عــــامـــود الســـوارى
ف مكان من أحب الأماكن لقلبى
اسكندرية الماريا ام تراب زعفران
القصة النهاردة عن "عامود السوارى "
أو "عامود بومبى" أو "عامود دقلديانوس"
وهنقول اسباب اختلاف التسميات ومناسبتها
.. بعد قليل
بس قبل ما نحكى العامود دا جه ازاى ف الحتة دى
لازم نقول الاول الحتة دى كان فيها ايه من
قبل ما ينوجد !
اللى الظاهر كان عارف يا كبدى
انه هيموت ف عز شبابه قام خرج من بلده يغزو العالم
ويتبنيله ف كل مكان .. مدينة باسمه تكريماً
وهتتبنى مدينة الأسكندرية ف مصر
عشان تبقى درة العالم القديم
ونوارة عيوننا وقلبنا لحد اليوم
والماريا كان بيحكمها ف توقيت ما البطالمة
لقى المصريين عندهم عقيدة راسخة
وتمسك رهيب بالألهة بتاعتهم
وجو تمسك منى بتراثى يا شربات
فقالك كدا مينفعشى لازم نروضهم وناخدهم
ف صفنا راح عامل قعر مجلس مع رجالته
ولم علماء دين كهنة اغريق على مصريين
وقالهم اعملولنا اله حلو كدا على ذوقكم من
وش القفص و يجمع بين الأتنين عندنا وعندكم
عشان نقرب ما بين الطرفين ويعرفوا يتعايشوا
قاموا اتجمعوا وبحثوا وعملوا اله سموه سيرابيس
او سيرابيسو الثالثوث المقدس
الحاج سرابيس او سيرابيسوالثالوث المقدس
يتكون من خليط من (سيرابيس وايزيس وحربوقراط)
زى الغسالات تغسل وتشطف وتنشف
وقالوا يبقى هوه العنصر المشترك
ونلعب بيه ف دماغ المصراوة حبتين
وبنالوه معبد فخيم سموه السرابيوم
ومعندناش رسمة للأسف للمعبد
وبناء عليه رسموه المؤرخين
وحديثا عملوا صور تخيلية كدا لسعادته
الشاهد بيقول انه كان حاجة ابهة قوى
ومليان اعمدة هنحكى عنها كمان هبابة
كان موقعه فين يا شوشو السرابيوم ده ؟؟
حاليا ف حى كرموز على هو تل راكوتيس
او راقودة القرية التى اتأسست علي اطلالها اسكندرية
القصد المعبد اتبنى وبقى حاجة فُللى قوى
وبقى عامل زى الأزهر عندنا كدا ف عز بهائه ومجده
كان السرابيوم معبد وجامعة
وكانت بتتاخد فيه الدروس وتقام المناقشات والندوات
ولما مكتبة الاسكندرية اتحرقت ايام غزو يوليوس قيصر
مكتبة السرابيوم قامت بالواجب وزيادة
وروح يا زمااان وتعالى يا زماااان
وجالنا من وسط المستخبى واحد اسمه دقلديانوس
ليه يا شهروزة .gif "زعلان")
ة منه كدا عمل ايه اللى ينوكس ..؟!! ولا حاجة دا كان راجل سُكرة يتحط ع الجرح يولع
تم ضمه لصفوف الجيش والظاهر اتروق هناك
لما اترقى ف المناصب حبة حبة
وبعدين بقى رئيس الحرس الجمهورى
يوه ...
قصدى بقى من رئيس الحرس لامبراطور
والولا زى ما قولنا شبعة من بعد جوعة
وكانت المسيحية بدأت ف الانتشار
ومبقاش فيه فايدة من مقاومتها فتم الاعتراف بيها
من الامبراطورية الرومانية بالغصب
والمدهول عمل عيشة ف البدايات وكان كويس ولطيف
وبعدين لما اتمسكن لحد ما اتمكن
وطبعا مصر ومسيحيوها نالها م الوجع جانب
الحقيقة ان مسيحيو مصر نالهم من الاذى الكتير
الوغد جيشه ارتكب المذابح والبشاعات
لدرجة ان المصريين هيخلدوا الذكرى دى
وهيبدأ التقويم القبطى بأشهر المدابح اللى عملها دقلديانوس
ف مصر ويسمى عهده بـ "عصر الشهداء"
من كتر اللى ماتوا بسبب تجبره وغيه
والشهادة لله الراجل كان حنين
الاول طلع مراسيم بحرق الاناجيل و الكتب الدينية
ومنع المسيحين من أى تجمعات دينية
أواقامة اى طقوس تخص المسيحية
وبعدين لما لقى مفيش استجابة راح مصعد ف الخطوات
وأصدر مرسوم يأمر المسيحيين رجال ونساء واطفال
بتقديم قرابين ف المعابد والارتداد الدينى علنا
ولما لقى الناس رافضة ترجع عن دينها الجديد
ومتمسكة بالمسيحية ابتدى بقى الفصل التالت
اللى كله قتل وحرق وتعذيب للرهبان والراهبات
والناس العادية المؤمنة والمؤيدة
واخترعلوهم الات تعذيب مخصوص زى " الهنبازين"
ودى بعيد عنكم اله كدا بتعصر أى عضو ف جسم
البنى آدم وتخليه كفتة ... !
واللى يبحث يلاقى حكايات كتير عن شخصيات
اتعرضت للتعذيب زى القديسة دميانة وغيرها
عشرات القصص عن الصمود ف وش المفترى
قصره .. زفت الطين كان الامبراطور غصبن عننا
واذ فجأتن كدا وبلا سابق معاد
هل بت ما الشعب اللى قام بيها يا شهرو ؟!!
والله يا عيال كان بودى أقول ايوه
لكن الحكاية بدأت من جنرال ف الحامية الرومانية
دوميتيوس دوميتيانوس ... دا كان اسمه
وكان معاه واحد تانى زميل برضو
والأتنين الظاهر حد لعب ف نافوخهم
فقالوا هيا نستقل باسكندرية عن الامبراطورية !!
بس ودومتى .. هدلعه بقى عشان اسمه طويل قوى
وقال لـ دقلديانوس اجرى يااض
الكلام دا كان سنة 295م لما ابو الدقاليل وصله الخبر
تقبل .. طبعا .. الموضوع ... بصدر .. رحب
بس وراح لامم عساكره ونزلوا على تحت
عشان يرحب بخطوة الأستشيكلاااال دى
ويقول لدومتى مبروك عليك يا ابو سامية
... حلو ؟
لأ مش حلو طبعا عشان الموكوس هيوصل لاسكندرية
بيقولوا من 7 لـ 8 شهور بحالهم يا ثااامح
وبيقال ان دقلديانوس كان يقدر يدخل اسكندرية
عنوة ويخلص المسألة
لكن هوه قرر يدى البلد درس
ويوريهم الويل عشان يحرموا يعملوا ثورات تانى
والمجاعة بهدلت المدينة وسكانها
وانتشرت الاوبئة والحال بقى بؤس البؤس
والنيلة دقلديانوس ياخويا اصلا جايلنا شايل ومعّبى
قوم هجم ع اسكندرية فجأة وهيا بتترنح
وف النهاية قتل دومتى وزميله
بدل الموكوس اللى قامت عليه ثورة من جنرال ف حاميته
آل دقلديانوس آل عمل جولة تفقدية ف المدينة
وبيقولك يا نضرى .. يا كبدى .. يا ضينايا
اتنأثر قوى قوى من تردى الحال
وصوعبت عليه احوال الرعية فقرر يسترضيهم .. !
ازاى يا ابو الدقاليل هتراضيهم ؟
بتبعت حصة من القمح للامبراطورية ؟؟
خلاص بلاش المرة دى وسيبوه للناس تاكل
وتنبسط:))
دا على اساس ان مش انتا اللى مجوعهم يا دقلا ؟؟
وعلى اساس ان القمح دا بيتاخد بالرضا وبتدفعوا حقه ؟؟
الجدع ابن حلال وطيب واحنا استهبلناه الصراحة
وخليناه يعوضنا عن تجويعنا وقتلنا
وطول عمرنا النباهة بتفط من حبابى عينينا
بس وعمل دقلديانوس شوية تغييرات ادارية
اقليم شرق الدلتا وغرب الدلتا والجنوب
وبعدين خلاص هيمشى اهو ومروح ف داهية
قوم يقرر والى مصر الجديد وكان اسمه بوستيموس
انه يعمل حاجة كدا على قد ما قسم للحاج دقلة
وتذكار للأيام العزييييمة اللى عاشتها اسكندرية تحت ظله
هل بت ما هتعملوله خازوق يا ولاد وتقعدوه فوقيه ؟
ولا هتقعدوه ع الهنبازين ؟
قالك لأ .. دحنا هنعمله عامود يخرق السما كدا
عشان نخلد اللحظة التاريخية دى من عمر الوتن
جابوا حتة جرانيت حمراااااء اللون
ومن حتة واحدة نحتوا العامود الشهير
ارتفاعه لو ضفنا القاعدة والتاج : 26 و85 سم
ومن تحت أعرض من فوق فبالتالى
" تذكار من مدينة الاسكندرية اقامه الحام بوستيموس
للأمبراطور دقاديانوس الذى لا يقهر
آحبايبى .. الراجل هرسنا وداس علينا بالقطر
وتقولوا .. اعترافا بفضله !!
