| ~{فعاليات منتديات وهج الذكرى}~ | |
|
|
|
|
|
|||||||
| ❀ ✿ وهج الحضارة والتأريخ❀ ✿ قصاصات من التراث والحضارات القديمة وأدابها |
 |
|
|
|
أدوات الموضوع | انواع عرض الموضوع |
|
#1
10-15-2017
|
||||||||||||||
|
||||||||||||||
أحكى يا شهرزاد..عامود السوارى
عــــامـــود الســـوارى
 حكاية النهاردة عن أثر ف مكان من أحب الأماكن لقلبى اسكندرية الماريا ام تراب زعفران  القصة النهاردة عن "عامود السوارى " أو "عامود بومبى" أو "عامود دقلديانوس" وهنقول اسباب اختلاف التسميات ومناسبتها .. بعد قليل بس قبل ما نحكى العامود دا جه ازاى ف الحتة دى لازم نقول الاول الحتة دى كان فيها ايه من قبل ما ينوجد !  ويحكى ان الأسكندر الاكبر اللى الظاهر كان عارف يا كبدى انه هيموت ف عز شبابه قام خرج من بلده يغزو العالم ويتبنيله ف كل مكان .. مدينة باسمه تكريماً وهتتبنى مدينة الأسكندرية ف مصر عشان تبقى درة العالم القديم ونوارة عيوننا وقلبنا لحد اليوم والماريا كان بيحكمها ف توقيت ما البطالمة حلو ؟ قوم ايه ؟ الأخ بطليموس الأول لقى المصريين عندهم عقيدة راسخة وتمسك رهيب بالألهة بتاعتهم وجو تمسك منى بتراثى يا شربات فقالك كدا مينفعشى لازم نروضهم وناخدهم ف صفنا راح عامل قعر مجلس مع رجالته ولم علماء دين كهنة اغريق على مصريين وقالهم اعملولنا اله حلو كدا على ذوقكم من وش القفص و يجمع بين الأتنين عندنا وعندكم عشان نقرب ما بين الطرفين ويعرفوا يتعايشوا ويبقى زيتنا ف دقيقنا قاموا اتجمعوا وبحثوا وعملوا اله سموه سيرابيس او سيرابيسو الثالثوث المقدس  الحاج سرابيس او سيرابيسوالثالوث المقدس يتكون من خليط من (سيرابيس وايزيس وحربوقراط) 3×1 زى الغسالات تغسل وتشطف وتنشف  وقالوا يبقى هوه العنصر المشترك ونلعب بيه ف دماغ المصراوة حبتين وبنالوه معبد فخيم سموه السرابيوم ولحد دلوقتى احنا حلوين  ومعندناش رسمة للأسف للمعبد لكن عندنا وصف دقيق له وبناء عليه رسموه المؤرخين  وحديثا عملوا صور تخيلية كدا لسعادته  الشاهد بيقول انه كان حاجة ابهة قوى ومليان اعمدة هنحكى عنها كمان هبابة  كان موقعه فين يا شوشو السرابيوم ده ؟؟ حاليا ف حى كرموز على هو تل راكوتيس او راقودة القرية التى اتأسست علي اطلالها اسكندرية سنة 332 ق.م  القصد المعبد اتبنى وبقى حاجة فُللى قوى وبقى عامل زى الأزهر عندنا كدا ف عز بهائه ومجده كان السرابيوم معبد وجامعة وكانت بتتاخد فيه الدروس وتقام المناقشات والندوات ولما مكتبة الاسكندرية اتحرقت ايام غزو يوليوس قيصر مكتبة السرابيوم قامت بالواجب وزيادة  وروح يا زمااان وتعالى يا زماااان ومشى قياصرة وجه اباطرة وجالنا من وسط المستخبى واحد اسمه دقلديانوس ربنا ياخده ليه يا شهروزة .gif "زعلان") ة منه كدا عمل ايه اللى ينوكس ..؟!! ولا حاجة دا كان راجل سُكرة يتحط ع الجرح يولع الأخ كان عبد تم ضمه لصفوف الجيش والظاهر اتروق هناك وبيطلع علينا عُقده بقى لما اترقى ف المناصب حبة حبة وبعدين بقى رئيس الحرس الجمهورى وهوووووب اختاروه العسكر واترقى من فريق لمشير يوه ... قصدى بقى من رئيس الحرس لامبراطور والولا زى ما قولنا شبعة من بعد جوعة وهيطلع كلاكيعه علينا وكانت المسيحية بدأت ف الانتشار ومبقاش فيه فايدة