفه وراي… ما الها عيون… و لا تم…. مشوهة… سيلين: رانيا؟ بس نطقت اسمها وقع كاس من الرف و انكسر… حطيت ايدي على اداني و صرخت: ليش عم تعملي هييييك و صارو الكاسات كلهن يوقعو وحده ورا التانيه…ركضت طلعت من المطبخ و رجلي تجرحو و صارو ينزفو دم لقيني باسل اول الدرج و رميت حالي عليه… هديك الليله سدئني انو ما عم مثل عليه…. وعدني يومين و يطلعني من البيت… و ما كان عندي اي فكرة كيف رح يمرقو هدول اليومين… الصبح ودعتو و سكرت الباب وراه… و بعد 10 دقايق فوراً طلعت من البيت و رحت لعند صاحب الدكان ما غيرو بصعوبة قدرت اوصل لان رجلي كانو يوجعوني و بس شافني تطلع فيني بطريقه غريبه، كان مصدوم بمنظري بعد ما انقص شعري و هيئتي تعبانه… سحب كرسي و قعدني عليه سيلين: اول شي ازا بتحكي لجوزي انك رجعت شفتني رح يدبحني # طيب اهدي رح جيبلك مي مسكتو من ايدو: مابدي مي… بدي اعرف شو عم يصير # كيف يعني يا بنتي؟ شو عم يصير معك؟ سيلين: بيتنا… الي نحنا هلأ ساكنين فيه… مين كان عايش فيه؟ # على ما اذكر رجال و مرتو… بس ما حدا كان يشوفن… بعدين انا من سنه بس قعدت بهي الدكان….ابني كان يقعد فيا بس سافر سيلين: طيب ما كان يئلك شي عنهن؟ ما كنتو تعرفو اي شي عنهن؟ # لا والله يا بنتي ما كانو يحكو مع حدا… عاشو هون خمس سنين و فجأة عرفنا انهن سافروا… الرجال هيك اجا و قال بابني… قال بدو يسافر هو و مرتو… بس لحظة تزكرت شغله سيلين: شو احكيلي؟ # في وحده من نسوان الحارة حشرية كتير… و راحت زارتها لصاحبة البيت و بس طلعت قالت لنسوان الحارة انو هالبنت حورية… جمالها فظيع و حامل و ما بتقدر تطلع لان جوزها بيغار عليها كتير… بعدين رجعت اكتر من مره لتزورها و ما عاد فتحتلها الباب سيلين: بيغار؟! … قمت من مكاني و هو عم يحكي معي بس تركتو وراي و ضليت ماشيه على بيتي و تفكيري بالحكي الي سمعتو.. وصلت عالبيت و حاسه راسي رح ينفجر… قعدت على الدرج و حطيت ايدي على راسي و انا عم فكر… قمت عالصالون.. و لقيت باسل جامعلي شعري الي قصو و رابطو بشريطة ساتان… متل ما كانت خصلة شعر رانيا مربوطة… تركتها مكانها و رحت باتجاه اللوحة… نزلتها و قلبتها على ظهرها… و رجعت حاول اقرا الحرف التاني المشبوك مع حرف الr. . قعدت و حطيتها بحضني… و ضليت عم اتمعن فيها… سيلين: B… هاد حرف b… حطيت اللوحة عالطاولة… كنت بدي اطلع على غرفتي… بس سمعت صوت جاي من المضافه… رجعت خطوتين لورا… وفتحت الباب… و انصدمت بالمنظر الي شفتو!! الكنب كلو و السجاد مكوم فوق بعضو و محطوط بالزاوية!! كييييف طيب!!! نحنا وقت نظفنا ما قدرنا نحرك قطع الكنب لانو من خشب تقيل…. تطلعت يمين و شمال… فتت و انا مترددة و انا عم امشي حسيت رجلي ضربت بشي… نزلت عيوني عالارض و انا خايفه… لقيت شي متل مقبض الباب. … كأنو باب صغير كان تحت قطعة الكنب الكبيرة… قعدت عالارض و نقرت باصبعي نقرات خفيفه و من صوت الصدا تأكدت انو هاد باب قبو… مسكتو و حاولت ارفعو ما انرفع معي كان تقيل كتير… قمت ركضت على المطبخ تناولت سكينة لحاول افتحو فيها و رجعت بسرعه… و لقيتو مفتوح لحالو… فجأة انقطعت الكهربا عن البيت… خفت كتير و صرت التفت حوالي و انا ماسكه السكين بايدي.. و سمعت صوت دعسات حدا على الدرج…. كان صوت الدعسات نازل من فوق و عم يقرب باتجاهي صرخت بصوت عالي سيلين: رانيا؟ انتي هون؟ اختفى الصوت… حطيت ايدي على الحيط و حاولت اوصل لمكان الشموع… شغلت شمعه و شفت الطريق قدامي… وصلت لباب القبو… و كان في سلم… حطيت رجلي و بلشت انزل شوي شوي.. و نفسي عم يديئ اكتر… لوقت ما حسيت انو رجلي وصلت على الارض… كنت خايفه الشمعه تنطفي.. داريتها بين ايدي… مشيت شوي و كنت رح اوقع لان في غراض بالارض بس سندت حالي عالحيط فوراً… سيلين: العمى شو في هون… قربت الشمعه من الارض.. كان في اغراض عليهن شرشف ابيض قعدت عالارض… و رفعتو و انتفضت الغبرة بوشي و صرت اسعل… فتلت وشي شوي و سحبتو كامل…. ورجعت لشوف شو في تحتو…الريحة بشعه بشكل لا يوصف كانو كراكيب ستاتي… تياب مهترية و احذيه و اكسسوارات بعدتهن عن بعض و كان في لوحة كبيرة كتير و مغطاة بالغبرة سيلين: شو هي كمان… سحبتا و مسحتا بالشرشف من جهة… و نشف الدم بعروقي وقت شفت رانيا!!!! …. صورة رانيا بالفستان الابيض!!! كان شعرا طويل… و في ايد حدا ملفوفه على خصرها ما عاد قدرت استحكم بالشمعه و صرت ارجف… مسحت الغبرا من الجهة التانيه…. وشفت الشخص التاني الي بالصورة… شفت الحدا الي جنبها… شفتو بالصورة…. و سمعت صوتو وراي باسل: انتي شو نزلك لهون؟ صرخت و التفتت وراي… وقعت الشمعه عالارض و انطفت و صار المكان عتمه باسل: اطلعي لهون سيلين: - - - باسل: عم قلك اطلعي بلا ما انا انزل لعندك سيلين: م...م….م… نزل باسل عرفت من صوت حركتو… كانت السكين بعدا معي مابعرف ليش نزلتها معي.. سيلين: لا تقرب علي باسل: انا غلطان جبتك على هاد البيت بس ما كان عندي خيار تاني ما توقعتك رح تعملي كل هالمشاكل سيلين: شو عملت فيها؟ باسل: شو رأيك ما نحكي؟ خليني ورجيكي بعيونك… هي تحدت غيرتي انتي عاقله اكتر منها بس مشكلتك هي فضولك ومسكني من تيابي بقوة صرخت عليه و قلتلو يتركني بس ما تركني ما تركنيييييي… ما تركني لوقت ما غرزت السكينة بصدرو…. حطيتها بصدرو بكل قوتي و ركضت من بين ايديه وهو عم يصرخ و يتوجع طلعت عالسلم و انا عم ابكي و عيط بصوت عالي،،، طلعت لفوق و سكرت الباب عليه…. و على طلعتي وقفت وبدي اطلع من الغرفه… و لقيتا واقفه على الباب!! كانت عم تضحك…. كانت حلوة!! كان شعرا طويل!!! سيلين : رانيا؟؟ مديتلها ايدي و قربت لعندا… ما كنت خايفه منا… لو هي روح بس البشر اوقات بخوفو اكتر من الاشباح… بس قربت لعندا اكتر… اجت الكهربا… و اختفت من مكانها صرخت بصوت عالي سيلين: ارجعيييييييييييي…. و بذات الوقت سمعت صوت حركة باسل بالقبو تحت… مسحت دموعي و ركضت على باب البيت لقيتو مفتوح طلعت و انا عم اركض و صرخ… صرخت بالشوارع بكل صوتي… صرخت باسم رانيا صرخت باسمي… صرخت كرمال يساعدني اي حدا!!! و وعيت على حالي بمركز الشرطى… الضابط عم يحاول يخليني قول الي قلتو للناس بالشوارع….