| ~{فعاليات منتديات وهج الذكرى}~ | |
|
|
|
|
|
|||||||
| ❀ ✿ وهج الحضارة والتأريخ❀ ✿ قصاصات من التراث والحضارات القديمة وأدابها |
 |
|
|
|
أدوات الموضوع | انواع عرض الموضوع |
|
#1
10-15-2017
|
||||||||||||||
|
||||||||||||||
أحكى يا شهرزاد.. الشيخ محمد رفعت
 حكاية النهاردة انا حبيتها من قبل ما أحكيها أو حتى أجمع ف تفاصيلها عشان صاحبها له غلاوة ف قلبى معرفش اوصفها ولا أختصرها ف أى كلام .. مهما حاولت  أنا ف حلم من أضغاث أحلامى شايفنى بخرج من بيت زى بتوع الحواديت شبه الكوخ الخشب .. نضيف ولطيف صغير وجميل وحواليه اشجار وورد وغزلان واسود وحيوانات كتير ومحدش بيأذى بعضه عشان احنا ف الجنة اللى مفيهاش شر ولا دم ولا غضب ولا أى لمحة حزن ..  وانا بخرج واقف على عتبة بيتى بيقرب منى نمر يتمسح فيا ويحنى راسه زى القطة عشان اطبطب عليه اميل عليه وابوسه ف جبينه وارفع راسى لفوق عشان ابص للسما واركز عشان اسمع صوت العصافير والهوا بيحرك الشجر وبيعزف مزيكا وكل حاجة حواليا نضيفة وبريئة وحلوة قوى .. وفجأة من بعيد اسمع صوت جميل رقيق بيقرى كلمات عذبة انصت بدقة عشان اعرف بيقول ايه الاقيه قرآن اركز اكتر عشان اعرف دا مين فأكتشف انه صوت الشيخ .. محمد رفعت !  صاحب الحدوتة النهاردة يبقى من وصفوه بعدة القاب واسامى كان أهمها واقربها له فعلا هو قيثارة السماء الشيخ محمد رفعت عليه الف مليون رحمة ونور وكل مواليد برج التور يجمعوا عندى دلوقتى ويطيب لى ان اقولهم تفاخروا عشان الراجل الجميل دا تبعنا وبرج التور يعنى الصبر ع المحن بشكل عجيب التور يعنى الاخلاص للأشياء والناس والاماكن بينما يتركها الآخرون يعنى المحبة لدرجة التعلق والفناء ف الشىء والتضحية لأبعد حد التور يعنى العشرية والونس بالبشر وكل ما سبق هتلاقوه ف مسيرة الراجل الجميل لما احكيها بالتفاصيل  واعتمدت على كذا مصدر لكن الاساسى والاول ..هذا الكتاب قصه حبيبى صاحب الليلة هتبدأ ف شهر مايو تحديدا يوم 9 منه سنة 1882 ف حى المغربلين بالدرب الاحمر ف بيت احد الضباط اللى ترقى وبقى مأمور قسم الخليفة والزوجة هتحمل وتخلف ولما يبشروا سيادة المأمور محمود رفعت بأنه ربنا كرمه بولد زى القمر وقالوله هتسميه ايه ؟؟ قالهم هسميه محمد رفعت وكان اسم مركب كعادة هذه الايام وحضر محمد للدنيا طفل جميل عيونه واسعة ومبهر لأى حد بيشوفه الاب كان فرحان بيه جداااااا وبيشيله ف الراحة والجاية وبيتباهى لحد ما تم سنتين والولد جاله رمد ف عينه الجميلة اللى بيحكى عنها ان ست شافته مرة على كتف ابوه فقالت ايه عينيه الحلوة دى "ده رمشه نايم علي صحن خده" حسدته يعنى :) وكانت هيا البصة والولد عييى واخده ابوه للدكاترة والعلاج للأسف مجبش أى نتيجة وبيقولوا اتعمله عملية عشان يلحقوه لكن امر الله نفذ واصبح محمد كفيف وهوه ف سن الورد كان لسه طفل وبيسأل ببراءة ابوه امتى النهار يطلع واشوف يا بابا ؟ فكان بيرد عليه الرد البليغ الموجع .. قائلا بأنه بكرة يتعود ع الضلمة لكن بكرة كمان هيشوف بقلبه اللى عمر ما كان هيشوفه بعينيه وقد كان  ف هذا التوقيت كان تعليم الاطفال المكفوفين متركز على اللغة العربية والقرآن وفقط لصعوبة تعليمهم أى علم تانى بسبب ظروفهم ولهذا قرر المأمور انه يحفظ رفعت القرآن وبيقولوا انه ف مرة كان شايله على دراعه وقاعد بيقرى بعض الآيات فرفعت صححله كلمة الاب افتكره غلطان .. راح ضاربه على ايده وبعد ما روح البيت الاب فتح المصحف وبص فيه لقى رفعت كان صح فطيب خاطره وجابله حلاوة طحينية ودى كانت حلويات هذه الأيام على فكرة :) وقرر من يومها انه يخليه يمشى ف الطريق دا ويكون حافظ للقرآن وفعلا الأب حفظه لوحده ربع وبعدين بعته لكتاب قصاد جامع فاضل باشا عشان يكمل وبيقولوا ان الشيخ رفعت ف سن الـ9 سنين كان حفظ القرآن كله لكن ف نفس السن الصغيرة دى الأب ربنا افتكره برحمته ومات وساب الأبن صغير يواجه الدنيا  ف كتاب بشتك الملحق بجامع فاضل باشا بدرب الجماميز كمل رفعت طريقه وكان شيخه اسمه محمد حميدة اللى رعاه كأب واهتم بيه وبقى يعرف اهالى الحى بيه ويوصي بيه عشان الناس تجيبه ف الليالى والمناسبات ينشد ويقرالهم وياخد اللى فيه النصيب لأنه ف الوقت دا كان محتاج يصرف على امه والبيت ليه ؟ عشان ضباط الشرطة والمأمير زمان كانوا ناس حلوة ونضيفة الظاهر وكانت بتموت من غير ما تسيب لعيالها مشاريع والوف مؤلفة ف البنوك ولا حتى معاش ولا حاجة آه والله  ف الوقت دا رفعت درس تفسير القرآن والقراءات السبع والتجويد وبعدين درس موسيقى عشان يعرف اصولها وحفظ مئات الادوار والتواشيح والقصائد الدينية مش بس كدا ..؟ دا درس العزف ع العود واجاده وكمان بيقولوا درس العزف على كام آلة موسيقية كمان عشان يتعلم المزيكا بدقة ويستفيد بيها ف التلاوة وتلقفه احد الحفاظ الكبار ف الوقت دا وكان اسمه الشيخ عبدالفتاح هنيدى ولما وصل رفعت لسن الـ 15 كان ابتدى اسمه ينعرف والناس تحبه وتروح تسمعله ابنه حكى لمؤلف الكتاب ان الشيخ رفعت امه جوزته وهوه ف سن الـ 11 من بنت جارتهم كانت عاوزة تونسله وحدته برفيقة تسليه يعنى ! والجوازة مطولتش وبعدين فضلت الام تلح على رفعت يتجوز تانى فبقى يطفش ع المسجد بتاع فاضل باشا ويقعد هناك ويهرب من مشروع الجواز لحد ما ربنا كرمه بعروسه طيبة ف سن الـ 16 وفعلا اتجوز زينب سالم وخلف منها 4 اولاد وبنت وقعدت معاه لحد ما ربنا استرد وديعته وكانت سنده مع ابنه البكرى اللى كان عكازه وسنده الشيخ رفعت ف سيرة حياته كان شخصية مميزة جدا فيه صفات حلوة كتير بس فيه حاجات تحس انها نفحة من ربنا مديهاله ومخلياه عارف اختياراته ايه ومن بدرى بدرى عشان التوب الابيض يفضل نضيف لا يدنسه أى شىء الراجل من البداية وكان عف النفس والفلوس آخر همه ورغم ان وقتها كانت بتنهال عليه عروض ومغريات لكنه كان مستوعب ان القرآن مش سلعة ومش تجارة وكان حريص يتعلم ويتثقف وميقفلش على روحه وكان بيحب الناس ويحس بيهم وبسبب كدا فضل يعلو ويسمو لحد ما بقى سيد المقرئين وامامهم بشهادة الجميع ف زمانه وبما انه برج التور فهوه روتينى كلاسيكى بحت مبيحبش يغير نظامه ولو دفعتوله ايه واغريتوه بيه فكان بيرفض السفر برا مصر وعمره ما طلع منها ! ورغم انه قعد فيها مخرجش لكن كان عنده اسطوانات لبيتهوفن وكبار الموسيقيين العالميين وكان كمان بيسمع ام كلثوم وعبدالوهاب وبيحب الطرب وكان بيغنى قصائد والناس تنبهر بأدائه الرائع السليم اللى بينافس أجدعها مطرب ومطربة  ومش بس بيسمع دول دول بيقولوا انه كان عنده زيارة اسبوعية لجنينة الحيوانات مخصوص عشان يقعد جنب قفص الاسود ويسمعهم ! ليه يا مولانا؟ قالك عشان زئير الأسد احسن صوت تسمع منه القرار ! اللطيف انه كان بيروح يوم السبت بالتحديد دونا عن باقى الايام قاصد ليه يا شهروزة ؟ يقال عشان دا كان اليوم اللى بيجوعوا فيه الاسود تمهيدا لأطعامها اللحمة تانى يوم فالشيخ كان بيروح يسمعهم وهما ف حالة انكسار وتوسل عشان يتعلم كيفية الاداء بشكل طبيعى وعفوى !  الحكاية دى اللى شرحها مصطفى محمود قائلا "صوت الشيخ رفعت هو الصوت الوحيد الذى يعطينى معنى الدين والتدين انه صوت فيه أدب وخشوع ورهبة وانكسار"  الشيخ رفعت كان عنده اخلاص عجيب رغم انه شوية بشوية اتعرف وبقى مشهور وله جمهوره وجاله عروض ياما الا انه فضل يقعد ف مسجد فاضل باشا لأنه كان بيدين بالفضل والولاء لهذا المكان اللى بدأ فيه واحتضنه وهوه لسه بيبدأ حياته ففضل يقرى فيه القرآن كل تلات وجمعة وكان بيسمع مزيكا زى ما حكينا وكان بيشترى كتب ويخلى اصدقائه يقروهاله وكان حافظ تواشيح وقصايد وفضل يقولها لحد ما توقف عنها تماما 1930 وقال مش هقرى غير القرآن وبس  الشيخ رفعت ظهر ف وقت كان فيه فطاحل زى يوسف المنيلاوى ومنصور بدار واحمد ندا وعلى محمود ومحمد القهاوى وحسن المناخلى ومحمود البربرى وغيرهم لكن عرف يبقاله اسلوبه وطريقته اللى خلت الناس تجيله من الأقاليم وتحاول تحجز مكان ف مسجد فاضل عشان تسمعه ومتلاقيش :)  كامل الشناوى حكى عن القصة دى وقال انه لما كان ساكن ف السيدة سمع عن الشيخ رفعت فحب يسمعه وف يوم الجمعة راح الساعة عشرة ملقاش مكان لرجل.. فمشى وجه الجمعة اللى بعدها الساعة 8 عشان يحجز مطرح ويا دوب لقى مكان ف نص الجامع وقعد يسمع اخيرااا  واستغرب ان الشيخ كان بيتلو بصوت خافت دقيق رقيق لكن فؤجى بان القاعدين كلهم كانوا ساكتين ومركزين عشان متفوتهمش