من مقاومتها فتم الاعتراف بيها من الامبراطورية الرومانية بالغصب والمسيحيين شموا نفسهم والمدهول عمل عيشة ف البدايات وكان كويس ولطيف وبعدين لما اتمسكن لحد ما اتمكن راح غادر بيهم وبدأ يضطهدهم ف كل مكان وطبعا مصر ومسيحيوها نالها م الوجع جانب  الحقيقة ان مسيحيو مصر نالهم من الاذى الكتير الوغد جيشه ارتكب المذابح والبشاعات لدرجة ان المصريين هيخلدوا الذكرى دى وهيبدأ التقويم القبطى بأشهر المدابح اللى عملها دقلديانوس ف مصر ويسمى عهده بـ "عصر الشهداء" من كتر اللى ماتوا بسبب تجبره وغيه  والشهادة لله الراجل كان حنين الاول طلع مراسيم بحرق الاناجيل و الكتب الدينية ومنع المسيحين من أى تجمعات دينية أواقامة اى طقوس تخص المسيحية وبعدين لما لقى مفيش استجابة راح مصعد ف الخطوات وأصدر مرسوم يأمر المسيحيين رجال ونساء واطفال بتقديم قرابين ف المعابد والارتداد الدينى علنا ولما لقى الناس رافضة ترجع عن دينها الجديد ومتمسكة بالمسيحية ابتدى بقى الفصل التالت اللى كله قتل وحرق وتعذيب للرهبان والراهبات والناس العادية المؤمنة والمؤيدة واخترعلوهم الات تعذيب مخصوص زى " الهنبازين" ودى بعيد عنكم اله كدا بتعصر أى عضو ف جسم البنى آدم وتخليه كفتة ... ! واللى يبحث يلاقى حكايات كتير عن شخصيات اتعرضت للتعذيب زى القديسة دميانة وغيرها عشرات القصص عن الصمود ف وش المفترى والتمسك بالعقيدة للنهاية قصره .. زفت الطين كان الامبراطور غصبن عننا واذ فجأتن كدا وبلا سابق معاد قامت ف اسكندرية ثورة :))) هل بت ما الشعب اللى قام بيها يا شهرو ؟!! والله يا عيال كان بودى أقول ايوه لكن الحكاية بدأت من جنرال ف الحامية الرومانية بأسكنكرية دوميتيوس دوميتيانوس ... دا كان اسمه وكان معاه واحد تانى زميل برضو والأتنين الظاهر حد لعب ف نافوخهم فقالوا هيا نستقل باسكندرية عن الامبراطورية !! بس ودومتى .. هدلعه بقى عشان اسمه طويل قوى والواحد نفسه قصير :) الواد دومتى قام بالثورة وقال لـ دقلديانوس اجرى يااض  الكلام دا كان سنة 295م لما ابو الدقاليل وصله الخبر وطبعا انتوا عارفينه تقبل .. طبعا .. الموضوع ... بصدر .. رحب #ضحكة_رقيعة بس وراح لامم عساكره ونزلوا على تحت عشان يرحب بخطوة الأستشيكلاااال دى ويقول لدومتى مبروك عليك يا ابو سامية ... حلو ؟ لأ مش حلو طبعا عشان الموكوس هيوصل لاسكندرية ويحاصرها قد ايه ؟ بيقولوا من 7 لـ 8 شهور بحالهم يا ثااامح لا مية ولا اكل وبنى آدم ولا ناموسة تدخل او تخرج وبيقال ان دقلديانوس كان يقدر يدخل اسكندرية عنوة ويخلص المسألة لكن هوه قرر يدى البلد درس ويوريهم الويل عشان يحرموا يعملوا ثورات تانى بس وجابت خطته نتيجة والمجاعة بهدلت المدينة وسكانها وانتشرت الاوبئة والحال بقى بؤس البؤس والنيلة دقلديانوس ياخويا اصلا جايلنا شايل ومعّبى قوم هجم ع اسكندرية فجأة وهيا بتترنح وطاح ف سكانها قتل وتعذيب وف النهاية قتل دومتى وزميله  وعين والى جديد لمصر بدل الموكوس اللى قامت عليه ثورة من جنرال ف حاميته وبعدين بيقولك ايه بقى آل دقلديانوس آل عمل جولة تفقدية ف المدينة وبيقولك يا نضرى .. يا كبدى .. يا ضينايا اتنأثر قوى قوى من تردى الحال وصوعبت عليه احوال الرعية فقرر يسترضيهم .. ! ازاى يا ابو الدقاليل هتراضيهم ؟ قالك هيا مش مصر بتبعت حصة من القمح للامبراطورية ؟؟ خلاص بلاش المرة دى وسيبوه للناس تاكل وتنبسط:))  دا على اساس ان مش انتا اللى مجوعهم يا دقلا ؟؟ وعلى اساس ان القمح دا بيتاخد بالرضا وبتدفعوا حقه ؟؟ القصد الجدع ابن حلال وطيب واحنا استهبلناه الصراحة واخدنا منه قمحنا وخليناه يعوضنا عن تجويعنا وقتلنا وطول عمرنا النباهة بتفط من حبابى عينينا وبنعرف ناخد حقنا بس وعمل دقلديانوس شوية تغييرات ادارية وقسم مصر ل3 اجزاء اقليم شرق الدلتا وغرب الدلتا والجنوب و جو اتوبيسات وكدا وبعدين خلاص هيمشى اهو ومروح ف داهية قوم يقرر والى مصر الجديد وكان اسمه بوستيموس انه يعمل حاجة كدا على قد ما قسم للحاج دقلة وتذكار للأيام العزييييمة اللى عاشتها اسكندرية تحت ظله هل بت ما هتعملوله خازوق يا ولاد وتقعدوه فوقيه ؟ ولا تغرقوه ف المالح ؟ ولا هتقعدوه ع الهنبازين ؟ ايه ؟ قالك لأ .. دحنا هنعمله عامود يخرق السما كدا من كتر علوه ونحطه ف معبد السرابيوم عشان نخلد اللحظة التاريخية دى من عمر الوتن  بس يا سيدى وبعتوا أسوان جابوا حتة جرانيت حمراااااء اللون ومن حتة واحدة نحتوا العامود الشهير  واليكم المقاييس الآتية الأرتفاع : 20 متر و75 سم ارتفاعه لو ضفنا القاعدة والتاج : 26 و85 سم  ومن تحت أعرض من فوق فبالتالى القطر مختلف فوق عن تحت فوق أقل طبعا  ومكتوب ع القاعدة الآتى " تذكار من مدينة الاسكندرية اقامه الحام بوستيموس للأمبراطور دقاديانوس الذى لا يقهر اعترافا بفضله عليها "  آحبايبى .. الراجل هرسنا وداس علينا بالقطر وتقولوا .. اعترافا بفضله !! جاكتو نييييلة #مارى_منيب_استايل  وبيقولوا .. بيقولوا محدش متأكد ان العامود مكنش زى الخازوق كدا دول كانوا حاطين تمثال للمخسوف دقلا على قمته آل يعنى احنا كنا ناقصين نشوف خلقته ف الراحة والجاية ... !  بس التمثال راح ف الوبا ومحدش عتر فيه ليه يا ترى .. هل بت ما حد كان موتضايق منه مثلا ... فوقعه وكسره.. لأ يا شهرو اخص عليكى متبقيش ظنانة وويحشة #ضحكة_رقيعة_2 المختصر دقلديانوس الوغد غار على بلاده وبيقولوا اعتزل الحكم بعد فترة وانكف بصره ف حادث ومات بائسا تلاحقه لعنات الشهداء اللى اتقتلوا بأمره ف كل مكان افلام هندى كدا المهم ... نرجع لعامودنا المسيحية هتاخد وضعها بمرور الوقت واسكندرية تحديدا هتكون ست المدن ف هذا الشان وبعد شوية المعابد الوثنية هتكون محل رفض ورغبة ف الأزاحة والهدم من اهل الدين الجديد قوم ايه ؟  هتحصل اضطرابات وثورات متعاقبة وهيكون نصيب معبد السرايبوم اللى جواه العامود الهدم والتحطيم لحد ما يتلاشى شوية بشوية وميتبقاش غير ايه ؟ ايووون ميتبقاش الا الاطلال وشوية العواميد وممرات تحت الأرض وكلام فارغ لكن يتفضل العامود شامخ راسخ مبيتهزش وروح يا زمان وتعالى يا زمان وعمرو بن العاص الداهية يزغلل عين سيدنا عمر بن الخطاب بدخول مصر وييجى على راس جيش واهل اسكندرية تستقبله وتساعده ف طرد المحتل القديم وترحب بيهم كمحتل جديد وتتعاقب الدول والخلافات وبيقولوا ان اسكنكرية تقلصت حدودها ايام العرب ولما جه الحاج احمد بن طولون وجدد بناء سورها استبعد منطقتين قالك احنا نبنى السور ف المناطق الآهلة بالسكان لكن شرق المدينة فيه مقابر اليونان والرومان والناس ميتة وشبعت موت فملناش دعوة بيهم يا موهيى اما المنطقة الجنوبية ففيها مزارات وبقية من اطلال معبد السرابيوم واطلال بيوت قديمة ومتهدمة فمش هندخلها ضمن السور هيا روخرا  وطبعا ف المنطقة دى عامود السوارى اللى كان واقف صامد ولا بيشتكى وقصاد منه اتعمل باب سدرة اشمعنى سدرة يعنى يا شهرو ؟؟؟ قالك عشان كانت الحتة دى كان فيها شجرة كبيرة عجوزة من نبات السدر فاتسمى الباب باسمها و ناس تانية قالت عليه .. باب العامود نسبة لعامودنا العزيز  وجه بعد الطولونيين الأخشيديين ثم حضر من المغرب جوهر الصقلى واستعد لمجى كبير الفاطميين المعز لدين وورث ابنه من بعده ثم ورث الحفيد ثم ابن الحفيد اللى ف عهده جه بدر الدين الجمالى لمصر  وبنى مسجد العطارين اللى هتلاقوه العامود بيبص عليه ونيجى بقى للتسمية الحقيقة ان العرب سموا اطلال السرابيوم قصر الاسكندرية وسموا عامود دقلديانوس .. عامود السوارى طب ليه ؟  قالك عشان العامود كان واقف ف النص ما بين اعمدة السرابيوم التانية كما صارى السفينة كدا الغريب اكتر انهم بيقولوا ان الاعمدة دى كانت .. 400 !! عبد اللطيف البغدادى الرحالة الشهير هوه اللى بيقول انه لما زار مصر أيام الملك العادل اخو صلاح الدين زار اسكندرية وشاف بعينه المأساة :(بيحكى اهو بنفسه "ثم انى رأيت بشاطىء البحر مما يلى سور المدينة اكثر من اربعمائة عمود مكسرة انصافا واثلاثا حجرها من جنس حجر عمود السوارى على الثلث منه او الربع وزعم اهل الاسكندرية قاطبة انها كانت منتصبة حول عامود السوارى وان بعض ولاة الاسكندربة واسمه قراجا كان واليا عم يوسف بن ايوب فرأى هدم هذه السوارى وتكسيرها والقاها بشاطىء البحر زعم ان ذلك يكسر سورة الموج عن سور المدينة أو انه يمنع مراكب العدو ان تستند اليه وهذا من عبث الولدان ومن مفعل لا يفرق بين المصلحة والمفسدة" الله يفتح عليك يا ابو اللطاطيف  انا بحاول اتخيل ازاى كانوااااا .. 400 عامود يا ثاااامح ! والأسوأ بتخيل شكل اللى جاله قلب يقطعهم ويرميهم ف المالح !! المقريزى زكريا بيقول برضو وبيحكى عن عامود السوارى انه " مكان حوله اربعمائة عمود كسرها قراجا والى الاسكندرية ايام السلطان صلاح الدين يوسف بن ايوب ورماها بشاطىء البحر ليوعر على العدو سلوكه اذا قدموا "  طيب كدا العهدة عليهم ان كان فيه فعلا 400 عامود واترموا ف المية كتر خيرهم انهم سابوا عامود السوارى بقى ومترماش هوه روخر ولا تلاقيهم مقدروش يزحزحوه من مطرحه فعشان كدا سابوه #غالبا  واشمعنى البغدادى بس اللى هيقول لازم ابن بطوطة هوه كمان يدلى بدلوه ويوصف عامود السوارى اثناء زيارته للأسكندرية ولكن ... بمزيد من التحفط قائلا " ومن غرائب هذه المدينة (الاسكندرية) عمود الرخام الهائل الذي بخارجها المسمى عندهم بعمود السواري وهو متوسط في غابة نخل وقد امتاز عن شجراتها سمواً وارتفاعاً وهو قطعة واحدة محكمة النحت قد أقيم على قواعد حجارة مربعة أمثال الدكاكين العظيمة ... ولا تعرف كيفية وضعه هنالك ولا يتحقق من وضعه " يا تقيل ياراسى  واللطيف انه حكى عن واقعة ان واحد جه فجأة كدا بسهم وقوس وربط حبل ف السهم وحدف السهم لقمة العامود ونزل السهم بالحبل م الناحية التانية وانه طلع ماسك الحبل لحد قمة العامود وقعد وبعدين صاحب له طلعله بعد شوية وقعدوا فوق ف الطراوة هما الجوز ومحدش فهم عاوزين ايه ولا ايه حكايتهم !!!!  