شيلة البال ضايق .....وهي مرثية في الاب ..

السلام عليكم ورحمة الله وبركاته

جبت لكم قصيده وهي مرثية في الاب ..
كلمات مؤثره وصوت شجي

إن شاء الله تعجبكم

كلمات : جلال اليامي
أداء : عبدالعزيز الرفيدي

البال ضايق والصـدر بـه تناهيـت@والكون في عيني غشـاه الظلامـي
والدمع من فرقـا المحبيـن هليـت@هليتهـا يـوم الخـلايـق نيـامـي
ياليت تنفع كـان ياليـت ثـم ليـت@آشوف زوله واهتنـي فـي منامـي
ليته مع الحيين وإنـي مـع الميـت@ويلحق مع الخلان شهـر الصيامـي
ويحيا به المحراب والحوش والبيـت@وتحيا به السبحـه وطيـر الحمامـي
يابـوي بكانـي فراقـك وبكـيـت@قلبي وعينـي والجسـد والعظامـي
ياشيب عينـي لـي فقدتـك وونيـت@دريت بأن شوفـك منـاي ومرامـي
عايش على الذكرى وإذا يوم حنيـت@طولـت شبحـي للقمـر والغمامـي
مرحوم يا اللي رحت فوق وتعليـت@عسـاك للجنـه وحسـن المقـامـي
اكتب ودمعي يمسح إلي بك أنشيـت@كنه عرف صدق الشعـور بكلامـي
ربي كتب موتك وأنـا مـا تهنيـت@وغيـري تهنـا باللقـا والسـلامـي
ياليتنـي فـي يـوم موتـك توفيـت@ويقال مات مـن القهـر ياحرامـي
ويومي دفنتك بالثـرى ثـم تواريـت@ماهي تقلل مـن عظيـم احترامـي
ومن شافني عند القبر فيـك عزيـت@ماظنتـي يرمـي علـي المـلامـي
افنيت عمـرك بالعبـادة وضحيـت@بأربـع وزودهـا ثمانيـن عـامـي
كني بشوفك للفجـر رحـت صليـت@وحنا وراك نصف وأنـت الامامـي
وإذا جذبني صوت مـذن ووضيـت@ذكـرت ميقافـك وآذانـك تمـامـي
واليوم من مدكـاك يابـوي صديـت@وخوفي من دموعـي تبـل الكمامـي
وإن سقت مركابي على الدار ثم جيت@ماشفت من ياخـذ كثيـر اهتمامـي
دورت مـن يشبـة مقامـك ومليـت@ولالقيتـك بيـن ربـع وعمـامـي
آصيح بأعلى الصوت لين إني ازريت@ولابه الا صـوت طعـن السهامـي
صدري ملاه الضيق يابوي واقفيـت@وأنا علـى ملقـاك جايـع وضامـي
أنساك ...؟ مأنساك لو مت وحييـت@والشوق في جوفي شديـدن وحامـي
وجرح الهوى لو طال منـه تعافيـت@والموت جرحة لين ما أموت دامـي


.......

مودتي لكم


دمـــــــــــــــــــــــوع حائــــــــــــــــــــره


المواضيع المتشابهه:

• شيلة يابوي شيلة جميلة عن الاب 2014
• حتى تكوني مربية ناجحة
• من هو الاب
• مرثية حلم

جزاك ربي كل الخير غاليتي دمووع
وشكرا لك على النقل الجميل
ورحم الله والد الشاعر
وصح اللسانه ..
ورحم الله جميع اموات المسلمين..
لاهنتي
وتقبلي مروري ..