أى حاجة و كان صوته بيأسر الأسماع والقلوب ومن يومها وكامل الشناوى بقى يروح كل جمعة يسمع الشيخ ولما نقل من السيدة (كامل يعنى) بقى يعرف فين السهرات والمناسبات اللى هيقرى فيها رفعت ويروحله مخصوص ويتتبعه الشيخ الشعراوى كمان قال نفس الكلام وازاى كان وهوه صبى بياخد اصحابه ويتنقلوا من مكان لمكان ورا الشيخ عشان يسمعوه  محمد عبد الوهاب بقى كان من مجاذيب الشيخ رفعت وكان بيروح يسمعه من ايام الصبا وعلى حد قوله كان بيروح يقعد تحت رجليه :) عبوهاب بيحكى ان بعض الحضور كان بيطير عقلهم طربا من شدة حلاوة صوت الشيخ رفعت ويخش بعضهم ف حالة هيستيرية كدا وفيه ناس كان بيغمى عليها والمسجد اثناء تلاوة الشيخ رفعت كان بيتردد فيه ما بين كل ثانية وثانية كلمة الله ... الله ... الله من كتر الجمال وبيقول كمان عن صوت الشيخ انه "كان ممتلئا تصديقا وايمانا بما يقرأ " وبيحكى حكاية لطيفة قوى عن انه لما بقى مقرب من رفعت راحوا سوا مشوار كانت ليلة ف قصر احد الباشوات الكبار ولما وصل الضيفين الشيخ رفعت فضل يقعدوا ف الجنينة عشان يبقى الهوا والطبيعة ألطف  عبوهاب بيحكى انه المغرب كان فاضل عليه بتاع تلت ساعة كدا فالشيخ رفعت ابتدى يقرى وكانت العصافير بتزقزق وتصوصو جنينة وحديقة غناء بقى .. عادى ! رفعت اول ما ابتدى .. العصافير سكتت وبعدين سكت شوية فالعصافير ابتدت تزقزق تانى ابتدى يقرى فسكتت وسكت فابتدت تغنى وقعدوا كدا لحد المغرب ما أدن !!!! وعبدالوهاب مذهووووول من اللى بيحصل ومش مصدق زى ما يكونوا كورس واحد وكل واحد بيغنى ف توقيته ومعاده قد ايه كان راجل بفطرته ومنسجم وعايش القرآن وبيوصله وبيتواصل مع خلق الله و مش من البشر بس الكتاب فيه جزء بيحكى بشكل متخصص ودقيق عن صوت الشيخ رفعت وانا مش بفهم ف الكلام المجعلص دا تقدروا تقروا انتوا براحتكم لللى حابب لكن اللى فهمته ان احد الدارسين ف الازهر عمل دراسة ماجستير ف صوت الشيخ رفعت وقال بما لا يقطع مجال للشك ان صوت رفعت إتسع ل21 مقام تقريبا ف عزه وقت ما كنت صحته تمام اما بعد كدا ف اواخر كام سنة نزلوا لـ 18 مقام بسبب المرض ورغم انه صوته خفيض ويبدو ضيق الا انه كان عنده قدرة رهيبة وسلسة ف التنقل من مقام للتانى بحرية ومن غير ما يخدش ودان المستمعين ولا يحسوا بأى حاجة نشاز  والمتخصصين بيقولوا انه كان سخي ف المدود يعنى كان عنده سخاء ف ف المد وكان صوته ثابت التردد والذبذبة من اول حرف المد الى اخره ودى قوة بيتقاس عليها حلاوة الصوت ومهارته حتى ف المطربين الراجل كان صوته علميا .. الصوت الكامل والقصة مكنتش بس ف صوت وامكانيات لأ رفعت كان مستوعب معنى ما يقرأ عشان كدا وصله للناس انيس منصور قال عنه بالمختصر المفيد : "انه لا يقرأ وانما هو يشرح ايضا" وف الأذاعة كان فيه ميكرفون لكن ف المسجد كان صوته وبس عشان كدا كانت الناس بتحبس انفاسها عشان تسمعه وتحلق مع صوته ف ملكوت الله  التسجيلات بتاعته للأسف كانت اواخر ايام تلاوته لما المرض كان مأثر عليه لكن اللى سمعوه ف عزه كانوا بيقولوا عنه اساطير  محمود السعدنى اجمل واحد وصفه فعلا لما قال عنه . " انه قيثارة السماء كان صوته اشبه بخلطة ربانية من مزامير داود وصوت الكراون الشارد فى سماء الله فى الليل الحزين " كان أب حنون واولاده بيفتكروا ازاى كان ف قلب الليل بيقوم يدخل عليهم بقلة ف ايده اليمين ويتحسس طريقه بالإيد الشمال ويروح يسقيهم المية وحكاياته متتعدش من كتر جمالها وجماله كان انسان بسيط قريب م الغلابة كان حريص ميخرجش برا الحى اللى اتولد وعاش فيه عشان تفضل الصلة دى موجودة برج التور لما بيتعلق بالاماكن ويحبها ويفضلها عن الاغلى والاشيك ...  