القصد .. عامود السوارى اللى كان عامود دقلديانوس اشتهر كمان باسم عامود بومبى ودا كان عسكرى شهير بيقولوا هرب على مصر ايام يوليوس قيصر واتقتل واخدوا راسه حطوها فى جرة معتبرة كدا وبيقولوا اتحطت على قمة العامود من فوق ..! محدش من المؤرخين عنده تأكيد للقصة دى لكن الغريب بقى ان تسمية عامود بومبى دى فضلت لازقة ف الأثر دا لحد وقت قريب جدا وهتلاقوها مكتوبة على الكروت البوستال والكتب والمراجع  والتسمية الأشهر لزقت خلاص لكن على ميييين ؟!!! العامود عامودنا والصارى بتاعنا بوبمى ملوش فيه واللى هيقرب حمو هينده كّنى من ع الإمة ببقية العيال وهنقطعوهم  وروح يا زماااان وتعالى يا زمان وييجى المماليك .. الشيك .. الرومانيتك والعامود على حاله برا اسوار المدينة وييجى من بعدهم العثمانيين واسكندرية ف عهدهم هتشوف اسوأ ايامها فقر وبؤس واهمال لحد ما تبقى لقمة طرية يمضغها جيش الفرنساوية ويبتدى العلماء اللى جم مع بونابرته بسهولة ويحتلها ف قياس وحصر وجمع معلومات عن كل شىء ف مصر وكان منهم آثارها  وهنشوف رسمة لعملية قياس عامود السوارى بريشة فيفان دينون ف يوليو 1798 وهنشوف ازى تم قياس طول العامود عن طريق طيارة ورق #بتاعت علاء عبخالق دى ؟  ومشى الفرنساوية ورجعوا العثمانلية لوقت قصير عشان سنة 1805 يوصل محمد على سنكفولة الى الحكم ويرقدلنا فيها هوه وعياله واحفاده بقى .. الشهادة لله .. الاسرة العلوية لحد الخديوى اسماعيل وسماعين نفسه بذات سخصيته كانوا بيعتبروا الآثار دى كلام فارغ كدا وملهاش لزوم حد يعبرها ! لحد ما ييجى اجانب كتير لمصر ف عهد اسماعيل ويغيروا الحالة الثقافية شوية ويبتدى الاهتمام بالآثار على اختلاف عصورها  ومرة هنحكى حكاية الأثار دى بس الشاهد ان العامود لضخامته وصعوبة نقله كانت دى نقطة قوته ومصدر بقائه لحد اليوم #الحمدلله انا عمرى ما شفته عن قرب بس من الصور استوعبت ازاى هوه ضخم وعظيم  زائد وجوده على تل فدا خلاه عالى اكتر واكتر     عامود السوارى الصراحة اخد حقه من التكريم المعنوى زمان بكمية الصور    وكروت البوستال تشهد بكدا  ومن كل زاوية واتجاه جابوه وصوروه  رسموه  وبعتوه الاجانب لأهلهم ولأصحابهم    ومن صور زمان ... ننتقل للحاضر     لحد ما تيجى عيون ناس دلوقتى  وتصوره من كل ناحية واتجاه بعين جديدة وشكل تانى     وبيقولوا ان التمثالين اللى محاوطين بالعامود دول .. لأبو الهول  ويقال ان كان فيه تماثيل يااااااما يا ايسااااامة بس كله بالسلامة .. اللى اهمل واتكسر واللى اتشون واتاخد على برا برا  والعامود زى ما بيبص على مقابر المسلمين  ف كوم الشقافة   كمان بيبص على جزء من المدينة ولكم ان تتخيلوا الفرق من زمان والآن  وطبعا العامود اتبهدل زى اى حاجة قيمة ف البلد دى رغم انهم بيقولوا انه تقريبا - الناس المتخصصة تصححلى - يعد اقدم أثر اسكندرانى باقى من حقبته وزمنه والجدع قاعد ماسك نفسه ومستحمل كل القرف من سنة 270 ميلادى تقريبا ولحد النهاردة .. ربنا يديه الصحة وطولة العمر :)   المنطقة كلها عانت من المياه الجوفية والأهمال والمرمطة غير ان بقى اجرد من أى زرع مع انه زمان ف صور كان فيه خضرة حواليه راحت فين الحاجات دى وهل فعلا زى فيلم احمد حلمى بقت المنطقة مشاع لأى حد ولأى حاجة .. ؟!  