بس ما كنت قادرة احكي لان عيون رانيا عم تلاحقني بكل زاوية… الضابط: لو سمحتي… تعاوني معنا سيلين: هو قتلها… ما… ما بعرف ليش سدئني… بس قتلها انا متاكده… طلعو سيارتين شرطى على بيتي… و نزلو فتشو القبو و اهلي اجو لعندي و انا عم ابكي ضميتهن و تخبيت بحضن ابي و هو عم يقول ( قلتلك ماااا تتجوزيه… قلتلك مبين ابن حرااااام… عميتك المصاري يا بنتيييييي عميتك المصاري) ما كان عندي قوة لأحكي.. ضلينا بمركز الشرطى مشان سلامتنا ليمسكو باسل… و اول ما رجع الضابط ركضت لعندو سيلين: شو صااار!!! الضابط: لقينا عظام…. بالقبو تحت… ورا الاغراض القديمة باكياس قماش في عظام بني ادم… سيلين: رانياااا!!! رانياااا!!! الضابط: ممكن، بس لسه ما تاكدنا .. ناطرين نتاكد… وقف ابي و سالو عن باسل و انا رجعت قعدت مطرحي لما سمعتو قال ( ما لقيناه…. ما كان موجود بالقبو) رفعت راسي: كيف يعني؟! الضابط: للاسف… هرب… صرت صرخ متل المجنونه و اسالهن كيف يعني هرب!!! لك شو يعني هرب شووووو يعنننيييي!!! وعدونا يأمنونا بحماية لوقت ما يلتقى هالمجرم… و كانو عم يجمعو الادلة…. تبين انو باسل من لما سافر على المانيا اختفت رانيا و قال لاهلها انو هي معو بالمانيا و مانعا تحكي معهن… وسطو كتير ناس لاهلو…. اهلو الي كانو يعرفو بجريمتو و يغطو عليه… و لما رجع وقف على رجليه رجع لهون… طلعنا بسيارة ابي… كنت قاعدة و حاطه ايدي على خدي و عم اتطلع من الشباك… و الكل ساكتين و عتمه كتير… غمضت عيوني و نمت من التعب…. ثواني بسيطة شفت فيهن رانيا… كانت حلوة كتير و قاعده عم تغني و تلعب بشعرها الطويل… و انا عم اتفرج عليها من بعيد… كانت متل الطفله فتحت عيوني…. ابتسمت و رجعت اتفرج على الطريق من الشباك مرقت سيارة جنبنا و كانت الشبابيك سودا و مظللة… اتطلعت بالسيارة و عيوني دبلانين و تعبانه كتير… وصلنا على بيت اهلي الي كان شقه صغيرة بالطابق التاني ببناية مهترية بس بالنسبه الي هلا هو جنة فتت على غرفتي القديمة و فتحت خزانتي طلعت منها قميص نوم قطني مريح، فتت تحممت و ارتاح جسمي باستني امي و قالتلي ما خاف يمكن بعد الي شفتو و صار معي بعمري ما عاد خاف،، تممدت على فرشتي و حاولت نام بس ما قدرت ابدا كان النوم طاير من عيوني... قمت وقفت عالشباك و فتحتو مشان شم شوية هوا... تطلعت بالسما و القمر كان بدر نكتمل و كتير حلو ابتسمت و نزلت عيوني عالارض... كان في عمود كهربا عطلان عم يضوي و يطفي... و جنبو واقف شب و مغطي راسو استغربت شو واقف عم يعمل بهاد الوقت يالشارع ضليت عم اتطلع فيه و فجأة رفع ايدو و نزل الطاقيه عن راسو و رفع وشو لعندي و ابتسم ابتسامة شيطانية . سيلين: ب...ب...