جدة ام الرخا والشده

افراح اهل الحجاز

الخطبه

اذا كبر الولد وصارر جال يعتمد عليه على طول اهله يدورون له على عروسه

وحتى البنات متى ماكبرت وصارت ست بيت زوجوها حتى لو عمرها صغير
الام من بنتها صغيره ،

وهي تربيها على تحمل المسؤوليه وعلى شغل المطبخ والاحترام والتقدير للكبير والصغير

يبتدو اهل الولد يدورو على عروسه من الاقارب والاصحاب واذا عجبتهم وحده يتفق الاب مع العمده مثلا .

احيانا العريس مايدري انهم قاعدين يخططون يزوجونه .

وحتى لو درى مايقدر يرفض طبعا بيوافق وهو راضي ..كان عيب حد يرفض او يعارض كلام ابوه

ويرحوا جماعة العريس هم والعمده ( العريفه ) عند اهل البنت واذا حصل نصيب

واتفقوا يجتمع العريس ووالده واقاربه وابو العروسه واقاربها والعمده

وينزلون الحرم اذا كانوا من اهل مكه او المدينه يملكون ويشربون زمزم بنية التوفيق

ويرجعون للبيت يسوون لهم عشاء بسيط ..

اما اذا كانت الملكه في البيت يوزعون شربيت وحلاوى لوزيه وعسليه ولدو

اوشريك او تلبينه قبل العشا ولا يخفاكم حركات وتباتيك اهل الغربيه

في تزيين حلاوة الملكه بشرايط والدانتيل واكياس جذابه .. وكل واحد على قده .

الدّبش

كان التقليد المتبع في الماضي أن يذهب والد العروس وأهلها لمشاهدة المنزل الذي يسكن فيه العروسان،

ولعل من بين أغراض الزيارة التي يقوم بها والد العروس وأهلها لبيت الزوجية هو التعرف على ما يحتاجه المسكن من أثاث ،

وقد كان يطلق على الأثاث مسمى (الدّبش) بشد الدال، وفتح الباء .

وقد كانت عملية إرساله من بيت أهل العروس الى بيت الزوجية

تشكل مهرجان فرح جميل ورائع يؤكد حلاوة الأفراح في تلك الأيام الخوالي،

فلقد كان يؤتى بمجموعة كبيرة من الحمالين، يضعون على رأس كل حامل قطعة من قطع الأثاث.

فللحاف حامل، ولكوز الماء حامل، وكذلك للمسند والمخدة، وتبسي الأكل والصحون وكاسات الشاي والمفرش والفانوس والإتريك.

فلكل قطعة من هذا (الدبش) حامل، ويعبر هذا الموكب دروب الحارات وشوارعها

مشياً على الأقدام في مظهر جميل تصحبه الأهازيج الجميلة وملاحقات الصغار

حاليآ صار الدبش يتغلف ويلف بالدنتيل والشرايط >> حتى ممكن انهم يودوه احد

المحلات تغلفه مثل نكتار او زهور الريف او بودي شوب >> هذه الناس الي مره فاضيه و تحب الفشخه والمظاهر

ويكون مرتب في شناط وصناديق ...ويكون ارزاق ( مونة الطعام وادوات المطبخ )

واشياء خاصه للعروس من ملابس وعطور واحذيه وكل ما تحتاجه .

وتاخذه امها و اختها الكبير وعماتها وخالاتها مثلا الحريم الكبار بس ، يعني من خمس الى عشر حريم ..

ويكون في استقبالها في بيت العروس اهل العريس زي امه واخواته وعماته وخالاته

ويستقبلهم بالترحيب والحفاوه وتقدم لهم الضيافه ثم يقومو بترتيب اغراض العروس

في جميع المنزل واماكنها الخاصه وطبعا مايرجعو الا لما تعشيهم ام العريس

وتضيفهم احسن ضيافه وتودعهم بالبخور والعطور

قطع الستاره

قبل الفرح بسبعه ايام كانوا اهل العروسه يجلسونها ورى ستاره مستاجرينها

مزينه بالترتر والدانتيل والخيوط المقصبه ..

و اصل فكرتها ان البنت تشتغل اشغال كثيره فى البيت فيومها اهلها راح

يريحونها من الشغل ووالخروج من البيت حيث انها تستقر

فى الستاره لاستراخاء وويطلع لها طله وقتها قبل وقت الزواج باسبوع

حيت تتميز بلبس جلابيه مطرزه ومشغل بالحرير
طبعا يقعدون يركضون ورى العروسه في البيت لحد مايمسكونها ويحطونها ورى الستاره ( خخخخخ عليهم حركات زمان ) ... طبعا زي ماقلت

فيها طراحه ومخدات وشراشف مطرزه يعني تنظيم معتبر ..