وكان بيحب الفسيخ جدااا وبيقول انه مفيد للحنجرة ! وكان شاطر ف الدومينو بس كان بيشترط ع اللى هيلعب انه ميغشش ويسرق :)  وكان زى أى مصرى صميم كان دمه خفيف بالفطرة والجينات وكان نجيب الريحانى وبديع خيرى اصحابه وبييجوا يزوره دايما خصوصا ايام المرض ومرة دخلوا ف قافية لبعض وقلشوا لدرجة ان الريحانى قال " الحق يا بديع .. الشيخ رفعت اصبح منافسا خطيرا واحنا مش عارفين "  وام كلثوم كانت بتحبه وبتيجى مخصوص ف بعض ايام الجمع وتقعد ف الحتة بتاعت الستات عشان تسمعه هوه كمان كان بيحب صوتها وف توقيت ما لما اتخانق الشيخ رفعت مع الأذاعة الناس الحلوووة وقعوا بينه وبين ام كلثوم قالولها بيحقر من شأن المطربين وبتاع وحصل قلق وبعدين الست فهمت القصة وبيحكوا ان كان كان فيه ست اسمها اسمهان كانت بتقرى القرآن ومشهورة ف الزمن دا والشيخ رفعت كان بيحب يسمعلها ولما ظهر مقرئين جدد كان بيشجعهم وتلميذه النجيب ابو العينين شعيشع هوه اللى هيحكى المرة دى ازاى اتعرف عليه وازاى بقى ف ديل جلبيته  شعيشع بيقول انه لما ابتدى كان معجب جدا بالشيخ رفعت وكان بيروح يسمعله ف مسجد فاضل وكان بيخاف يقرب يكلمه من شدة الرهبة والمحبة قوم ايه ؟؟ ف يوم من الأيام الشيخ رفعت خلص وكان شعيشع قاعد قريب منه وجم ناس يتكلموا مع الشيخ فقالوله تعرف ان فيه ولد طالع جديد بيقلدك !! واسمه كذا .. رفعت رد عليهم بمنتهى البساطة لأ هوه مش بيقلدنى ولا حاجة دا صوته فيه نفس الامكانيات ومش قاصد ويخلق من الشبه اربعين الناس وقتها اتكبست طبعا بس شعيشع هوه اللى اتشجع بعد ما سمع الجملة دى وراح قايم مسلم ع الشيخ رفعت وبايس ايده وقاله انتا عارف انا مين؟ رفعت قاله معرفش ؟ رد التانى .. انا شعيشع يا شيخنا رفعت قام وحضنه وقاله ازيك يا حبيبى انا من زمان عاوز اسمعك وفعلا قعد وسمعه وشجعه ومن يومها بقى ف رجليه مطرح ما يروح يلازمه وبقى استاذه وبيعلمه ويرشحه ف الليالى والمناسبات ويقول لأصحاب الليالى هوه كأنه انا وكأنكم جبتونى وحاجة حلوة ملهاش زى وشعيشع بيقول انه بفضل ربنا واستاذه بدأ يطور ف ادائه ويعمل اسلوب مختلف شوية وبقاله بعد كدا شكل وطريقة ومبقاش حد يقول انه بيقلد رفعت لكن رغم ذلك بعدين بعد موت الشيخ والأذاعة حصلت على تسجيلات له كان ناقص فيها جمل بسبب خطأ ف التسجيل فبعتوا لأبو العينين يكملها بصوته لأنه كان الاقرب لأسلوب رفعت وصوته فشعيشع كان ممتن جدا للحكاية دى وحس وكأنه بيرد بعض من جمايل الشيخ رفعت عليه وبيحكوا عن رفعت انه كان متعفف جدا ولما كان يطلبه ناس عليوى وناس غلابة كان بيختار الغلابة وحصلت فعلا ف سنة من السنين وكادت تسبب ازمة ف قصر عابدين !! الملك فاروق كان بيعمل سنوية ابوه زفت فؤاد اللى محدش بيطيقه وعزم شيوخ القراء والأسامى اللامعة انذاك  ودعا محمد رفعت وعلى محمود وعبدالفتاح الشعشاعى ومحمد السيفى وف الموعد المحدد بيدورا ع الشيخ رفعت .. ملقهوش راح فين يا ولاد ؟؟؟ اتارى الشيخ رفعت واحدة جارته ف البغالة ماتت وكانت غلبانة ومسابتش فلوس لعيالها يعملوا خارجة كويسة فالراجل اول ما سمع ساب كل حاجة وقام بالليلة وعمل السرادق وقعد يقرى وكانت ليلة ولما سألوه ازاى تسيب سنوية ف قصر عابدين وتيجى هنا رد قائلا لعل دعوة حد غلبان تكون مقبولة عن ربنا اكتر ! وعلى قد تواضعه وانصرافه عن الفلوس والجو الكبير دا الا ان علية القوم كانوا بيحرصوا على وجوده لدرجة ان ف مرة م المرات اسرة احد الوجهاء لما مات كبيرها بعتوا للشيخ رفعت لقوه مشغول يومين ورا بعض فقرروا يأجلوا العزا لليوم التالت عشان هوه لازم يحضره ويقرى ع المرحوم !!  وقصة تانية ودى بقى انكتبت ف اكتر من حتة مسخرة الصراحة عن مهراجا هندى اسمه عثمان على خان كان حاكم حيدر آباد وكان من اغنى اغنياء العالم ماله بقى بسلامته ... ؟    الجدع كان مش عارف يودى فلوسه فين وكان غنى غنى فاحش عارفين نجيب الريحانى ف فيلم سلامة ف خير اهو كان هوه بيجسده تقريبا وبجد مش هزار طلعت الشخصية دى موجودة فعلا ف الحياة !  المهم سى المهراجا عثمان بعت مندوب من طرفه للشيخ رفعت عشان يطلب منه ييبجى الهند ليه يا فندم ؟ قالك عشان تحيى شهر رمضان كله ف قصر عم الحاج خان والمهراجا بيعرض عليك 15 ألف جنيه ف الشهر بواقع 500 جنيه كل ليلة سنة كام الكلام دا يا عيال ؟ 1930 لما كان الجنيه جنيه يعنى حد يقولى تهريج وهجص ... ! اقولكم ابضننننننن اصلا المهراجا كان مصنف من اغنى اغنياء العالم وعنده ثورة خرافية المهممم الشيخ رفعت طبعا ولا الهوا ولا اتهزله شعرة ورفض بصنعة لطافة فالمندوب استغرب وبعدين رفع السعر للضعف وقاله 30 ألف يا شيخ فرفعت قاله مش مسألة فلوس يا بنى انتوا الجو عندكم حر وانا بتعب م السفر والتغيير ! فالمندوب رفع المبلغ لـ 45 ألف جنيه أخر كلام والشيخ رفعت رفض برضو وقاله متتعبش نفسك المندوب طبعا هيتفشخ لو رجع لسيده ايد ورا وايد قدام .. فأيه؟  