وبيقولوا عملوا اعادة ترميم وحاجات كدا بس هل عملوا اعادة ترميم للعقول ولكيفية الاستفادة من أثر عظيم دى دا ؟! #مطنش  وربنا ينفخ ف صورتك يا عامود السوارى يا بنى ويخليك لينا ياااارب #قولوا_آمين  شيفاك يلى مقولتش وعارفاك وهجيبك #بتزغر  ابو الهول أفندى  قمة العامود  مدخل المكان وتوتة توتة خلصنا ... نقول الملاحظات  1) ملحوظة كل ثورة بتحصل ف اسكندرية ولازم اقول الكلمتين دول يا اخى الاسكندرانية دول ايه ؟ معجونين جدعنة وكرامة وكل حاجة حلوة كدا متفهموش ازاى جنرال وانقلب على امبراطوره .. احنا مالنا ما ياكلوا بعض ! لكن لما ييجى الامبراطور دا ناحيتنا ويحكلنا على مناخيرنا نقف وقفة رجالة كدا مع اننا عارفييييين اننا هنتعك فيها وهناخد فوق دماغنا .. لكن برضو جدعان عملوها الاسكندرانية مع ناس كتير خرجت عن نطاق السلطة الحاكمة واستجدعوا عشان كدا ف ثورة يناير كانت اول محافظة شطبت بدرى وعلمّت ع الداخلية الاسكندرانية دول صنف معتبر ف القتال هما والسوايسة وسمعنى أجدع سلام  2) بالنظر ملياً - حلوة ملياً دى - الى حكايات التاريخ ودروسه وعبره ولاد الوارمة بيكسبوا المعارك فورا لكن اللى معاه الحق بيكسب ع المدى الطويل ولنا ف ابن المتضايقة دقلديانوس اسوة حسنة قعد يدبح ف الناس شهور وسنين وف الآخر غار ف المزبلة والمسيحية بقيت وانتشرت وعاشت #كُبة ودا يقولنا درس كل محنة تمر متفقدش ايمانك بقضيتك ولو كنت مهزوم الآن لأن الحق باقى ولو بعد حين ومش هقول اليأس خيانة عشان هتتريقوا وتقفلونى منكم بقى ولسه بنحكى عن دقلديانوس الوغد قالك عملنا العامود عشان نكرمه اهو مجده راح والتمثال راح والقهر راح وفضلنا اللى يخصنا .. الآثر والعبر وبعض المواقع بعشم كدا بتقول انه اتعمل تكريم من اهل اسكندرية لأ .. محصلشى حضرتك دا الوالى المتعين من الامبراطور اللى عمله مش هنستعبط بقى دا اهل اسكندرية لو عليهم كانوا دبحوه ف مطرحه بس هما كانوا منهكين ومحاصرين وبيموتوا جوعا وعطشا فــ... معلش القصد ابقوا احكوا حكايته الحقيقة يا عيال عشان اللى ميعرفش يعرف  4) اخيراااا ابن بطوطة قالك كان فيه نخل كتير وايام زماااان كان فيه شجر وديتوا الحاجات دى فين يا كلاب وهما هوه الأخوة المسئولين عن أى حتة ف مصر ليه عندهم فوبيا اللون الاخضر عموما حتى جراج التحرير البائس اللى فتحوه بلطوه من فوق بدل ما يزرعوه ... #جاتكو_القرف تصبحوا على ألف خير المواضيع المتشابهه: 
|
|
10-16-2017
|
#7 | |
 
|
اقتباس:
المشاركة الأصلية كتبت بواسطة ريماس  كل الشكر لك ع هذا الطرح الرائع . سلمت الايااادي في انتظااار جديدك المميز بشووق تقيم وختم الاروع دايما بيكون وجودك رموسه تسلميلى يا قلبى وتسلميلى ع التقيم والختم نوورتينى |
|
|
|
|
| كاتب الموضوع | انثى متمرده | مشاركات | 11 | المشاهدات | 5689 |
|  |
| انشر الموضوع |
(عرض التفاصيل)
عدد الأعضاء الذين شاهدوا الموضوع : 1
(إعادة تعين)
|
|
العرض العادي
|
|
الساعة الآن 06:11 AM بتوقيت الرياض
Designed and Developed by : Jinan al.klmah