جاكتو نييييلة #مارى_منيب_استايل
وبيقولوا .. بيقولوا محدش متأكد ان العامود
دول كانوا حاطين تمثال للمخسوف دقلا على قمته
آل يعنى احنا كنا ناقصين نشوف خلقته
بس التمثال راح ف الوبا ومحدش عتر فيه
هل بت ما حد كان موتضايق منه مثلا ...
فوقعه وكسره.. لأ يا شهرو
اخص عليكى متبقيش ظنانة وويحشة
المختصر دقلديانوس الوغد غار على بلاده
وبيقولوا اعتزل الحكم بعد فترة
ومات بائسا تلاحقه لعنات الشهداء
اللى اتقتلوا بأمره ف كل مكان
المسيحية هتاخد وضعها بمرور الوقت
واسكندرية تحديدا هتكون ست المدن ف هذا الشان
وبعد شوية المعابد الوثنية هتكون محل رفض
ورغبة ف الأزاحة والهدم من اهل الدين الجديد
هتحصل اضطرابات وثورات متعاقبة
وهيكون نصيب معبد السرايبوم اللى جواه العامود
الهدم والتحطيم لحد ما يتلاشى شوية بشوية
ايووون ميتبقاش الا الاطلال وشوية العواميد
وممرات تحت الأرض وكلام فارغ
لكن يتفضل العامود شامخ راسخ مبيتهزش
وروح يا زمان وتعالى يا زمان
وعمرو بن العاص الداهية يزغلل عين
سيدنا عمر بن الخطاب بدخول مصر
وتساعده ف طرد المحتل القديم
وبيقولوا ان اسكنكرية تقلصت حدودها ايام العرب
ولما جه الحاج احمد بن طولون
وجدد بناء سورها استبعد منطقتين
قالك احنا نبنى السور ف المناطق الآهلة بالسكان
لكن شرق المدينة فيه مقابر اليونان والرومان
والناس ميتة وشبعت موت فملناش دعوة بيهم يا موهيى
اما المنطقة الجنوبية ففيها مزارات
وبقية من اطلال معبد السرابيوم واطلال بيوت قديمة
ومتهدمة فمش هندخلها ضمن السور هيا روخرا
وطبعا ف المنطقة دى عامود السوارى
اللى كان واقف صامد ولا بيشتكى
اشمعنى سدرة يعنى يا شهرو ؟؟؟
قالك عشان كانت الحتة دى كان فيها شجرة كبيرة عجوزة
و ناس تانية قالت عليه .. باب العامود
وجه بعد الطولونيين الأخشيديين
ثم حضر من المغرب جوهر الصقلى واستعد لمجى
كبير الفاطميين المعز لدين وورث ابنه من بعده
ثم ورث الحفيد ثم ابن الحفيد اللى ف عهده
جه بدر الدين الجمالى لمصر
وبنى مسجد العطارين اللى هتلاقوه العامود بيبص عليه
الحقيقة ان العرب سموا اطلال السرابيوم
وسموا عامود دقلديانوس .. عامود السوارى
قالك عشان العامود كان واقف ف النص
ما بين اعمدة السرابيوم التانية كما صارى السفينة كدا
الغريب اكتر انهم بيقولوا ان الاعمدة دى كانت .. 400 !!
عبد اللطيف البغدادى الرحالة الشهير هوه اللى بيقول
انه لما زار مصر أيام الملك العادل اخو صلاح الدين
زار اسكندرية وشاف بعينه المأساة
:(بيحكى اهو بنفسه
"ثم انى رأيت بشاطىء البحر مما يلى سور المدينة
اكثر من اربعمائة عمود مكسرة انصافا واثلاثا
حجرها من جنس حجر عمود السوارى
على الثلث منه او الربع وزعم اهل الاسكندرية قاطبة
انها كانت منتصبة حول عامود السوارى
وان بعض ولاة الاسكندربة واسمه قراجا
كان واليا عم يوسف بن ايوب
فرأى هدم هذه السوارى وتكسيرها والقاها بشاطىء البحر
زعم ان ذلك يكسر سورة الموج عن سور المدينة
أو انه يمنع مراكب العدو ان تستند اليه
ومن مفعل لا يفرق بين المصلحة والمفسدة"
الله يفتح عليك يا ابو اللطاطيف
انا بحاول اتخيل ازاى كانوااااا .. 400 عامود يا ثاااامح !