حاول يستخدم نفوذه وعلاقاته بمسئولين ف الخارجية انهم يتوسطوله ويضغطوا ع الشيخ ويخلوه يوافق لكن طبعا هيهااااات وساطتهم اترفضت والحكاية انتهت على مفيش ابن الشيخ رفعت كان بيقول انه دايما كان بيسمع ابوه ف صلاة الفجر بيدعى ربنا انه يتوب عليه ويخليه يقرى دون مقابل كان عاوز يقرى لله وكان كل ما يعلو ف المكانة بسبب موهبته يبقى عاوز ميستغلهاش لصالحه ولو حتى بالحلال كان مقدر النعمة لحد ما بدأت الأذاعة المصرية وفكروا ف الشيخ رفعت عشان يقرى فيها القرآن جنب اغانى ام كلثوم وعبدالوهاب وراحوا كلموه فعلا وعرضوا عليه .. الشيخ وقتها توجس وقلق وطلب مهلة يفكر وراح لاحد كبار الحفاظ وشيخ من شيوخ الحسين العظام اسمه السمالوطى وطلب رأيه السمالوطى قاله اتكل ع الله وانها حلال رفعت كان مستحرم الحكاية وكان خايف ان القرآن يتساوى مع الأغنيات الخليعة او انه يتسمع من الراديو اللى شغال ف بارات وصالات قمار .. الخ ويبقى كدا هوه شال وزر الحكاية دى وانه ميرضهاش ابدا ومرعوب ... كانت اول مرة أصلها القرآن يقُرأ ف وسيط زى الاذاعة .. والأول كان ف المساجد او البيوت وممكن التحكم ف جمهورها لو تجاوز اما المستمعين اللى مش ظاهرين دول يعمل فيهم ايه ويتأكد ازاى من شرط الطهارة .... ؟!  القصد ... رد السمالوطى مطمنوش كفاية فراح لشيخ الازهر وكان وقتها الظواهرى وطلب مشورته شيخ الازهر اخد رفعت من ايده وخلاله يحسس على صندوق خشب كدا وقاله : تعرف دا ايه يا شيخ رفعت ؟ رد : معرفش ! قال : دا راديو واشتريته مخصوص عشان اسمعك فيه لما سمعت ان الأذاعة اختارتك!  وقاله كمان ان زبون البار أوالقمار وهوه قاعد ف الحتة دى مش هيشغل قرآن فمتخفش .. لكن فيه ملايين هتسمعك وانتا هتقدم خدمة عظيمة قصره رفعت خرج من عنده موافق وراح للأذاعة  ومن حفل افتتاح الأذاعة 1934 ف الأوبرا قال الممثل احمد سالم اول كلمتين "هنا القاهرة" وبعده قرى رفعت ما تيسر من سورة الفتح   وكان الشيخ رفعت اول من قرأ القرآن ف الإذاعة والناس المتخصصة بتقول ان الحكاية دى نفعت الإسلام على عكس ما كان هوه متخوف لأن صوته كان سفير وبسببه وبعدين استمع الملايين ف العالم مش بس مصر والدول العربية لهذه القيثارة وهيا بتشدو بكلمات الله  وكالعادة .. لازم يبقى فيه قلق شوية ف الأول وبعض القراء طلعوا بدوشة وهوليلة وان التلاوة ف الأذاعة بدعة وضلالة ومعرفش ايه !! راح شيخ الازهر جايبلهم م الآخر وطلع فتوى بأن التلاوة ف الأذاعة حلال .. حلال .. حلال وبعد الفتوى دى انضم اخرين للإذاعة هما كمان !  والغريب بقى ان الأذاعة رغم شعبية الشيخ رفعت ومحبينه والسميعة الا انهم مفكروش يسجلوله ابدا أى حاجة متعرفوش دى غلاسة ولا ايه بس يبدو ذلك الاذاعة كان فيها مديرين انجليز ومتحكمين ومسيطرين ورخمة كانوا بيغلسوا عليه ولما يطلب فنجان قهوة او ييجى يصلى مثلا كانوا بيرفضوا ويقولوا دى اذاعة مش قهوة ولا جامع وانتوا عارفين قواعد الانجليز الصارمة اللى مفيهاش قلب المهممممم برج التور بقى هيصبر واللى هيزيده صبر واصرار وعناد يكمل ان جوابات المستمعين والمحبين هتطالبه يقرى القرآن بتسلسل عشان يتابعوه ف كان بيلبى الطلب دا ولا يعرفشى يعرفشى ايه يا شهر؟  مكنش يعرف ان الإذاعة كانت مطنشاه ومبتسجلش تلاوته لكن كان فيه واحد من الجمهور ولا يعرفه شخصيا ولا عمرهم اتقابلوا هوه اللى هيضطلع للقيام بالمهمة دى وكان باشا ومليونير وعضو مجلس شيوخ وشارك طلعت حرب ف تأسيس بنك مصر وكان متجوز حفيدة على مبارك حبة افلام كدا كان اسمه زكريا مهران و الباشا بقى كان من عشاق الشيخ رفعت وعمرهم ما اتقابلوا ابدا لكن لما سمع انه هيقرى ف الإذاعة جاب جهازين على احدث طراز وكان بيسجل للشيخ وفرغ نفسه للمهمة دى اسبوعيا وفعلا سجل حاجات كتير له وكان محتفظ بيها ف قصره لحد ما عدى الوقت ورفعت اتخانق مع الاذاعة  وسبب الخلاف كان يبدو انه مادى وع الفلوس ودا مكنش حقيقى الشيخ رفعت كان شايف الأذاعة بتعامل المقرئين وكأنهم فئة أدنى واقل