وخلال هذي السبعه الايام يعقدون اهلها يأكلو فيها لين تتورد خدودها

اكل طالع واكل نازل ..طبعا اهلها وصحباتها وجماعتها كلهم مجتمعين وكلهم يشتغلون .

اللي تطبخ واللي تكوي الملابس وترصها في الشناط قبل يودوا الدبش ( العفش ) ومنهم اللي مخصصه للعروسه .

تهتم في تصفية بشرتها بموية ورد ونشاء ..وحلاوة للجسم كله غير الحمامات المغربيه والمشقره ( والله زمان ) المهم يخلونها تتلامع تبرق .

ولا تبان ابدا لاي احد علشان تطلع بطلعه يوم النصه واول مايشوفها عريسها .

في هذه الايام الخيرات تنزل على اهلها من ذبايح وارزاق والطباخ يطبخ والناس تاكل وفرحانه ومبسوطه .

وفي الاخير يعملوا حفله لقطع الستاره اما فطور او عشاء ، الفطور يفطروا عند ام العروسه اكلات شعبيه منها العصيده , الخبز بالعسل والسمن البلدى ,

والفته , مشروب لازم يعملونه اما فى الصباح او العصر اسمه ملوز وهو عباره عن حليب, ماء ورد ,هيل ’ نشاء , رز المهلبيه

ويوزعوا على المعازيم بعض الهدايا تكون عباره عن حناء وعطر عود وحلويات وهديا

ويجلسوا الحريم خارج ستارة العروسه ويغنوا عندها بالدف دون ان يدخلون

اما البنات يكون داخل الستاره مع العروسه

الزمه

هذا عاده قديمه لكن غير موجوده ..اصلها كانوا البنات يستحون مره لدرجة البنت لوعرفت انها راح تتزوج تهرب ..

فكان الاب والام يتفقوا على لزمة البنت فى وقت معين هى حركه يجبوا الطرحه او شرشف ويرموا عليها كانهم يمسونها

وهى تفهم انها الزمت لزوج

ليلة الغمره
تعتبر من الايام السبعه التابعه لقطع الستاره بس في نهايتها

بعد تزغيد العروس وشغل تلميع الجسم ..يتجمعوا الاهل والاحباب .

ويجيبوا نقاشه تحني العروسه وكل اللي يبغى من الحاضرات طبعا كله على حساب ام العروسه المسكينه

( طبعا من خاطرها محد جابرها تدفع عشان فرحها ببنتها )

تكون العروسه لابسه ثوب يقاله ثوب الغمره وهو من غمر العروسه بالذهب والثياب حتى لا يبان منها شئ ...منه بنجابي ومنه خليجي

ويكون واسع فضفاض ويغطي راسها بطرحه ووجهها ببرقع علشان زي ماقلنا تطلع لعريسها بطلعه ..

وتلبس لها محل ذهب >> صيغة مبالغه يعني من كثر الذهب الي تلبسه..

طبعا اللي مايقدر ممكن يستاجر او زمان كانوا يسلفوا بعض ... ويعملوا لها زفه

ومعها بنات صغار يلبسوا مثلها ومعهاهم مرش ومبخره وسيوف وعلم بلادي

عشا الغمره يسمونه التعتيمه ( شريك ونواشف >> جبنه حلاوة طحينيه زيتون .....)

و طبعا رقص واغاني ودبك الين 12 مو زي دحين ياذن الفجر والفرح ماخلص

اما في الحاضر فى ناس يعملوا الغمره فى البيت والبعض الاخر يعملوها

فى وقت الدخله يوم الفرح فى قاعة الحفل تنزف بالغمره فى المغرب

و تلبس العروسه بنجابي او ساري هندي او المغربي وتلبس الذهب الي اشترته من المهر

واخر السهره تلبس الفستان الابيض >> على حسب مو كل الناس يسوها

يتبع

تعليق الرايه

طبعا هذي خاصه بالعريس ...ويمكن مشهوره في المدينه اكثر ...
قبل الفرح بيوم تعلق ام العريس رايه ( علم ) اخضر فوق الباب او على سطح البيت
اعلان عن ان فرح ولدها بكره ...عاد يتجمعون اقاربها وجماعتها ويسهرو
ويتعشو ويغنو ويرقصو وينامو عندها من بكره يقوموا يساعدوها