والأسوأ بتخيل شكل اللى جاله قلب يقطعهم
المقريزى زكريا بيقول برضو
وبيحكى عن عامود السوارى انه
" مكان حوله اربعمائة عمود
كسرها قراجا والى الاسكندرية ايام السلطان
ورماها بشاطىء البحر ليوعر على العدو سلوكه اذا قدموا "
ان كان فيه فعلا 400 عامود واترموا ف المية
كتر خيرهم انهم سابوا عامود السوارى بقى
ولا تلاقيهم مقدروش يزحزحوه من مطرحه
واشمعنى البغدادى بس اللى هيقول
لازم ابن بطوطة هوه كمان يدلى بدلوه
ويوصف عامود السوارى اثناء زيارته للأسكندرية
ولكن ... بمزيد من التحفط قائلا
" ومن غرائب هذه المدينة (الاسكندرية)
عمود الرخام الهائل الذي بخارجها
المسمى عندهم بعمود السواري
وهو متوسط في غابة نخل وقد امتاز عن شجراتها
سمواً وارتفاعاً وهو قطعة واحدة محكمة النحت
قد أقيم على قواعد حجارة مربعة
أمثال الدكاكين العظيمة ...
ولا تعرف كيفية وضعه هنالك ولا يتحقق من وضعه "
واللطيف انه حكى عن واقعة ان واحد جه فجأة كدا
بسهم وقوس وربط حبل ف السهم
ونزل السهم بالحبل م الناحية التانية
وانه طلع ماسك الحبل لحد قمة العامود وقعد
وبعدين صاحب له طلعله بعد شوية
وقعدوا فوق ف الطراوة هما الجوز
ومحدش فهم عاوزين ايه ولا ايه حكايتهم !!!!
القصد .. عامود السوارى اللى كان عامود دقلديانوس
اشتهر كمان باسم عامود بومبى
ودا كان عسكرى شهير بيقولوا هرب على مصر
واتقتل واخدوا راسه حطوها فى جرة معتبرة كدا
وبيقولوا اتحطت على قمة العامود من فوق ..!
محدش من المؤرخين عنده تأكيد للقصة دى
ان تسمية عامود بومبى دى فضلت لازقة ف الأثر دا
وهتلاقوها مكتوبة على الكروت البوستال
والتسمية الأشهر لزقت خلاص
العامود عامودنا والصارى بتاعنا
واللى هيقرب حمو هينده كّنى من ع الإمة
وروح يا زماااان وتعالى يا زمان
وييجى المماليك .. الشيك .. الرومانيتك
والعامود على حاله برا اسوار المدينة
وييجى من بعدهم العثمانيين واسكندرية ف عهدهم
هتشوف اسوأ ايامها فقر وبؤس واهمال
لحد ما تبقى لقمة طرية يمضغها جيش الفرنساوية
بسهولة ويحتلها
ويبتدى العلماء اللى جم مع بونابرته
ف قياس وحصر وجمع معلومات عن كل شىء ف مصر
وهنشوف رسمة لعملية قياس عامود السوارى
بريشة فيفان دينون ف يوليو 1798
وهنشوف ازى تم قياس طول العامود
ومشى الفرنساوية ورجعوا العثمانلية لوقت قصير
عشان سنة 1805 يوصل محمد على سنكفولة الى الحكم
ويرقدلنا فيها هوه وعياله واحفاده بقى ..
الاسرة العلوية لحد الخديوى اسماعيل
وسماعين نفسه بذات سخصيته كانوا بيعتبروا الآثار دى
كلام فارغ كدا وملهاش لزوم حد يعبرها !
لحد ما ييجى اجانب كتير لمصر ف عهد اسماعيل
ويغيروا الحالة الثقافية شوية
ويبتدى الاهتمام بالآثار على اختلاف عصورها
ومرة هنحكى حكاية الأثار دى
بس الشاهد ان العامود لضخامته وصعوبة نقله
كانت دى نقطة قوته ومصدر بقائه لحد اليوم #الحمدلله
بس من الصور استوعبت ازاى هوه ضخم وعظيم
اخد حقه من التكريم المعنوى
وبعتوه الاجانب لأهلهم ولأصحابهم
ومن صور زمان ... ننتقل للحاضر
لحد ما تيجى عيون ناس دلوقتى
واتجاه بعين جديدة وشكل تانى
اللى محاوطين بالعامود دول
.. لأبو الهول
ويقال ان كان فيه تماثيل يااااااما يا ايسااااامة
بس كله بالسلامة .. اللى اهمل واتكسر
واللى اتشون واتاخد على برا برا
والعامود زى ما بيبص على مقابر المسلمين
كمان بيبص على جزء من المدينة
وطبعا العامود اتبهدل زى اى حاجة قيمة ف البلد دى
رغم انهم بيقولوا انه تقريبا
- الناس المتخصصة تصححلى -
يعد اقدم أثر اسكندرانى باقى من حقبته وزمنه
والجدع قاعد ماسك نفسه ومستحمل كل القرف
ولحد النهاردة .. ربنا يديه الصحة وطولة العمر
المنطقة كلها عانت من المياه الجوفية والأهمال والمرمطة
غير ان بقى اجرد من أى زرع
مع انه زمان ف صور كان فيه خضرة حواليه
وهل فعلا زى فيلم احمد حلمى بقت المنطقة مشاع
وبيقولوا عملوا اعادة ترميم وحاجات كدا
بس هل عملوا اعادة ترميم للعقول
ولكيفية الاستفادة من أثر عظيم دى دا ؟!
وربنا ينفخ ف صورتك يا عامود السوارى يا بنى
ويخليك لينا ياااارب #قولوا_آمين
شيفاك يلى مقولتش وعارفاك وهجيبك #بتزغر
وتوتة توتة خلصنا ... نقول الملاحظات
ملحوظة كل ثورة بتحصل ف اسكندرية
يا اخى الاسكندرانية دول ايه ؟
معجونين جدعنة وكرامة وكل حاجة حلوة كدا
جنرال وانقلب على امبراطوره .. احنا مالنا ما ياكلوا بعض !
لكن لما ييجى الامبراطور دا ناحيتنا
ويحكلنا على مناخيرنا نقف وقفة رجالة كدا
مع اننا عارفييييين اننا هنتعك فيها
وهناخد فوق دماغنا .. لكن برضو جدعان
عملوها الاسكندرانية مع ناس كتير
خرجت عن نطاق السلطة الحاكمة واستجدعوا
عشان كدا ف ثورة يناير كانت اول محافظة شطبت بدرى
الاسكندرانية دول صنف معتبر ف القتال هما والسوايسة
بالنظر ملياً - حلوة ملياً دى - الى حكايات التاريخ
ولاد الوارمة بيكسبوا المعارك فورا
لكن اللى معاه الحق بيكسب ع المدى الطويل
ولنا ف ابن المتضايقة دقلديانوس اسوة حسنة
قعد يدبح ف الناس شهور وسنين
والمسيحية بقيت وانتشرت وعاشت #كُبة
ودا يقولنا درس كل محنة تمر متفقدش ايمانك بقضيتك
لأن الحق باقى ولو بعد حين
ومش هقول اليأس خيانة عشان هتتريقوا وتقفلونى
ولسه بنحكى عن دقلديانوس الوغد
قالك عملنا العامود عشان نكرمه
اهو مجده راح والتمثال راح والقهر راح
وفضلنا اللى يخصنا .. الآثر والعبر
وبعض المواقع بعشم كدا بتقول انه اتعمل
دا الوالى المتعين من الامبراطور اللى عمله
مش هنستعبط بقى دا اهل اسكندرية لو عليهم
ومحاصرين وبيموتوا جوعا وعطشا فــ... معلش
ابقوا احكوا حكايته الحقيقة يا عيال
اخيراااا ابن بطوطة قالك كان فيه نخل كتير
وايام زماااان كان فيه شجر
وديتوا الحاجات دى فين يا كلاب
وهما هوه الأخوة المسئولين عن أى حتة ف مصر
ليه عندهم فوبيا اللون الاخضر عموما
حتى جراج التحرير البائس اللى فتحوه بلطوه من فوق
بدل ما يزرعوه ... #جاتكو_القرف
10-15-2017
أحكى يا شهرزاد..عامود السوارى
العرض العادي