من المطربين والمطربات ..! ودا بالنسباله كان مرفوض تماما وراح منقطع عن التلاوة كما المعتاد وطبعا الدنيا قامت مقعدتشى وجوابات بالآلآف واحتجاجات واللطيف بقى ان كان فيه رابطة لتجار الأقباط وكانوا بيحبوا يسمعوا الشيخ رفعت وخصوصا ف تلاوته لسورة مريم ف انتفضوا وقتها وقالوا مش هندفع ضرايب وناس كتير بعتت للأذاعة تبستفهم على انهم فرطوا وزعلوا الشيخ والموضوع وصل للملك فاروق  الكلام دا كان سنة 1938 على فكرة ولازم نقول بقى .. ف خضم ذلك انه الملك فاروق الفلاتى الهلاس بتاع النسوان الخ الخ كما ذكر كتاب الثورة بوفرة وسخااااء كان بيحب يسمع القرآن جدا وكان بيهتم بشيوخه ويقدر مقاماتهم !  ولما انقطع الشيخ رفعت عن الإذاعة فاروق بعت لأمام مسجد الفتح الملكى ف عابدين وسأله ايه الحكاية والشيخ رفعت تعبان ولا ايه فقالوله..... لأ .... .gif "زعلان")  فالملك فاروق اتدخل وبعت ناس للإذاعة يقولهم لموا نفسيكو ورجعوا الراجل يا غجر :) نفذوا الأمر طبعا ورجعوه  و حد تانى كمان قبل فاروق اتدخل طه حسين يا عيال الراجل الجميل دا اللى مكنش بيهون عليه يشوف قامات محترمة ف البلد تتهان ويقعد ساكت اتدخل للوساطة اعترافا بمكانة الشيخ رفعت الروحية ف قلوب الناس وكمان عشان هوه كان قرين روحه ف كف البصر وكان اكتر واحد عارف ازاى دى حاجة مش سهلة ابدا بس طبعا وساطة طه حسين مأثرتش لكن الملك شخط فيهم اتلموا علطول ورجعوا الشيخ رفعت وبدأت مفاوضات والأذاعة ماطلت فيها وهنا تدخل الباشا مهران باشا اللى حكينا انه سجل للشيخ رفعت .. بعد مرض رفعت بس الكلام دا هيحصل بعد ما لحظة فارقة ف عمر الشيخ لما يبتدى يعانى من المرض وصوته يخونه :( الحكاية بدأت بتورم ف الحلق و كعادة برج التور مبيهتمش بصحته الا متأخر وتطورالموضوع شوية بشوية واكتشفوا انه ورم ف الحنجرة وانتشر ف الجسم كله بعد كدا .. عبدالوهاب بيقول انه لما صوت الشيخ رفعت اتحبس الإشاعات طلعت ان حساده دسوله السم وانه معرفش ايه وحاجات غريبة كدا لكنه كان مرض واستفحل .. وفقط  وكمال النجمى رئيس تحرير مجلة الهلال حضر لحظة اعتزال الشيخ رفعت بنفسه وحكاها بالتفصيل وقال الآتى اليوم كان يوم جمعة والناس اتلمت ف مسجد فاضل عشان تسمع رفعت كالعادة  النجمى راح قبل المعاد ولحقله مكان قرب الشيخ الكلام دا كان سنة 1943 يا ولاد الشيخ رفعت حضر وبدأ يتلو ما تيسر من سورة الكهف وفجأة جاتله زغطة وحاول يقاومها عشان يكمل لكن .. الزغطة زادت وبقت ورا بعضها فسكت ووطى راسه ومبقاش عارف يعمل ايه  وشرب منها وطاوعه صوته ف آيتين لكن ف التالتة الزغطة رجعت وصوته انحاش فمقدرش يكمل وبعدين قعد دقيقة ساكت وبعدين قام من مطرحه يائسا حزين وساب المكان لمقرىء تانى من المسجد النجمى بيحكى ان اللحظة دى ازاى كانت موجعة لدرجة ان اللى ف المسجد صوتهم على بالبكا حتى صغار القراء اللى كانوا بيحضروا عشان يتعلموا م الشيخ والشاب اللى قعد مكان الشيخ رفعت حاول يهدى ف الناس وف وسط الكلام بأدق وصف ف اللغة كدا (اجهش) ف البكاء والموقف بقى قاتل وكأنه الجمعة الحزينة دى كما سماها النجمى كانت ليلة وداع وسرادق عزاء لصوت الشيخ رفعت او حفل اعتزال قسرى ارغم عليه سيد المقرئين واجملهم والناس بكته بكل صدق حزنا على الفراق  الشيخ رفعت بعد الواقعة دى قعد سنين رهين المرض ف البداية العلاج كان مكلف وخلص على كل مدخراته وبعدين ابتدى الخبر ينتشر  ومجلة المصور وقتها عملت تحقيق كبير واكتتاب تدعو فيه كل محبين الشيخ لجمع مصاريف علاجه باعتباره ثروة قومية واشتركت ف الحملة وزراة الاوقاف وجماعة القراء وشخصيات من علية القوم ومحبين الشيخ ومريديه وجمعوا ما يقارب الـ 50 ألف جنيه لكن ..