تحضيرات الملكة ( الشبكة ) والزواج

كان زمان يوم الملكة وبعدها بشهر بشهرين الزواج على ما تجهز البنت نفسها

علشان كدة مافي فرق اما الان :

يوم الملكة وبعدها بسنة او اثنين تبدأ مراسم الزواج من دبش وقطع الستار وغمرة ذكرنا تفاصيلها سابقا

طبعا كل اهل الحاره يد وحده الي يساعد بالمكان واللي يساعد بنصة الشاهي والقهوه

واللي بالفرش واللي يمد العقود واللي يرش المويه في المسارب والطرق ..

واللي يعطي ابو العريس مفتاح السطح واللي يقوله البرحه الفلانيه لكم الليله

سووا فيها مابدالكم واللي يعطيه الحوش يطبخ فيه وإلا يحط فيه الارفاد ..واللي يثبت التبازير على الجدران ...

يعني الكل شغال مافيه احد يتخلى ابدا عن هاليوم وممكن يستمر ثلاثه ايام ..طبعا اهل الحاره مايبغالهم عزيمه .

.بس الناس اللي بعيدين او في الحواري الثانيه ممكن يرسلون لهم كرت

يجيبون ورقه ويخلو احسن واحد خطه حلو يكتب الدعوه >> سقى الله يازمن

طبعا ماننسى نصة الشاهي والقهوه اهم شئ يكون القهوجي جاي من العصر

ومظبط البراريد والفناجيل ومستعد والطباخ يجيب قدوره وحطبه من الصبح

ويبتدي في الطبخ اذا كان برد يكون العشا سليق او عربي ..

واذا كان عادي زربيان او كابلي وطرمبه ( بلح الشام ) وسمبوسه

ولا ننسى برضو حركات اهل العريس ... يجيبوا صندوق مصحف صغير ويغلفوه

ويحطوا المهر فيه .. قال ايش علشان ابو العروسه مايحس انه قاعد يشحت او انه يبيع بنته( تكتكه )

دحين الصناديق وعلب المهر وعربية الملكه اشكال وانواع ومن عشرة ريال الى 10000 ريال

غير الملبس والهدايا اللي على كل شكل وصار اغلبها متكلف فيها ..( بس والله حركاتنا مره حلوه )
المهم نرجع لموضوعنا
يجبوا الجسيس عاد ويبتدى في المواويل والمجسات والموشحات ..

هذا الجسيس فيصل اللبان

[youtube]http://
ياشباب كل هذا واحنا في الشبكة
اوه نسيت اقولكم ان الملك تصير في الحرم وهي وقت كتابة العقد والحفلة هو يوم الشبكة

وتعالوا شوفوا الناس كيف فرحانه وطربانه ..والحريم يغطرفوا
والبنات الصغار يصفقو طبعا من ورى الرواشين ياويل وحده تطلع
وشويه يجي موكب العريس واهله وجماعته ...
وهم شايلين الاتاريك والفوانيس والمعاشر والبواخر
اللي فيها حلاوة النعناع والهيل والقرنفل وسكر البنات والفوفل وواللومنيه وعلب الحلاوة

[youtube]http://

المعاشر

علب الحلاوة
وفي مقدمتها عربية الملكه لانها خاصه بأهل العريس ..محتوياتها عطور كلونيا الليمون ومبخرة وعلبة المهر والريالات الفضة
وشوكلاته الهيل وفوفل وسكر النبات
طبعا الشباب يتسابقون يشيلون الحاجات هذي ..دحين صارو يستحون يشيلونها

طبعا تجي باشكال والوان مختلفة على حسب الذوق

والعروسه تلبس ليلة الملكه اوالخطوبه فستان ملون وتعمل كوشه لونها مثل لون فستانها
وتتغلف عربية الملكه وتتزين الهدايا الي فيها بشرايط ودنتيل تكون مناسبه لفستان الملكه او الخطوبه
والعريس يكون كاشخ بالدقله او المشلح الاسود
ويقدم للعرسين كيكه وعصير والدبل وهدية العريس لعروسه وتكون عباره عن طقم ذهب والمهر وعربة الملكه

[youtube]http://يتبع

النصه

طبعا بعد الغمره وقطع الستاره قلنا اول واحد يشوف وجهه العروسه هو العريس ...