باسل!!! سكرت الشباك وركضت لعند ابي وانا عم اصرخ .. كانو بعدن قاعدين بالصالون هو وامي وعم يحكو لما فتت عليهن وانا عم ابكي سيلين : باسل .. باسل تحت .. باسل تحت ركضت امي عالباب وقفلتو منيح وابي حكي مع الشرطى .. بس انو شرطى !! شرطى وصلت بعد ربع ساعه اكيد ما رح يكون بعدو ناطر تحت فتشو الحارة كلها وما لقولو اثر وما حدا شافو غيري .. وعدونا يدورو عليه وعممو اسمو على المطارات والحدود لانو متهم بجريمة قتل والأدلة كلها بتقول انو باسل قتل رانيا .. كنت عايشه مع مجرم او يمكن كنت عايشه مع روح .. لان مرقو شهرين شهرين كاملين .. وين ما انزل من البيت كنت شوف باسل .. بالسرفيس بالأسواق بالحدائق لوقت ما حبست حالي بالبيت وقررت ما اطلع منو ابداً .. كنت انا واهلي عايشين بحالة رعب .. وقت برا الوقت ومكان ما الو عنوان ولا ملامح .. كل مره كنت شوفو فيها كنت بلغ الشرطى ويجو بكل برود وبكل رواق بعد وقت طويل وما يلاقوه .. اخر مره طلعت بالسرفيس وقعدت جنب شب كان وشو للشباك .. حاسبت الشوفير وطلعت جوالي بدي احكي مع امي .. بس شميت ريحة عطر باسل هاد العطر عطول بيستخدمو وما بيغيرو ابداً .. نزلت الموبايل من ايدي والتفتت على الشب الي جنبي .. وعرفت انو باسل بس ما اتطلع فيني ابداً .. كان عم يضحك عم يتلذذ وهو شايفني عم موت ودوب قدام عيونو .. حاولت بهدوء ابعت رسالة لأمي مشان تخبر الشرطى وكتبتلها الي بقدر عليه وبعد عشر دقايق سمعنا صوت سيارات الشرطى ورانا .. ابتسمت وتطلعت فيه بشماته .. اشر لصاحب الميكرو وقلو ينزلو دفشني و صار يعيط وهددو ازا ما بوقف يعمل مشكلة .. وقف الميكرو ونزل باسل و وقف عند الشباك واشرلي باييدو وقلي ( سلام ) ومن نهارها ما عاد طلعت من البيت مرقو تلات شهور وانا ما عم شوف البشر ولا حدا عم يشوفني .. ابي مرض وكانت امي تنزل تجيب اغراضنا وحاجياتنا .. وبيوم من الأيام تأخرت كتير انشغل بالنا عليها ... ولما رجعت بعد ساعات طويله كانت عم تبكي .. كان ضاربها .. نطرها لوصلت لشارع مقطوع فاضي من العالم وضربها الندل ما عاد تحملت ... كل شي رعب عشتو مع رانيا كان اهون .. ما عم استوعب كيف ممكن خاف من بني ادم اكتر ما خاف من روح !! لبست تيابي ونزلت من البيت وامي عم تترجاني ارجع بس حسيت حالي اكتفيت .. خليه يقتلني . ايه ايه .. بدي يقتلني بدي ارتاح بدي ارتاااااااااااااااح نزلت بالشارع .. بشعري القصير .. بوشي التعبان ... بألبي الي مات وشبع وجع .. واول نزلتي لقيتو بوشي بالشارع قدام باب البناية .. مشيت باتجاهو وانا مبتسمة مع ان البي كان عم يرجف ورح يطلع من محلو رفع ايدي وصفقلي : برافووووووو برافو .. اخيراً ما هربتي مني سيلين : بطلعلي نجمة كمان .. لان ما خبرت الشرطى وقفنا شوي وكان عم يضحك ويتطلع حواليه كأنو عم يتأكد انو الشرطى مو هون سيلين : ليش ضربت امي ؟ باسل : وبدي اضربك .. بدي ادبحك .. اشرب من دمك يا خاينة كانو دموعي رح ينزلو .. فتلت وشي عالجهة التانيه : خلينا نروح على البيت باسل : بهل بساطة ؟ سيلين : ايه .. منتفاهم هنيك .. كان حالق شعرو وحالق دقنو و وشو ضعفان كتير .. مشي ومشيت وراه وما كنت عرفانه حالي وين رايحه ولا شو عم بعمل .. كانت حارة قريبه من حارتنا .. مشينا بطرقات كتيره و وصلنا على عمارة عالية كتيرررر وتعبانه .. مبينه عشوائية وتعيسه باسل : شو ليش وقفتي ؟ مو من مقامك تفوتي هيك مكان ؟ تجاهلتو وفتت قدامو .. كان جوا عتمه ورطوبة كتير باسل : ضلك طالعه .. الطابق السادس .. طلعنا لفوق وفتحلي باب البيت وفات .. كان بيت كبير يمكن ست غرف كلهن فاضيين تماماً فيها شبابيك كتير وكلهن بدون ستاير مسكني من ايدي وسحبني على الغرفة الي بالنص ... كان فيها تخت وخزانة .. سيلين : باسل بيك عايش هون ؟ باسل : بسببك صرخت فيه بعد ما عرفت انو خلص نهايتي متل رانيا ويمكن اسوء سيلين : مو بسببي مو بسببي انت قاتل انت قتلتها هجم علي ومسكني من شعري وانا عم صرخ : هي كانت بدا تخوني بدا تخووووووني .. انا ما كنت بدي اقتلها ما كنت بدي اقتلها .. كنت ناطرين ابنا يجي .. كل ما كانت تحمل كانت تنزل الولد .. قتلتلي ولادي كلهن كلهن وكانت بدها تقتل اخر ولد لهيك حبستها بالقبو .. حبستها هنيك مشان احميها .. مشان ما حدا يشوفها .. لأنها الي لحالي وانتي الي لحالي كمان سيلين : وبدك تقتلني كمان ؟ باسل : لأ .. هي تمردت .. كان بدها تطلع .. وتشوف الناس وتحكي مع الرجال .. كان بدها اسمحلها تبتسملهن وتضحكلن وتحكي معن وقتا .. هجمت عليها .. وضربتا .. ضربتا ضربتا ضربتااااااااااا وانا عم اتخيل انها عم تحكي رجال غيري .. كانت تصرخ كتير كانت تقلي بكفي ما عاد بدي روح لمكان ...بس ما حسيت على شي ما حسيت الا لما اختفى صوتها .. لما ماتت .. ماتت .. وخلص !! سيلين : حرام عليك ... حرام عليك الي عملتو .. رانيا لهلأ موجوده .. روحها عم تتعذب ... رفع عيونو فيني : بكفي وليه .. بكفي سيلين : ما عم اكزب .. قلك شو .. انا شفتا .. وحكيت معا .. وبعرفا منيح .. هي شقرا .. شعرا اشقر طويل بس انت قصيتلها ياه متل ما قصيت شعري و عيونا لونن اخضر و واسعين كتير .. و وشها ابييييييييييييييض وحلو انسحب لونو لباسل وصار بتأتأ : اي انتي شفتي صورتها سيلين : لا انا شفتها هي .. انا شفتااااااااا هي كانت عايشه بهداك البيت .. روحها موجوده لهلأ باسل : اخرسي .. بلش يفك بكلات قميصو .. سيلين : شو عم تعمل ابتسم بخبث .. وصار يقرب مني .. كان مكان السكينة الي ضربتا فيه مضمد بشاش .. من جهة اليمين .. ياريتني طعنتو ياها باليسار كنت حاسه حالي رح جن وهو عم يقرب مني اكتر .. حط ايدو على كتفي .. وشي لمع براسي بسرعه سيلين : رانيا في بضهرها وحمى سودا .. وفيها شعر .. بنص ضهرها .. بنص ضهرهااااااا .. انا شفتااااااااااااااااااااااااا نزل ايدو عني ورجع لورا وبلش يتعرق وعيونو صارو متل الجمر باسل : شو عرفك؟ سيلين : قلتلك انو شفتا .. قلتلك انو شفتاااااااااااا فات بنوبة خوف .. شميت الخوف فيه .. شفتو خايف .. كان عم يرجف سيلين : حتى هي معنا هون .. و رح تاخود روحك .. رانيا هون بس خلصت كلمتي .. سمعنا صوت شي قوي وقع برا .. متل صوت ضرب على الأبواب .. ابواب البيت صارو يطلعو صوت قوي باسل : رانيا ؟ انا خفت اكتر منو بهديك اللحظة لان كنت مفكرة حالي عم اكزب .. كنت مفكرة انو رانيا اختفت .. تركني وطلع من الغرفة .. بس شفت حالي لحالي خفت .. خفت وبدي اطلع وراه من الغرفة وانطرئ الباب وتسكر علي .. وضليت بالغرفة لحالي .. خبطت على الباب بقوة وحاولت افتحو .. حاولت كتير ندهت لباسل وترجيتو يطلعني وما يتركني لحالي ... وبعدا سمعت صوتو .. كان عم يصرخ باسم رانيا كان يصرخ بصوت عالي ... حسيت البيت رح يوقع فوق راسنا من اصوات ضرب الأبواب برا ..وصوت باسل عم يعيط ويصرخ وما كنت فهمانه شي.. قعدت بالأرض وحطيت ايدي على اداني وانا عم ابكي .. ودقايق بسيطة والأصوات كلها اختفت .. كل الأصوات .. حتى صوت باسل .. حطيت ايدي على الباب وهمست : باسل افتحلي الباب رح موت وبعدا سمعت صوت العالم عم يحاولو يكسرو باب الشقه .. كان صوت ناس كتيرين برا .. سمعت صوت باب البيت انكسر وفاتو لجوا .. وصرت صرخ وقلهن يفتحولي الباب .. كسرو باب الغرفة وطلعوني وانا عم ابكي وارجف .. - دورو بالبيت .. اتصلو بالشرطى .. اتصلو بالأسعاف ما كنت فهمانه شي لوقت ما العالم تجمعو عند الشباك .. قربت لعندهن و وقفت عالشباك وبعدولي .. وشفت باسل تحت .. كان رامي حالو .. العالم شافوه وطلعو لعندي .. كان متقطع مية شقفة لان الارتفاع عالي المنظر كان بشع كتير .. كانت حادثة فظيعه ولو ما العالم وصلو ولقوني محبوسة بالغرفة والباب مسكر علي يمكن كانو يتهموني بقتلو لباسل بمركز الشرطى قلت انو خطفني واخدني على البيت غصب عني .. وبعدا طلع وقفل الباب علي وما بعرف شو صار معو يمكن لو قلتلهن الحقيقه ما كان حدا رح يسدئ .. حكيتلهن كل شي اعترفلي فيه باسل قبل ما يموت .. وبعد ما عملو تحقيقاتهن وما قدرو يوصلو لأي شي انو مين الي قتلو ومين الي عمل هيك تسجلت القضية .. عملية انتحار ... بس انا الوحيده الي بعرف .. انو رانيا هي الي قتلتو .. بعد ما قتلها ... #انتهت 🔳▫️🔳▫️🔳▫️🔳▫️ مما قرأت المواضيع المتشابهه: 
|
|
03-10-2023
|
#2 | |
 
|
رد: قصة انتقام الأرواح
أميرة الحب
جميل الموضوع وجميل ماخطه لنا قلمك أشرقت حروف شمسك بقلم مميزنقش لنا أجمل وأرق أحرف الكلام كثير لاينتهي وليس له حدود أكتفي بهذا وأنتظر جديدك بكل شوق تحياتي لك وادام الله عليك بالصحه والعافيه والسلامه |
|
|
|
|
| كاتب الموضوع | اميرة الحب | مشاركات | 11 | المشاهدات | 142 |
|  |
| انشر الموضوع |
(عرض التفاصيل)
عدد الأعضاء الذين شاهدوا الموضوع : 7
(إعادة تعين)
|
|
| , , , , , , |
العرض العادي
|
|
الساعة الآن 11:41 PM بتوقيت الرياض
Designed and Developed by : Jinan al.klmah