يا مصر قولى إنتِ مين
سمرة وكحيلة برمش عين
وضحكة صافية على خدين
وورد فتح ف البساتين
ولا المرار صابك سنين
يا مصر قولى إنتِ مين
يا مصر إنت السيدة
وأخوك سيدنا الحسين
ولا يا مصر متقيدة
والقيد أليم
والسجن جوه زرعتك
والأرض طين
يا مصر قولى إنتِ مين
إنتِ الحكيم إنتِ الأمين
ولا صبحتِ دولتين
والشعب أصبح فرقتين
ولا البكى صابك ياعين
ياريت تقولى إنتِ مين
إنتِ الجرس مع صوت أدان
إنتِ الأمــل مع فجر بان
ولا يامصر إنتِ الآنين
يا طاهرة قولى إنتِ مين
إنتِ الفقير فى ليل طويل
من غير غفير
ولا أمير
والعيشة عيشة مليونير
ولا الكلاب اتجمعوا
على كلمتين
الكرسى يصبح ملكهم
والليل حزين
يا مصر قولى إنتِ مين
إنتِ اللى فات
إللى حكم أرضك ومات
ولا إللى عايش فى طرة
ومعاه قلوب مستخسرة
تعود لنا مصر يا عين
يا مصر قولى إنتِ مين
يا مصر إنتِ الطيبين
كلهم ليك محتاجين
والله يا مصر زاد البكى
زاد الأنين
يا طاهرة قولى إنتِ مين
المواضيع المتشابهه: