منتديات وهج الذكرى - انا والمرور وهواك بقلمى حصري

اليوم حابب احكي لكم
عن شىء خانقنى
وكل كلمه وحرف في هذه القصه حدث بالفعل ...
يمكن لما احكيه لكم افك شويه
عندي عربيه صغيره شاريها بتوكيل من واحد سعودى كنت شارى منه شقه فى مدينه نصر وكان بيصفى علشان مسافر بلده واشترط انى اشترى العربيه مع الشقه نظرا لظروفه المهم اتفقنا وخلصت فى الاثنين طبعا بتوكيلات العربيه كان لسه رخصتها لسه فيها 4 شهور القصد قبل ماتنتهى الرخصه بشهر قلت انقل ملكيه واسجل واخلص كان وقتها كورونا بادئه فى الصين وبعض البلدان ومصر بس كانت حالات فى اليوم 18 حاله ومكناش وصلنا لوفيات القصد رحت الشهر العقارى عملت عقد مسجل ودفعت 2900 جنيه مع العلم ان العربيه 2015 وبعدها عملت شهاده مخالفات وشهاده امن من المديريه تفيد ان السياره غير مبلغ بسرقتها وبعد يومين وقبل ماروح المرور الحكومه وقفت التعامل مع المرور نهائيا وبعض المصالح الحكوميه وانا قلقان لان الرخصه قربت تنتهى فقالو متقلقوش نهائى حقوقكم محفوظه اطمنت جدااا بعد شهر وكام يوم قالو المرور هيشتغل فرحت طبعا عاوز اخلص المهم رحت المرور ومعايا كل الاوراق عاوز افحص واخلص حاكم اانا لما يكون ورايه شىء مهم بكون قلقان جداا وعاوز اخلص منه المهم جبت الاوراق المطلوبه لنقل الملكسه واورنيك فحص ودخلت افحص المهندس قالى لازم تجيب مطابقة بصمه من مرور السيارة الاصلي قلت بدأنا الهم والقرف اهو المهم خدت اورنيك الفحص وذهبت لمرور السيارة الاصلي وعملت مطابقة بصمه زي الفل ورجعت على المرور بتاعى عاوزين نخلص دخلت للمهندس قالي ياباشا فين شهاده البيانات قلت له ازاى يعنى قالي انا كاتب لك فى الاورنيك مع مطابقة البصمه قلت استغفر الله العظيم من كل ذنب عظيم وفى رمضان وصايم ومخنوق كان يوم اربعاء قلت أمرى لله مش مهم هروح وأمرى لله يوم السبت رحت مرور السيارة الاصلي ودخلت للظابط المسئول قلت له عاوز شهاده بيانات بص فى التوكيل قالي ياباشا التوكيل فيه ختم مش واضح لازم تراجع الشهر العقارى اللى معمول فيه التوكيل بصيت للختم لقيت فيه 3 اختام غيرة استغربت جدااهو الختم اللي بيقول عليه الظابط فعلا فيه جزأ بسيط مش واضح ,, حااولت اقنع البيه الظابط باني تعبت مشوارين من هنا لهنا وصيام وتعب وحر ولسه هروح مصر الجديده تاني حرااام وقلت له انا معايا عقد مسجل معمول من خلال نفس التوكيل مفيش فايده ابدااا أمرى لله بعدها بيومين رحت الشهر العقارى بمصر الجديده دخلت علي الشباك قلت للموظف على المشكله قالي يافندم تعال بعد العيد خد صوره طبق الاصل من التوكيل لاننا الفتره دى مش بنشتغل توكيلات سيارات قلت الله اكبر هو فيه ايه رجعت وانا مش عارف اعمل ايه اتخنقت فعلا القصد قلت انا هتصل بالراجل السعودى اللى بايع لى العربيه واقوله على المشكله كان فى السعوديه مش فى مصر وبصراحه الراجل رد بكل احترام وذوق وقالى ساعه وهتصرف وهخلى حد يكلمك يخلص لك المشكله بعد كام ساعه لقيت واحد محترم بيكلمنى وقالى انامن طرف فلان وقالى قابلنى فى المرور وانا هخلص لك كل شىء القصد رحت تانى يوم المرور واتصلت بالراجل قالى روح مكتب فلان الفلانى وقوله من طرف فلان دخلت للموظف اول ماشافنى قالى انت من طرف فلان قلت له اي نعم قالى هات الورق اديته الورق قالى هات 950 جنيه قلت له بتوع ايه قالى الضريبه لان الرخصه منتهيه قلت له وهدفع تانى فى المرور بتاعي قالى لا هتدفع تامين لوحات واستيكر فقط قلت له مش معايا المبلغ ورجعت تاني يوم دفعت المبلغ وجبت شهاده البيانات وبعد يومين رحت للمرور بتاعى قدمت الورق وفحصت وتمام الظابط بص فى العقد المسجل قالى فيه مشكله لازم ترجع الشهر العقارى لان المفروض اسم البائع يكوون نفس اسم المشترى بالظبط فيه اسم ناقص فى وسط الاسم اقسم بالله هذا حصل كنت عاوز اخبط راسى بالحيطه وقتها القصد قلت اروح الحق الشهر العقارى رحت بسرعه لقيتهم موجودين قلت للموظف على المشكله قالى اسف قفلنا الوقت اتاخر حاولت اتحايل عليه بكل الطرق منفعش قالى تعال بعد العيد كان قبل الوقفه بيومين رجعت وانا محطم مخنوق عاوز اخبط راسى بالحيطه المهم العيد خلص والحمد لله على كل حال كورونا شغاله بلا رحمه ربنا يستر المهم رحت الشهر العقارى خلصت المشكله فى دقائق والحمد لله تانى يوم رحت للمرور انفخ من التعب اللى تعبته بجد قرفت جدااا دخلت على البيه الظابط قدمت الورق وكله زى الفل قالى تمام التمام الله ينور وبص فى العقد المسجل قالى العقد منتهى لان مدته شهر قلت له علشان الحظر قالى لأ انا شيلت مده الحظر كان هاين عليا وقتها ..... بس قلت له انا الان المطلوب منى ايه اعمل ايه قالى هتدفع 1400جنيه ضريبه مرة ثانيه وتامين قلت له انا دفعت قالى ماهو طالما العقد انتهى بتدفع ضريبه جديده تانى روحت وتانى يوم جبت الفلوس ودخلت علي الشباك قلت له اتفضل ودفعت وخدت نمر وشريط استيكر ورخصه .. وطبعا كلنا عارفين موضوع كورونا والحاله النفسيه الزفت اللى احنا عايشينها من كثر الحالات هذه الايام المفروض الموظف يراعى ربنا ويعلم اننا فى حاله طارئه ويخف شويه عن الشعب بلاش الروتين اللى يقتل ده حرام عليكم اقسم بالله .. من هنا بتقدم بالشكر لكل مسؤول بمصر تحيا مصر .... ودى نهايه القصه وفى النهايه بسألكم سؤال كل واحد يجاوب لو تكرمتو ماذا لو حدث لك ذلك هتعمل ايه وايه شعورك من الى حصل لى وشكرلكم صدعتكم بقصتى ولكنى كان لازم اكتبها ...
بقلم البرنس رامى
#بقلم_شاعر_النخيل
حصري