الشيخ رفعت لما سمع عن الحملة والرقم وغيره من جهود رفض الفلوس بأدب وقال معلش وانا زى سيدنا أيوب وكل اللى من عند ربنا كويس وعزة نفسه غلبته من البداية .... للنهاية  وقعد ف البيت يصرف من المتبقى من ماله ويبيع ف حاجات متعففا عن الوف الجنيهات لأنه مش عاوز يهين القرآن ويقبل أى مال من حد وبيقولوا ان وزارة الاوقاف وقتها اختشت على دمها وعملتله معاش شهرى 10 جنيه ومعرفش صحيح الكلام دا ولا لأ بس ف كل الاحوال هما ربنا ياخدهم كمان وكمان  وقعد الشيخ رفعت يصبر ويقول يارب لحد ما ف يوم صحى قبل الفجر طلب مية يشربها وسأل عن كل اولاده ثم فاضت روحه وراحت لربها  الكلام دا كان تحديدا ف 9 مايو 1950 يعنى توفى ف نفس يوم ميلاده 9 مايو برضو والخبر لما انتشر ف الطرق والحارات حصل قلق كبيروالناس هاجت والحكومة خافت وبيقولوا انهم بسرعة قفلوا الشوارع المؤدية لبيت الشيخ وحرصوا على دفنه بسرعة عشان ميحصلش هرج اكبر وشوف ربنا لما بيحب عبد ويكرمه  اولاد الشيخ رفعت كانوا ناويين يدفنوه ف المنوفية ف مدافن اهل مراته عشان كانت من هناك بس فجأة وبعد الغسل والترتيبات لقوا واحد جايلهم كان جزار موسر كدا وربنا فاتح عليه من وسع قالهم الآتى انا عامل مدفن للشيخ رفعت من بدرى والمطرح مستنيه يتبارك بيه وارجوكم ادفنوه هنا ومتبعدوش عننا خلونا نقدر نروح نزوره والغلابة يقروله الفاتحة لكن لو بعدتوه هتحرمونا منه والمدفن كان قرب السيدة نفيسة ولاد الشيخ مقدروش يرفضوا العرض وكأن الأرض ندهته ولما راحوا لقوا كل حاجة جاهزة فعلا و اتارى الجزار لما سمع بمرض الشيخ من كام سنة عمل حسابه واستعد للحظة دى ... !! واولاد الشيخ فوجئوا كمان بعد الوفاة ان عنده خزنة ف بنك مصر باسمه وراحوا مع مندوب من الضرايب وموظف البنك عشان بفتحوها لقوا فيها ايه تفتكروا ؟؟ لقوا روشتة دكتور وساعة ايد ومصحف .... وبس !  وربنا جعل الشيخ رفعت سبب ف خير لناس كتير وعز الإسلام بيه وبيقولوا ان كان فيه سواق تروماى دنماركى كان بيعدى جنب المسجد بتاع فاضل باشا وكان بيقف عشان يسمع الشيخ رفعت وعمل الحكاية دى كتير لدرجة انه اتجازى وبرضو كررها ويقال ان السواق ف اخر عمره ... اسلم واحد تانى بيحكوا عنه ضابط ف الجيش الامريكى سمع الشيخ رفعت واعلن اسلامه وجه الاذاعة مخصوص عشان يسلم ع الشيخ ويقوله انه كان سبب ف كدا  ومش بس دول العالم كله بعد نص قرن واكتر بقى بضغطة زر يقدر يسمعه واللى اتحرم من نور عينيه هيبقى سبب ف انه يلقى النور ف قلوب الملايين  وكلمة ابوه كانت صح .. انه هيشوف بقلبه اللى مش هيقدر يشوفه بعينيه وانا تقريبا خلصت وباقى بس اقول شوية حاجات تخصنى واعتقد ان كتير منكم زى حالاتى انا فتحت عينى وودانى من وانا عيلة على صوت الراجل الجميل دا وانا بيصحونى الصبح اروح المدرسة فسمع حسه ف اذاعة الشرق الاوسط .. يوماتى  الشيخ رفعت عندى .. لما كبرت شوية كان يعنى رمضان شهر رمضان اللى مينفعش يكون من غيره قبل الفطار ووقت الآدان ومصطفى محمود قال وكأنه يكتبنا جميعا "كلما جاء رمضان اتذكر صوتا وحيدا كان يقرأ القرآن صوتا ليس له اخ ولا مثيل ولا شبيه هو صوت الشيخ رفعت " صح ... وكلام هذا الجدع يمثلنى وصحيح مكتش بفهم كلام كتير م اللى بيقوله بس صوته كان بيشدنى كان صوت حنون مش بيخوف حتى ف الآيات اللى فيها كلام عن النار والعقاب كان حسه وكأنه بيحضن كدا ويطمن ولما كبرت بقيت اتمعن ف الكلام واحاول افهم ويستوقفنى كلمات وجمل واحاول اعرف معناها وادور واشوف لكن مريت الاول بمرحلة المحبة انك تحب حاجة من غير ما تعرف سببها او تفسيرها او معناها او قيمتها انتا بتحبها عشان حد علمك بسلاسة ومن غير كلاكيع ورخامة وغصب ... انك تحبها ! وبقيت كل ما اكبر اكتر .. احب صوته اكتر .. واشوف فيه حاجات مشوفتهاش واحب ربنا فيه وعن طريقه وفيه ايه اجمل من كدا ف الدنيا ... ؟!! واوقات بجد ومش هزار ولا مبالغة بيتهيألى ساعات كدا لو ربنا كرمنى من وسع ودخلت الجنة أظن انى هسمع صوت الشيخ محمد رفعت فيها  وييجوا ناس كتير من بعده حلوين ومبدعين وموهوبين لكن يفضل هوه زايد عنهم حتة بسبب الذكريات والحنية والدفا اللى ف صوته واخيراااا أقول الملاحظات . اولها ان بعض الضباط زمان ف مصر كان بيطلع من ضهرهم مقرئين #كان _زماااااااااان بصوت_عبمنعم_مدبولى 2) الناس زماااان ف الافراح والليالى الملاح كانت بتجيب حد يقرى قرآن مش بتجيب صافيناز واوكا وارتيجا وسعد الصغنن اتارى جوزات زمان كان فيها بركة وبتعمر ؟!  