كان مره عيب انها ترفع عينها فيه او في احد من الحاضرين وإلا بيقولون جريئه ولا تستحي

العريس اول مايشوف عروسته يسلم عليها ويحط يده على راسها ويقرأ الفاتحه

بنية ان الله يهديها له وتكون زوجه صالحه ومطيعه .. >> احنا زمان >> في عايلتنا

كان العريس يدخل على العروسه ليلة النصه ويسلم عليها ويقرأ على راسها ويطلع

وهوا ماشافها لسه مغطاه وما يشوفها الا اليوم الثاني ليلة الصباحيه لما تدخل بيته

كانت الزفه بس بالصلوات ( زي زفة محمد عبده ) واللعابات كل وحده بزفتها من العادات

برضه قبل لا تخطي العروسه عتبة اهل العريس يكونوا بالين عقد لولو في مويه

وياخذ العريس هذي المويه ويكبها على رجل العروسه ...من باب التفاؤل وان قدومها بركه على البيت ورجلها بارده ..


الصبحه ( الصباحيه )

تقوم العروسه تتزبط وتتشرع ( تتشيك عالاخر ) وتنزل تصبح على ابوه واهله ..

طبعا التصبيحه تكون من اهله امه وابوه وخواته للعروسه ممكن ذهب وممكن ملابس وممكن عطور ( هدايا )

وايضا العريس له تصبيحه عند اهل عروسته من ابوها وامها واخوانها تكون بقش

( سرة قماش ) فيها ثياب قيطان وعقل مقصبه وغتر ، مشالح ، مناديل وعطور كل واحد على قده ..

طبعا في الليل فيه عشا عند اهل العريس علشان يوروا الناس عروستهم الجديده >> البارح ماحد شافها غير عريسها

وزي ما قلت احنا عندنا ليلة الصباحيه تكون في بيت ام العروسه لان العريس ما يأخذها لبيته الا اليوم الثاني



بعد الفرح

زمان العروسة كانت بعد الفرح ما يسير تخرج من بيت زوجها ولا تسوي زيارات قبل ما تخلص سنة من زواجها

عيب انها تخرج قبل السنة لحد انو بعض الأحيان ما تخرج إلا وعيالها في ايدها

وأول بيت تتعزم فيه لو العروسة بعد هذي السنة لازم يسوولها عزيمة مرتبة على قد خرجتها بعد السنة

و كانت تتسمى بدايه ...البداية هي اول عزيمة تروحها العروسة بعد ما تخرج من بيت زوجها لمن تتزوج

وعاده يكون في بيت اهلها ..

لكن حاليأ يسموها

طلة العروس او اول خرجه للعروس

بعد مرور شهر من زواجها وحصل فرح لاقاربها لابد على العروسه

لبس فستانها الابيض وتزف فى هذا العرس فى المغرب



السابع

يعملوا السابع اهل العريس وهوا بعد سبعه ايام من الزواج حيث

تلبس العروسه فستان مشغل بالترتر الفصوص وتلبس الذهب

ويعمل لها وليمه في بيت العريس ويتجمع الاهل والاقارب

اما حاليا مو كلهم يسوها بس الي يبغى يسوي زي زمان وتلبس العروس

فستان سهره فخم وتسريحه ومكياج وتعمل لها زفه


ادام الله افرحنا وافراحكم

عيني عليك

بصراحة موضوع متعوب عليه

وعادات وتقاليد زمااان ومااجمل زماااان

بالفعل اعدتينا كثير الى عبق الماضي الجميل الرائع

امور كثيره اول مره اراها هنا وانااقرأ هذا التقرير المفصل عن جدة واهلها

وعادات اهل الحجاز الاصيلة ... والتي مازال بعضها قائم حتى الان ... وحتى يومنا هذا

ولن تندثر بمرور الاجيال لأن فيها رائحة الماضي الجميل

عيني عليك

سعدت كثيرا وانتِ تلقين الضوء عن عادات وتقاليد اهل الرخاءوالشدة

ويطيب لي ان اشكرك على مجهودك وعلى حرصك على تكملة تقريرك وعلى ان يظهر بهذا الجمال

اهداء بسيط مني لك ...







شمس الاصيل

الله يعطيكْ العآفيه عآلجلب المفيد
وبـ إنتظآر المزيـد من الفآئدهـ
دمت / بـ بخير وسعآدهـ "

لجهودكم باقات من الشكر والتقدير
تحياتي لك

تسلم الايادي على الموضوع الرائع والمميز والجميل

يعطيك الف عافيه