بسلوكك تربي أبنائك

#التربية

اسهل شي بالتربية هو التوجيه، والنصح
والمحاضرات الطويلة المملة

لكن الصعب، هو التصرف الصحيح في الأوقات العصيبة

كلنا نكدر نسوي الطريقه الأولى (قائمه النصائح التي لاتنتهي)
بس هاي طريقه متربي !
هاي طريقه (نظري فقط)
ومن تستخدمها حتى تربي ابنك؛
كل الي حيتعلمه أنه يكون (محاضر ممتاز)

الطريقة الصعبة، الي هو التصرف الصحيح،
هو هنا التربية
هنا التطبيق العملي..

كلنا نكدر وقت نكون شبعانين نوم واكل ، والبيت معزل ونظيف ،
ان نلعب وي الأطفال ونبتسم ونطول خلك.. ونطلع احسن مابينا ..

زين وباقي الاوقات؟

وتحديدا أوقات الازمات؟
هي هنا التربية 😅😆

شايفه من تجتمع كلهن سوه،
الليل كله سهرانه ،
والصبح كعد ابنج وهو هم متنحس
والبيت صاير فوووووضى

ورحتي دتحضرين ريوك
ووكعتي البيضه وكسرتيها
وشرط على رجلج 😂✋

هنا التحدي الحقيقي ...

اذا كدرتي تلزمين نفسج، وماتصرخين
هنا وصلتي أعمق رساله بالتربية لطفلج،
انه تكون عنده قدره تحمل عاليه على اداره الأزمات
ومينهار لمجرد "بيضه انكسرت"

هو طبعا مايدري انتي جنتي سهرانه!

الي حيشوفه هو (ماما فقدت اعصابها وكامت تصرخ لان البيضة انكسرت)

وهذا الشي تاثيره على المستقبل انه يكون على نفس الشاكله،
يهول الأمور
ويصعب الموضوع
ويبتعد عن (الهدوء والصبر والحكمه والتاني)

هاي أعمق الاشياء الي لازم نربي عليها مبكرا

وتاكد هاي الأمور مستحيل توصل للطفل
عن طريق:
(مجموعه مواعظ في فترات المراهقه)
ولا عن طريق:
(محاضرات التوبيخ الي تدخل من اذن وتطلع من الأخرى)

الموضوع صعب؟
طبعا

وحتى توصل لهذا الهدوء حتفشل، مره ومرتين و3 و 100

بس بالاخير حتكدر...
لان تعرف كلش زين هذا التصرف خطا

اما لو بررنا وكلنا (لعد شسوي ادري خوما اني مكينه!)

هنا عندك خيارات:

⁦◀️⁩يا اما تنسحب من اداره الموضوع تماما (تستعين بمساعده)
⁦◀️⁩يا اما تصرخ (كالعاده) بس ذكر نفسك هذا غلط وحس بالغلط وخلي ضميرك يانبك
⁦◀️⁩او تختار أن تبدأ التدريب ... والزم نفسك ،
وابدا بتطبيق التدريب:
اولا: انسحب من المكان
ثانيا: استغفر
ثالثا: اغسل وجهك بمي بارد

وفكر بعمق.. اذا هسه متصرفت صح ، شوكت لعد؟

مره على مره حتوصل للسلام الداخلي ، وتوصل مرحلة،
اصعب ظرف واصعب ازمه ... متكدر تأثر عليك
لان انت متحكم بنفسك تماما...

ومن تتحكم بنفسك.. تاكد انت هسه قادر ان تطبق التربية عمليا 100%
وقادر أن تربي طفلك على الهدوء والحكمه 🧡

تبقى شغله وحده

الي هو التوفيق الألهي..
ابقى ادعي
وادعي .. واطلب التوفيق من رب العالمين

قال تعالى: "وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا ﴿﴾ أُوْلَئِكَ يُجْزَوْنَ الْغُرْفَةَ بِمَا صَبَرُوا وَيُلَقَّوْنَ فِيهَا تَحِيَّةً وَسَلَامًا "

صدق الله العظيم ⁦♥️⁩

فعلا بسلوكنا ستكون ابنائنا

التربية السليمه علم ودراسه يجب اتباعها

موضوع جميل وارفه

شكر بدون حدود

نورت ملاك
انا من تشكرك
الله يسلمك ويخليك

انتقاء رائع وطرح جميـل كجمال روحك
دائما مانرى الابداع والتميز يلامس انتقائك
لاحرمنـا الله من روعة ذلك الإختيار
وجميل الطرح والابداع
لك خالص ودي وعبق وردي

ولك التقدير والأحترام أختي الغاليه

بارك الله فيك على الموضوع القيم والمميز

وفي انتظار جديدك الأروع والمميز

لك مني أجمل التحيات

وكل التوفيق لك يا رب