3) نسيت اقول ان لولا تسجيلات الباشا زكريا مهران مكنش صوت الشيخ رفعت وصلنا منه أى حاجة زائد واحد من السميعة وكان على قد حالته وسجل شوية حاجات برضو ومحمود السعدنى قال بوضوح ان الأذاعة مكنلهاش اى فضل على الحفاظ على ما رتله الشيخ رفعت لكن فقط المحبين اللى لهم الفضل بعد ربنا لما مات الباشا مهران حصلت خلافات بين الورثة بتوعه لكن اولاد الشيخ رفعت راحوا لأرملته وعرفوا يلاقوا بعض الاسطوانات والباقى اتلملم من مزادات والمحبين على مر الزمن ولحد صوت القاهرة ما اتاحت كل الموجود وبقى ممكن ينباع وينسمع فربنا يرحم كل من شارك ف جمع كل ما تبقى من تلاوة الشيخ رفعت ويجاريهم عنا كل الخير  4) مدفن الشيخ رفعت بيعانى من الاهمال كعادة أى مكان يستحق التكريم ف مصر .. حاليا لكن قصة المدفن نفسه علامة واشارة عن ربنا لما بيحب عبد  5) الناس بتوع زمان اجتمعوا على ان التسجيلات اللى بنسمعها دى للشيخ كانت ف وقت المرض لكن ف بداياته صوته كان اقوى واحلى يا لهوى تخيلوا لما احنا بنحبه ومنبهرين بالاداء الحالى لتسجيلات الغير متقنة ولا محترفة اومال لو كنا سمعناه زمان كان هيحصل ايه .. ! 6) الشيخ رفعت ف نظرى يمثل الأسلام الحق الراجل صبر ع المحن من صغره ورضى بكل ما جاء واللى اتقسمله وصان نعم الله عليه وترفع دا التدين الحقيقى بالنسبالى انك تؤمن بالله وتسلم امرك له فعلا وبالسلوك ... مش القول وفقط  وعشان هوه كان صادق وبيعمل كل حاجة لوجه الله وبيتنفس القرآن وبيعمل بيه ربنا خلاه سبب انه يحببنا ف الله ونحبه ف الله بعد اكتر من نص قرن ولسه لأجيال جاية بأذن الله  7) الشيخ رفعت كان بيسمع القرآن من واحدة اسمها اسمهان طب يعنى مش حرام ولا صوت المرأة عورة ولا بتاع طبعا الست دى لو موجودة دلوقتى معرفش ممكن يعملوا فيها ايه .. ؟  8) الشيخ رفعت كان بيسمع الكفرة بتوع المزيكا بتوع اروبا اهو ولأ وكان بيعزف ع العود يعنى المزيكا مكنتش حرام ولهو والحاجات دى .. !  9) لأ .. وكمااااااان كان صديق لنجيب الريحانى وبديع خيرى ومحمد عبد الوهاب وام كلثوم .. ! طب الموضوع دا مبيديش أى اشارة لأى حاجة ف أى حتة ..؟  10) مسجد فاضل اللى كان الشيخ رفعت بيقرى فيه من بداياته ولحد اخر مرة قبل مرضه المسجد اصلا كان بتاع امير مملوكى اسمه بشتك كان راجل عرة ومزعج وطماع اخد فلوس سيده بعد ما مات وورثه ف كل حاجة حتى مراته وجواريه وكان غاوى سهر وهلس وبنى قصر وبعدين مسجد ملحق بكتاب عشان يغسل ذنوبه  قوم جت الوالدة باشا ام الخديوى سماعين ف يوم وقررت تجدد المسجد وقبل الافتتاح شالوا اسم بشتك وحطت اسم ابنها مصطفى فاضل كدا عينى عينك ولطشوا المسجد اللى اصلا مبنى بفلوش ملطوشة م الشعب المصرى البائس  وروح يا زمان وتعالى يا زمان يشاء المسع العليم ان الشيخ رفعت يبقى درة هذا المكان وينعرف المسجد باسمه هوه ودلوقتى أى حد معدى جنب مسجد فاضل باشا وتسأله مسجد ايه دا فيقولك مسجد الشيخ محمد رفعت :)  11) الأسود ... اه .. ايه حوار الاسود دا طب الشيخ رفعت لو شاف سباع الجونينة دلوقتى وحالتهم الكرب مش هيسمع زئير ولكنه هيسمع نحييييييييييب واكيد من رقة قلبه كان هيعيط جنبهم وعليهم من قلب قلبه والله ... واخيراااااااااااا تعرف ازاى ان ربنا بيحب عبد وتتأكد ؟ بسيطة ...لما تلاقيه كل ما يعدى العمر عليه بدل الناس ما تنساه .. بتفتكره وتدعيله وتحبه انهى باحدى مقولات الشيخ رفعت : المتدثرون بغير الله غرباء والمعتزون بغير الله أذلة واللائذون بغير الله فى قلق يبدأ ولا ينتهى تصبحوا على ألف خير المواضيع المتشابهه: 
|
|
11-01-2017
|
#6 | |
 
|
بسم الله الرحمن الرحيم
السلام عليكم ورحمة الله وبركاته من اروع الموضوعات التى قرأتها وطبعا يذكرنا برمضان وايامه الجميله مع اذان المغرب وقرآن المغرب وصوته الرائع اشكرك اختى الرائعه تمرد لروعة انتقائك الشيخ محمد رفعت عليه الف مليون رحمة كان من اهم المقرأين فى وقتها ومازال استاذ الكثيرون الى الان ومازال صوته الرنان يرن فى الاذان وسيظل الى ماشاء الله تقييمى واعجابى وشكرا لتمرد الرائعه  |
|
|
|
|
| كاتب الموضوع | انثى متمرده | مشاركات | 9 | المشاهدات | 3428 |
|  |
| انشر الموضوع |
(عرض التفاصيل)
عدد الأعضاء الذين شاهدوا الموضوع : 1
(إعادة تعين)
|
|
العرض العادي
|
|
الساعة الآن 01:01 AM بتوقيت الرياض
Designed and Developed by : Jinan al.klmah